శిరిడి జేరు టెల్ల సిరులకు మార్గమ్ము
సర్వ దు:ఖ హరము సర్వ శుభము
నీదు దర్శనమ్ము నిత్య కళ్యాణమ్ము
శ్రీనివాస సాయి ! శిరిడి రాజ !
తనర నెవరి కైన ద్వారకా మాయిని
జేరి నంత శాంతి చేరు వగును
అరయ నార్తు డైన నిరుపేద కైనను
శ్రీని వాస సాయి !శిరిడ రాజ !
పరమ పురుష ! నీవు భౌతిక దేహమ్ము
వీడి వర సమాధి కూడి ఉన్న
నాడు సైత మవని నప్రమత్తుండవే
శ్రీనివాస సాయి ! శిరిడి రాజ !
నీదు భక్త జనుల నిత్య రక్షణ భార
మొనసి వర సమాధి ముఖమునుండె
మోయు చుంటి వెంత మోదమ్ము రా నీకు
శ్రీని వాస సాయి ! శిరిడి రాజ !
శ్రీ సమాధి జేరి చేయెత్తి పిలిచిన
పలికి మాటలాడు ప్రభుడ వీవు
శ్రీ సమాధినుండి చేయెత్తి దీవించు
శ్రీనివాస సాయి ! శిరిడి రాజ !
నిన్నాశ్ర యించు వారిని
పన్నుగ నిను శరణు జొచ్చు భక్తజనుల నా
పన్నుడి వై రక్షించు ట
నెన్నగ నీ బాధ్యత యని యెంతువు సాయీ !
నీయందు దృష్టి నిలుపుచు
పాయక నినుకొలుచు నట్టి భక్త జనుల పై
శ్రీయుత నీకటాక్ష శ్రీ ల
మేయము గా బరపుచుందు మేలుర సాయీ !
సత్య మెరుగ లేక సంసార బంధాల
జిక్కి బాధలొందు జీవజనుల
బరువు మోయ నీవు ప్ర త్య క్ష మౌదువు
శ్రీనివాస సాయి ! శిరిడి రాజ !
ఎవరు గాని నిన్ను నెద నిండ భావించి
నీసహాయము కొర కాస పడిన
తక్షణాన నీవు తగ నాదు కొందువు
శ్రీనివాస సాయి ! శిరిడి రాజ !
శ్రీ భాగ్య నిధులు గూడుచు
నీ భక్తుల గృహములెల్ల నిండారును నీ
యే భక్తుని గృహ మైనను
శోభనమే – లేమి చొరదు శుభకర సాయీ !
సర్వ కార్య ధర్మ నిర్వహణ లన్నియు
శ్రీసమాధినుండె జేతు ననుచు
మాట ఇచ్చి మమ్ము మన్నించినావురా
శ్రీ నివాస సాయి ! శిరిడి రాజ !
ఓం సాయి రాం.
రిప్లయితొలగించండిసాయిబాబ అందరినీ ఎప్పుడూ చల్లగానే చూస్తారు.ఆయన మహిమలు అనిర్వచనీయం.
సాయీ అంటే ఒయీ అని పలికే ఒకే ఒక్క దైవం.
ఇవి పంచుకున్నందుకు బోలేడు ధన్యవాదాలండీ..!!
గురుపౌర్ణమి శుభాకాంక్షలు
నడుస్తున్న కాలంలో పిలిస్తే పలికే దైవంగా , గురువుగా కీర్తింప బడుచున్న శిరిడీ సాయినాధుడు బోధించిన ఏకాదశ సూత్రాలు నివేదన పద్యరూపంగా వ్రాసిన టపాకు సభక్తికంగా స్పందించి నందుకు ధన్యవాదములు సీతగారూ ,
రిప్లయితొలగించండిగురుపౌర్ణమి శుభాకాంక్షలు .
రాజారావు గారూ!
రిప్లయితొలగించండిచాలా బాగున్నాయి పద్య సౌరభాలు...
ఆలస్యమైనా...
గురుతుల్యులైన మీకు గురుపూర్ణిమ శుభాభినందనలు....
మీ ఆశీస్సులు కోరుతూ...
@శ్రీ
శ్రీనివాస్ గారూ ,
రిప్లయితొలగించండిసంతోషం . సదా శ్రీ సాయి నాధుని ఆశీస్సులు . ధన్యవాదములు .
శ్రీనివాస సాయి అని ఎందుకు అంటారండి? చెప్పగలరా?
రిప్లయితొలగించండిజలతారు వెన్నెల గారూ ,
రిప్లయితొలగించండిఇందులో ప్రత్యేకించి ఏమీ లేదండి . మా యిల వేల్పు శ్రీనివాసుడు . సాయిబాబా బోధనలు , ప్రేమతత్త్వం . జీవనవిధానం - అంటే చాలా యిష్టం . నేను వ్రాసి ప్రచురించిన 'శ్రీనివాస సాయి! శిరిడి రాజ !'అనే నివేదన రూప శతకం లోని వీ పద్యాలు . శతకం లోని ప్రతి పద్యం చివరిపాదాన్ని మకుటం అంటారు . మకుటంలో రచయిత తన పేరును కూడా ఒక ముద్రగా సూచిస్తాడు . అన్నీ కలగలపి సదరు శతకంలో మకుటంగా' శ్రీనివాస సాయి !శిరిడి రాజ ! 'అని పేర్కొనడం జరిగింది . ధన్యవాదములు .