సుజన సృజన

సుజన సృజన
ఓం నమో సాయి నాధాయ

31, డిసెంబర్ 2015, గురువారం

క్రొత్త వత్సరమ్ము కొలువు దీరె

క్రీస్తు శకము నందు ప్రస్తుత మ్మింకొక్క
క్రొత్త వత్సరమ్ము కొలువు దీరె ,
మనిషి బ్రతుకు నందు  మార్పులేవైపుకో ?
మంచివైపు కగున  ఇంచుకైన ?

భూమికావల నెక్కడో పుడమి బోలు
పుడమి కోసము గాలించు బుధులు !  సగము
కూటి కేడ్చెద రిచట   ఆకొన్న జనుల
గూర్చి బాగోగు లరయరా ?  కొంచమేని .

గతము కంటె చదువులు , విజ్ఞాన మధిక
మయ్యె గాని  , సంస్కార మేమయ్యెనో క
నంబడదు, వక్ర బుధ్ధి కనంగ నయ్యె ,
మానవత్వమె  అన్నింట మాన్యత గద !

తెలుగు రాష్ట్రాలు రెండయ్యె , చెలగి యందు
ఒకటి స్వర్ణాంధ్ర యయ్యె , ఇంకొకటి యిదిగొ !
కనుడు! బంగారు మయమయ్యె , కరువు బట్టి
రైతు చచ్చెను మృత్యు కోరలకు జిక్కి .

ధరవరలు పెరిగి బతుకు దారుణమయి
సగటు జీవులు కడగండ్ల బొగులుచుండ ,
పట్ట వేలిన వారికి ప్రజల పాట్లు
ఏటి కేడాది మారిన నేమి యొరుగు ?
  





10 వ్యాఖ్యలు:


  1. మరీ ఇంత నైరాశ్యమా లక్కాకుల వారు ? చీర్ అప్ !

    ఆశా వాదికి లేనిదంటూ లేదు !

    నూతన సంవత్సర శుభాకాంక్షల తో

    జిలేబి

    ప్రత్యుత్తరంతొలగించు
    ప్రత్యుత్తరాలు
    1. ఇది నైరాశ్యము కానే కాదు . ఒక్క పూట కూడా కడుపు నిండని కోట్లాది మందిని గూర్చిన ఆలోచన , ఆవేదన . ప్రజా సేవలో తరించిపోయే అవినీతి మయ రాజనీతిని చూచి కసి .

      తొలగించు
  2. ఆంగ్ల నూతనవత్సరాది శుభకామనలు.

    ఆశావాదులం కదా! మార్పు చూద్దామనుకుందాం!! ఎవరిలోనో మార్పురావాలనుకునేవారు తమలో మార్పు తెచ్చుకోవాలనుకోటం లేదండి!!!

    ప్రత్యుత్తరంతొలగించు
    ప్రత్యుత్తరాలు
    1. రాజనీతిలో దాగిన అవినీతి , ప్రజా సేవలో దాగిన దగా మారితే , ప్రజల సొమ్ము ప్రజలకు అందితేనే మార్పు .

      తొలగించు
  3. నూతన సంవత్సర శుభాకాంక్షలు

    ప్రత్యుత్తరంతొలగించు
    ప్రత్యుత్తరాలు
    1. జిలేబీ గారికీ , శర్మగారికీ , లాస్యగారికీ , నీహారిక గారికీ ,అజ్ఞాతగారికీ - సుజన సృజన వీక్షకులకందరికీ , యావన్మంది బ్లాగరులకూ 2016 పొడవునా సుఖ శాంతులు కలగాలనీ , ఆయురారోగ్యాది ఐశ్వర్యాలు సిధ్ధించాలనీ మనసారా కాంక్షిస్తూ , సుజన సృజన నూతన సంవత్సర శుభాకాంక్షలు తెలియజేస్తోంది .

      తొలగించు
  4. గతము కంటె చదువులు , విజ్ఞాన మధిక
    మయ్యె గాని , సంస్కార మేమయ్యెనో క
    నంబడదు, వక్ర బుధ్ధి కనంగ నయ్యె ,
    మానవత్వమె అన్నింట మాన్యత గద !

    "మీకూ మీ కుటుంబ సభ్యులకు నూతన సంవత్సర శుభాకాంక్షలు !"

    ప్రత్యుత్తరంతొలగించు
    ప్రత్యుత్తరాలు
    1. నిజమే , మానవత్వమొక్కటి నిలబడితే - అన్ని సంస్కారాలూ సిధ్దించినట్లే . దరిమిలా , మంచి సమాజం ఏర్పడుతుంది . ధన్యవాదాలు .

      తొలగించు