సుజన - సృజన

సమస్యాపూరణలు

2012-01-30T22:35:00.000+05:30

పలికి చేసి చూచి కొలిచి యలరు

నోరార భజన , విధ్యను
సారముగా షోడశోపచారములన్ శ్రీ
ద్వారక మాయిన్ సాయిన్
కోరి పలికి చేసి చూచి కొలిచి యలరుదున్

శ్రీకృష్ణున కిచ్చె సిరి కుచేలుడు నెమ్మిన్

రాకేందు వదన వీవన
శ్రీకృష్ణున కిచ్చె - సిరి ,కుచేలుడు నెమ్మిన్
వీక గనంగ బరాత్పరు
డేకముగా వీచె - చెలిమి యెంత మధురమో !

కారు కూతలు కూయ సంస్కర్త యగును

1'నేత కవినీతి భ్రాత ,సన్నిహిత హితులు
కారుకూతలు '- కూయ సంస్కర్త యగున
టంచు భావించు ,వేది కేదైన గాని
చట్ట సభ నేని దిట్టంగ జంక డరయ
2.ఘనులు నేతలు పేదల కడుపు గొట్టి
దేశ సంపద దోచి వీధెక్కి తీరి
కారు కూతలు కూయ , సంస్కర్త యగును
'ఓటు 'వజ్రాయుధమ్మయి వ్రేటు వేసి

సుర హితమ్ము గోరు శుక్రు డెపుడు

శుభకర' మృత సంజీవని '
ని భవు డొసంగి ,నిజ శుక్ర నిర్గతు జేయన్
నభమెక్కి ,మనకు శుభ మి
చ్చు ,భాసుర హితమ్ము గోరు శుక్రు డెపుడు తాన్

సమరమునే కోరినాడు శాంతిని బొందన్

సమరమె శాంతికి భూమిక
సమరమ్మే దుర్మతులను సమయింపగ శ్రీ
రమణుండు కురుక్షేత్రపు
సమరమునే కోరినాడు శాంతిని బొందన్

తునికి సాయ పడుము కనుము సుఖము

పేద గొప్ప యన్న భేద మెరుగదు నీ
చివరి దాక నిలిచి శ్రీలు గురియు
చెలిమి గొప్ప దనము తెలుసు కోరా స్నేహి
తునికి సాయ పడుము కనుము సుఖము

సమస్యాపూరణలు

2012-01-29T22:56:00.001+05:30

దండనము కాదు కాదది పండు వయ్యె

విధి పరీక్షకు నిలబడి విమలు డగుము
దండనము కాదు కాదది - పండు వయ్యె
డు భవిత ,తొలగు కష్టాలు, శుభము కలుగు
దేవ దేవుండు కరుణించి దిక్కు నిలుచు
'అమవస నాటి రాత్రి యొక యంగన చూచెను చంద్ర కాంతులన్'
సుమశరు డేచ బ్రేయసి వసుంధర చేరెను మోహనాంగు నా
గమ పరి రక్షకున్ హరిని కౌస్తుభ రత్న శుభోజ్జ్వలాంగు సం
భ్రమ మతి మేన వెన్నెలల భ్రాంతులు నిండగ కాంక్షితాక్షులన్
'అమవస నాటి రాత్రి యొక యంగన చూచెను చంద్ర కాంతులన్'
త్రాతనే పాముగా నెంచి తరుమ దగునె ?
తనయుడే లోకముగ వాని తరుణి బిడ్డ
లను దరికి దీసి యింటిల్ల పనులు జేసి
తల్లి తనరారు - రుజను ,వార్ధక్య మందు
త్రాతనే పాముగా నెంచి తరుమ దగునె ?
మద్యము సేవించు వాడు - మాన్యుడు జగతిన్
తధ్యము రోగస్థు డగును
మద్యము సేవించు వాడు - మాన్యుడు జగతిన్
మద్యమునకు దూరముగా
హృద్యముగా బ్రతుకు , ధన్యు డేయుగ మందున్
గంగ మునిగి పోయె గంగ లోన
మంగళ కరమైన మాహేశ్వరుని శిర
స్సంగ పావన సుర గంగ భరత
భూమివరము తొలగిపోయె నఘము మును
గంగ మునిగి పోయె గంగ లోన
విష గుళిక యయ్యె గీతా వివేక రసము
కృష్ణ భక్తి జగతి నిండి , గీత విశ్వ
వ్యాప్త మై తనరార గా వచ్చె నీర్ష్య
అరయ కుత్సి తాలు దొలగ నౌష దీయ
విష గుళిక యయ్యె(యగును)గీతా వివేక రసము
భామిని పెండ్లాడి యొకడు బలి పశువయ్యెన్
కామాది షట్క విముఖత
లోమిన మునియయ్యు విధికి నోడి పతితుడై
తామసమున సురవేశ్యా
భామిని పెండ్లాడి యొకడు బలి పశువయ్యెన్

సమస్యాపూరణలు

2012-01-29T22:06:00.000+05:30

ఏడడుగుల బంధమౌర ! యేటికి బంపెన్

పాడు బడె నేమికాలమొ !
కోడళ్ళును కొడుకు లేచ కుములుచు ముదిమిన్
తోడుగ ముసలిది నడువగ
నేడడుగుల బంధమౌర ! యేటికి బంపెన్
విజయశ్రీ కలిత గీత ! వేవేల నుతుల్
విజయోస్తు !భరత జననీ !
విజయ రహస్య యుత యోగ ! విజయోస్తు సదా !
విజయోపదేశ బహువిధ
విజయశ్రీ కలిత గీత ! వేవేల నుతుల్
గీత మార్చును మనుజుల గీత నెపుడు విధి లిఖిత మై ,యతీతమై కదలు నుదుటి
రాత మార్చంగ నెవ్వరి చేత గాదు
ఐన,తెలిసి యందలి యోగ మాచ రించ
గీత మార్చును మనుజుల గీత నెపుడు
చల్లగ గాపాడు గీత సకల సుజనులన్
తల్లియు దండ్రియు వలె , దగ
నుల్లము రంజిల్ల బల్కు నొజ్జయు బలె , శ్రీ
యల్లా మాలిక్ వలె గడు
చల్లగ గాపాడు గీత సకల సుజనులన్
కవి గౌరవ మెల్ల కావ్యగానము చెరచెన్
స్తవనీయ మిచటి భారత
కవి గౌరవ మెల్ల - కావ్యగానము చెరచెన్
రవి యస్తమయం బెరుగని
సువిశాల బ్రిటీషు తంత్ర శోభలు సురగన్
పదుగు రాడు మాట పాడి గాదు
తెలుగు నేల పైన తీరైన పల్లెల
పూల తోట లందు పూచి ,జనులు
పలుకు తెలుగు మాట పండితు లొల్లరు
పదుగు రాడు మాట పాడి గాదు

సమస్యాపూరణలు

2012-01-29T11:39:00.000+05:30

మారు బూజింతు దైత్య సంహారు ధీరు

దేవ సేనాధి పతి మారె 'దేవ సేన '
పతిగ , కుండలినీ వళీ పతికి భార్య
'వల్లి 'యయ్యె - విశాఖు,నపర్ణ మృడు కు
మారు బూజింతు దైత్య సంహారు ధీరు

శివుని పూజింతు రేకా దశీ దినమున

శివుడు తనలోన లేనట్టి జీవి గలదె ?
సర్వ కాల సర్వా వస్థ పర్వ పూజి
తుండొక శివుండె ,వేద వేద్యులగు హరిని
శివుని పూజింతు రేకా దశీ దినమున

పంది మిగుల చొక్కె సుంద రాంగి

పార్వతి'యుమ ' తాను పరమేశ్వరుని కోరి
నిర్వి కారు డైన నిజ మెరింగి
ఘోర తపము జేసి కోర్కె తీరగ గెలు
పంది మిగుల చొక్కె సుంద రాంగి

పండితులను దిట్టు వారు పావన చరితుల్

మండిత సర్వజ్ఞుల వలె
దండి భ్రమల నెదుటి వారి తప్పులు వెదికే
చండాలపు రోగము గల
పండితులను దిట్టు వారు పావన చరితుల్

ఆంగ్ల వత్సర మభయమ్ము నొసగు

తగిన వానలు పడి తనర పంటలు పండి
తిండి కలిగి ప్రజలు తిరుగు చుండ
తల్లి ప్రకృతి మాత చల్లని చూపు తో
నాంగ్ల వత్సర మభయమ్ము నొసగు

గతకాలము మేలు వచ్చు కాలము కంటెన్
మతి దొలగంపుము, గతమే
గతకాలము ,మేలు వచ్చు కాలము ,కంటే(కంటెన్)!
మతిమంతుడు భువి నాశా
రతుడె, భవిష్యత్తు కోరి ప్రగతిని నడచున్

సమస్యాపూరణలు

2012-01-29T00:08:00.000+05:30

పాత కాలపు టలవాట్లు పాడు చేయు

అంటరాని తనమ్ము వేశ్యాగమనము
బల ప్రయోగము సేత దుర్బలుల మీద
పూని మృగయా వినోదమ్ము మొదలు గాగ
పాత కాలపు టలవాట్లు పాడు చేయు

విగ్రహములతో నిండెను వీధు లెల్ల

గ్రహము లాగ్రహించెను, దుష్ట గ్రహము లోలి
కదలి వచ్చెను,జనుల నిగ్రహము సడలె,
నాగ్రహము మీరి కలహించె నఖిల జగతి
విగ్రహములతో నిండెను వీధు లెల్ల

తాపసులకు రక్ష దైత్యతతులు

ఆ 'పశుధర్మాచరణ' స
దా పసయని మదిదలంచి తామస గుణులై
పాపము బోధించు నసుర
తాపసులకు రక్ష దైత్యతతులు దలంపన్

మానము లేని స్త్రీని గని మాతగ మ్రొక్కిరి పండితోత్తముల్

ధీనిధు లై మహోన్నత సుధీ విభవమ్మున తెల్గు భారతిన్,
వాణిని తెల్గునాట జన వాడుక మాటలు కూర్చితెల్గులన్
జ్ఞాన ప్రసూన దాయినిగ, గ్రాంధిక కేవల తత్త్వగణ్యతా
మానము లేని స్త్రీని గని మాతగ మ్రొక్కిరి పండితోత్తముల్

పూల పానుపు కాదది ముండ్ల బాట

చేల తలనేల,కనులు లోకాల నేల,
కేల తుల లేని సిరుల వరాలు దేల
గ్రాలు శ్రీసాయి కరుణాల వాల లీల
పూల పానుపు-కాదది ముండ్ల బాట

నామంబుల లోన పంగ నామము మేలౌ

ప్రేమ నటించుచు లోలో
నామంబులు దీయు సఖుని నమ్మకు నీవున్
ధీమమ్మున వాడి కిడుము
నామంబుల లోన పంగ నామము మేలౌ

సమస్యాపూరణలు

2012-01-28T23:25:00.000+05:30

పసలేని పశువు కడివెడు పాల నొసంగున్

కసవును మెసవుచు బుధ్ధిని
పసలేని పశువు కడివెడు పాల నొసంగున్
వసుధను మొలిచిన గింజలు
వసువులు గురిపించు మానవాళికి - నరుడో???

మకర సంక్రమణము మతిని చెఱచు
వచ్చి మనిషికి సద్బుధ్ది నిచ్చి తీర్చి
మార్చు'మకర సంక్రమణము'మతిని - చెఱచు
దురిత స్వార్థాది' పిదప బుధ్ధుల'ను - కాల్చి
మలినములు లేని 'బంగారు మనిషి' జేయు
భోగములకు పంట భోగిమంట
వర్ష హేమంతముల గల్గు వణుకు నుండి
కొంత తెరిపి గల్గు, భువికి సుంత తగ్గు
రోగ బాధలు, జనుల కారోగ్యభాగ్య
మొదవు, భోగములకు పంట భోగిమంట
సంగీతము విన్నవారు చచ్చిరి త్రుటిలో
రంగ దభంగ భయంకర
శృంగ మహోదధులు పొంగి చేలము దాటన్
చెంగట ప్రళయ సునామీ
సంగీతము విన్నవారు చచ్చిరి త్రుటిలో
ధర్మ విదులకు బూజ్యుడు త్రాగు బోతు
పాలకుల దోపిడీకి , పైవారి ముడుపు
లకును , జీతాలు , పెన్షనులకు , ప్రభుత్వ
పనులకును మద్య మాదాయ వనరు గాన
ధర్మ విదులకు బూజ్యుడు త్రాగు బోతు

సమస్యాపూరణలు

2012-01-28T22:34:00.000+05:30

దైవ మనెడి పదము తద్భవమ్ము

ఆ పరాత్పరు పరమాత్మ తత్వపు సూచి
దైవ మనెడి పదము,తద్భవమ్ము
గాదు దయ్యము,భయ కల్పితమ్మయి పుట్టి
మనిషి తలను దూరి మతిని జెరచు

గణతంత్రమ్మనెడు మాట కల్లగ మిగిలెన్
ప్రణతి ప్రణతి శ్రీ భారత
గణ తంత్రమ! నీకు నేడు కరములు మోడ్తున్
ఘనమెరుగని యల్పులకీ
గణతంత్రమ్మనెడు మాట కల్లగ మిగిలెన్
కడలి నీరంతయును నిండె కడవ లోన
వెళ్లె వేటకు మావతో పల్లె పడుచు
దూర మేగిరి సంద్రాన దొరక లేదు
చేప లేవియు, చింతించె పాప మిట్లు
'నోరు దడుపంగ పనికి రా నేర విచటి

కడలి నీరంతయును,నిండె కడవ లోన
మంచి తీర్థము లొడ్డుకు మరల నెపుడు?
పైన సూరీడు మండె, నీవైన మొయిల !
కురిసి దాహార్తి దీర్చరా కూడ దేమి?

విఱుగ బండిన చేలను విడువ దగును

నకిలి విత్తన మోసాలు నమ్మిచెడిరి బొంది బోయి రైతన్నలు మునిగి ,నడ్డి
విఱుగ,బండిన చేలను విడువ దగును
కోరి పసులకు , దండుగ కోత కూలి
కోటికి పడగెత్తి కూడ కూటికి వగచెన్
దీటైన ప్రతిభ గల్గిన
మేటి కళాకారు డయ్యు మెచ్చక జనముల్
మాటున బడి మహిత కళా
కోటికి పడగెత్తి కూడ కూటికి వగచెన్

సమస్యాపూరణలు

2012-01-28T00:24:00.000+05:30

గజ్జ లందెలు ఘల్లు ఘల్లన కావ్య కన్యక లాడరే

ముజ్జగంబుల నేలు సాయికి మ్రొక్కి పాటలు పాడరే
పజ్జ చేరి మహాను భావుని పాదపూజలు సేయరే
గజ్జ లందెలు ఘల్లు ఘల్లన కావ్య కన్యక లాడరే
సెజ్జ హారతు లియ్యరే యభి షేకముల్ పలు సేయరే

కాకులుకొంగలున్ మరియు గ్రద్దలుడేగలురాపులుంగులున్

రాకు మహేంద్ర జాలమిది రాచిలుకా! కవికోకిలల్ మహా
పోకిరులమ్మలేనివిధముల్ వచియింత్రు-వసంతమేడ? మీ
కాకులుకొంగలున్ మరియు గ్రద్దలుడేగలురాపులుంగులున్
కేకలు వేయుటల్ వినవ? గింజలు లేక వనమ్ములెండగా

చెడుగుల తో దేశమెల్ల శ్రీకర మయ్యెన్

చెడుపై సమరమునకు దిగి
కడుకొని కవి శంఖమూది కవితల నల్లన్
కడు చైతన్యము నొందిన
చెడుగుల తో దేశమెల్ల శ్రీకర మయ్యెన్

మకర శేఖరుండు మమ్ము బ్రోచు

తనకు చిక్క కెవడు తప్పించు కోలేడు
కాల విధిని దాటు ఘనుడు లేడు
ఉత్తరాయణమున నుజ్జ్వలు డాదిత్య
మకర శేఖరుండు మమ్ము బ్రోచు

పాపులను బ్రోచులే భగవంతు డెపుడు

దారి తప్పిన బిడ్డలే తల్లి దండ్రి
మదిని మెదులుట జూడగా మనుజులందు
దారి తప్పిన వారిని దరికి జేర్చి
పాపులను బ్రోచులే భగవంతు డెపుడు

దారము రక్షింపుము సాధుతతి' నండ్రు బుధుల్

ఘోరము 'సాధువు'ల విథము
నేర ప్రపంచముల నేలు నేర్పరు లగుటన్
'శ్రీరమణా! పృథ్వీ కే
దారము రక్షింపుము సాధుతతి' నండ్రు బుధుల్

భక్తి కైమోడ్చి పరమాత్మ ప్రాపు గనుము !

2012-01-14T23:19:00.002+05:30

పరగు విశ్వ మనంతము , భ్రమణ రూప

చలన చాలన సంవృత్త శక్తి మయము

అందుగల కోట్ల గ్రహ తారకాది కములు

తగ నసంఖ్యాక మయ్యును దారి విడవు

‘భార్య బిడ్డలు తాను ‘ – ఈమాత్ర మైన

చిన్న సంసార బాధ్యతే చేత గాని

మనిషి తనయంత కడు శక్తి మంతుడ నని

విర్ర వీగుట యది యెంత వెర్రి తనము ?

తాను నివ సించు విశ్వమే , తనకు సుంత

యైన బోధ పడుట లేదు , తాను శక్తి

మంతు డెట్లగు? విశ్వనియంత కన్న

నధికు డెట్లగు? నల్పాయువగు మనుజుడు

ఆవరించిన గాలి , సూర్య కిరణాలు,

పుడమిపై నీరు ప్రాణుల పుట్టుక లకు

బ్రతుకుటకు ప్రాపు - లిందెట్టి భాగ్య మైన

తొలుగ - సృష్ఠించ నేర్చునే మలిగి తేర ?

ప్రకృతి పరమైన భాగ్యాలు బావు కొనుచు

దాతనే మరచు కృతఘ్నతా విధాన

భావనలు గల్గు మానవా! పతన మవకు

భక్తి కైమోడ్చి పరమాత్మ ప్రాపు గనుము

..... వెంకట రాజారావు . లక్కాకుల

నేటి జన్మమున సార్థకత గనుము

2012-01-13T00:52:00.002+05:30

మనుజ జన్మము ప్రాప్తించె మనకు సఖుడ !

మరల వచ్చుట కల్ల , యేమైన నేమి

పూర్వ జన్మలును మరల బుట్టు కథలు

తక్కి, నేటి జన్మమున సార్థకత గనుము

చావు తరువాత నేవియున్ లేవు సఖుడ !

నీవు చేసిన మంచియే నిలిచి యుండు

మంచి చెడ్డల మూల్య మిమ్మహిని గాక

చచ్చి స్వర్గాని కేగు ముచ్చటలు విడుము

తేర మాటల బుధుల వాతెరల కన్న

చిన్న సాయమ్ము మిన్నయంచెరుగు మన్న!

సమ సమాజమ్ము కలయయ్యె , సాటి మనిషి

బాధలో నైన తోడ్పాటు బాధ్యత గద !

అరసి జీవిత కాల మ్ము నందు నెంత

మందికి సహాయ మందించి , మంచి జేసి

మించి నీ యాత్మ సాక్ష్య మిప్పించ గలవొ

అనుభ వింతువు రెండింత లగు ఫలమ్ము

పిల్చి పేదల కన్నంబు బెట్టు వారు

వస్త్ర దానమ్ము చేయు పావనులు ఘనులు

చదువు చెప్పించు వారు నాపదలు బాపి

బ్రతుకు తెరువులు చూపించు వారు ఘనులు

రోగ గ్రస్తుల కారోగ్య రుధిర మిచ్చి

ప్రాణ దానమ్ము జేసెడు వారు ఘనులు

నీవు చేసిన మంచి రాణించి నీదు

భార్య బిడ్డల బ్రతుకులు బాగు పరచు

....... వెంకట రాజారావు . లక్కాకుల

కదలి రావమ్మ ! మకర సంక్రమణ లక్ష్మి!

2012-01-10T12:02:00.000+05:30

వచ్చె’ మకర సంక్రాంతి ‘ నీవంతు వచ్చె

చూడ రావమ్మ పుట్టింటి వాడ వాడ

నేల తల్లి నోదార్చి కన్నీరు తుడువ

కదలి రావమ్మ! మకర సంక్రమణ లక్ష్మి !

ఋతువు లేమాయె? యే ‘మాయ’ గతులు మార్చె ?

వర్ష ఋతువున వానలు పడుట లేదు

నేలలో నీరు మృగ్యమై చేలు , ప్రాణు

లెండి యగచాట్ల పాల్బడు చుండె జనము

పల్లె వీడి ప్రజలు బ్రతుకు భారము మ్రోయ

పట్టణాల బాట పట్టిరి, మరి

పల్లె పట్లు వీడి బయలెల్లె సంక్రాంతి

వచ్చి చూడు నీదు వైభవమ్ము

పిలిచి పిలిచి పెట్టు పిండి వంటల యూసు

లేవి? యెటకు బోయె నీవి గుణము ?

ఆకసమ్ము నెక్కె నవనికి నందవు

ధరలు, తమకు లేని ధర్మ మేల ?

పిలుపు లేకనె పెద్దలు, పేరటాండ్రు

అదిగొ వచ్చిరి యవనికి, ‘ నిదిగొ! మీకు

ఆశ దీరదు, మీబిడ్డ లరువు లంది

కరవు దీర బెట్టంగ లేరరుగు డింక ‘

--- వెంకట రాజారావు . లక్కాకుల

బాదరాయణ సంబంధం

2012-01-10T11:14:00.000+05:30

కోరి ప్రేమించి పెండ్లాడి క్రొత్త జంట

పురము వీడ్వడి వేరు కాపురము బెట్టె

నంతలో చుక్కతెగి పడ్డ యట్లు దిగిరి

బండి గట్టుక వచ్చిన బంధు తతులు

వరుని వైపున వారని వధువు తలచె

వధువు వైపున వారని వరుడు తలచె

వస్తు చయముల సమకూర్చ వరుని వంతు

వండి వార్చంగ వడ్డించ వనిత వంతు

ఇష్ట మైనట్టి వన్ని వండించు కొనుచు

తినుచు త్రాగుచు బంధువుల్ దిరుగు చుండ

తీరికే లేదు పాపము తినగ ద్రావ

కూడి తలపోయ నింకేడ ? క్రొత్త జంట

తిష్ట వేసిన బంధుల తీరు జూచి

చేరి తమలోన జంట చర్చించు కొనగ

తమకు వారికి నెట్టి బంధమ్ము లేమి

యెరిగి యడిగిరి , వారు జంకేమి లేక

‘ అయ్యొ! మా బండి చక్రాల కొయ్య గాని

అట్టె మీయింటి ముందున్న చెట్టు గాని

బదరికా వృక్ష సంబంధ మగుట, మనము

బాదరాయణ సంబంధ బంధువులము ‘

అనిరి, నివ్వెర పోయిరి వినిన జంట ,

పరగ నేబంధములు లేని బంధమునకు

చేరి యీమాట భూమి ప్రసిధ్ది గాంచె

బాదరాయణ సంబంధ బంధ మనుట

(బదరికా వృక్షము = రేగు చెట్టు)

------వెంకట రాజారావు . లక్కాకుల

వచ్చె నవ వత్సరమ్ము........

2011-12-31T23:09:00.001+05:30

వచ్చె నవ వత్సరమ్ము , కావచ్చు నిజము

కాల గణనమ్ము దీనిలో ఘనత యేమి ?

పేద శ్రీమంతు డగున ? దీపించి యెగసి

బడుగు బతుకుల వెన్నెలల్ పరుగులిడున ?

మనిషి స్వార్ధాన్ని కొంతైన మాను కొనున ?

మనిషి మనిషిని దోచుట మాను కొనున ?

మనిషి దుర్మార్గ వర్తన మాను కొనున ?

మనిషి మనిషిని చంపుట మాను కొనున ?

నేతలు వినీతులై తలరాత మారి

దేశ ప్రజలకు శాంతి సందేశ మిడున ?

చదువు పూర్తయి యుద్యోగ విధులు లేని

వారి బతుకులు కొలువుల చేరు వగున ?

కోత లేని ‘ పవరు ‘ సమ కూరునా ? జ

లమ్ము పారి రైతన్న పొలాలు పండి

భారతావని కాకలి తీరునా ? ప్ర

భుత్వ పథకాల తీరు ప్రమోద మిడున ?

అగును కారణ మవినీతి యన్నిటికిని

ఓటరులు నీతి మంతులై ఓటు వేసి

నీతి మంతుల నేతల నెన్ను కొనిన

నాటి నవ వత్సరమ్ములు వేడు కగును

గ్రాంధి కాన్ని బుధుడ ! కాస్త విడుము

2011-11-11T15:19:00.001+05:30

గ్రామ్య మంచు బలికి గ్రామీణ తెలుగును
కించ పరచి నీవు కించ పడకు
జనుల భాష కున్న ఘనతను గుర్తించి
గ్రాంధికాన్ని బుధుడ ! కాస్త విడుము

గ్రాంధికమ్ము సతము గౌరవ నీయమే
గతము దెలియ జేయు ఘనత వలన
వ్యావ హారికమ్ము వాడక తప్పదు
నేటి యవసరమ్ము- నిజము గనుము

కవి వాడిన జన వాడుక
ప్రవిమల పదముల ను గ్రామ్య పదము - లను - బుధుం
డవి యాతని టేబిల్ పై
బవళించిన కోశ మందు గన రావంచున్

పదపడి యే భాష నయిన
పద జాలము మార్పు జెందు బరికింపంగా
పద కోశ మందు బ్రతుకవు
పదములు జనపదము లందు బ్రతుకును దెలియన్

వ్యాకరణ మేల ననగా
ప్రాకటముగ వ్రాయ ,జదువ, బరి భాషింపన్
సౌకర్యము సౌలభ్యము
చే కూర్చుట కే- మరువకు చిత్తము లోనన్

ఇది సాధు విది యసాధని
పదముల నిపతించి పూర్వ భాషను తులగా
పదపడి భావింప నగున ?
కుదురున బ్రాచీన భాష కొలతకు నేడున్ ?

జన మధ్య మందు నిలిచిన
ఘన పదమే సాధువగును - కను మరుగై యా
జన మధ్య నుండి తొలగిన
పని లేని పదమ్మసాధు పరికింపంగన్

గ్రాంధిక భోషాణములో
బంధింతుర ? తెలుగు పద్య భారతి నకటా !
మందికి దూరము జేతుర ?
కొందరి సొమ్మైన యట్లు - కూడదు సుమ్మీ!

----- వెంకట రాజారావు . లక్కాకుల

తెలుగు పద్యము తా కొల్వు దీర వలయు

2011-11-04T15:53:00.000+05:30

తెలుగు నాట బలుకు తియ్యని మాటతో
తెలుగు పద్యము కొల్వు దీర వలయు
తెలుగు జాతీయాల తియ్యం దనాలతో
తెలుగు పద్యము కొల్వు దీర వలయు
తెల్గు గ్రామీణుల తీరు తెన్నుల తోడ
తెలుగు పద్యము కొల్వు దీర వలయు
తెల్గు లోగిళ్ల వర్ధిల్లు వెల్గుల తోడ
తెల్గు పద్యము కొల్వు దీర వలయు

కూడి పండితుల్ దలలూచు కొరకె గాక
తెల్గు లందరి కందంగ దివురు నటుల
తెల్గు ముంగిళ్ల గెడన సందీప్తు లిడగ
తెలుగు పద్యము తా గొల్వు దీర వలయు

---- వెంకట రాజారావు . లక్కాకుల

2011-11-03T21:58:00.000+05:30

                         నివేదన

ఆ.వె: రార గోప బాల! రాజిత జయ శీల !
        రార వేణు లోల !రాగ హేల !
        రార విశ్వ పాల !రమణీయ శుభ వేళ
        శ్రీనివాస సాయి! షిరిడి రాజ!

ఆ.వె: కాళ్ల కడ్డము పడి కరుణించ వేడితి
        కనుల జూడు నన్ను గన్న తండ్రి !
       కన్న బిడ్డ నయ్య కనికరించగ లేవ ?
        శ్రీనివాస సాయి !షిరిడి రాజ !

కం:   నీ పాదాంబుజ ధ్యానము ,
       నీ పాద నితాంత దృష్టి నీమము ,సతత
       శ్రీ పాదసేవ భాగ్యము
       మాపాలిటి వరము లయ్య మారుతి సాయీ !

కం: శశి కరములు తాకగ నే
      పసి హృదయము విచ్చి కలువ పరవశ మందున్
      వెస నీ కటాక్ష రుచిరము
      ప్రసరించుట తోనె మాకు భాగ్యము సాయీ!

కం మధురము నీ నామ జపము ,
       మధుర తరము దర్శనమ్ము, మధు మాస సుధా
      మధురము నీ తోటి చెలిమి ,
      పద సేవన భాగ్య మెంత మధురమొ సాయీ !

ఆ.వె అరయ ప్రణవ నాద మాకాశ మంతట
         నిండి మారు మ్రోగి నిన్ను జేరి
         యొనర నొక్కటగుచు నోంకార మయ్యెరా
        శ్రీనివాస సాయి! షిరిడి రాజ !

ఆ.వె గగన సీమ విరిసి కను విందు చేయు నా
        తార లెల్ల భువికి తరలి వచ్చి
        తనర నిన్ను గొల్వ ద్వారాన నిల్చెరా
        శ్రీనివాస సాయి !షిరిడి రాజ !

ఆ.వె నాడు పట్టు చేల వీడని కన్నయా !
         నేడు చిరుగు బొంత వీడ వైతి
         నిన్ను దెలియ లేము నిర్గుణ బ్రహ్మమా !
         శ్రీనివాస సాయి! షిరిడి రాజ !

కం నీ కరుణాపాంగ రుచులు
      ప్రాకటముగ బొంది నట్టి భాగ్యము కతనన్
      చేకొని యేపని జేసిన
      నీకు సమర్పణము జేతు నిరతము సాయీ !

ఆ.వె మాకు రక్ష నీవు మమ్ముల బోషించు
         భార మరయ నీదె పరమ పురుష !
         జగతి నిండి నీవు జాగృతి నిచ్చేవు
         శ్రీనివాస సాయి ! షిరిడి రాజ !

ఆ.వె శ్రీ సమస్త విశ్వ శ్రేయోభి లాషి !నా
         యాత్మ నందు నీవు నాకతీత
         యోగి రూప మందు దాగి యున్నావురా
        శ్రీనివాస సాయి !షిరిడి రాజ !

ఆ.వె నిన్ను గూర్చి తెలిసి నీతోటి మాటాడి
         నిన్ను బొందు నాశ నన్ను విడదు
         వెలయు జ్ఞాన మిచ్చి వివరించరా తండ్రి !
         శ్రీనివాస సాయి !షిరిడి రాజ !

                                  --- వెంకట రాజారావు . లక్కాకుల

శ్రీ సాయి నాధుని " దివ్య మంగళ స్వరూపం "

2010-11-20T17:05:00.001+05:30

శ్రీ సాయి నాధుని " దివ్య మంగళ స్వరూపం "

శ్రీ సాయి నాధా !

ఆ.వె. భాను బింబ మంత ప్రజ్జ్వలత్ కాంతులు
చంద్ర బింబ మంత చల్ల దనము
నీదు శిరసు నందు నెగడొంద గంటి రా
శ్రీని వాస సయి ! శిరిడి రాజ !

ఆ.వె. ఉత్త మాంగ కాంతు లుజ్జ్వ లింపగ నీక
నెట్టన తల గుడ్డ కట్టి నావు
ప్రజ్జ్వ లించు ప్రభలు పరిహృత మయ్యేన ?
శ్రీని వాస సాయి ! శిరిడి రాజ !

ఆ.వె. ఫాల భాగ మందు పారాడు శాంతమ్ము
కట్టు చేల దాచి పెట్ట లేక
మోము దమ్మి నరసి మురిసేని విరిసేని
శ్రీని వాస సాయి ! శిరిడి రాజ !

కం . శ్రీ కరములు భవ హరములు
శ్రీ కేతన మెత్తి నట్లు చెలువము లై శ్రీ
లా కారము దాల్చెనొ యన
సాకారపు శృతుల గంటి జయముర సాయీ !

కం . జగతికి వెలుగులు ‌‌. అగతిక
జగతికి జగ మెరిగి నట్టి సద్గతు లై శీ
ఘ్ర గతిం గాచు కటాక్షపు
సుగతులు నీనయన గతులు శుభకర సాయీ !

ఆ.వె. తీరి విరిసి నట్టి తెల్ల దామరల లో
దూరి తిరుగు నట్టి తుమ్మెద లన
కడు మనో మైన కంటి పాపలు గంటి
శ్రీని వాస సాయి ! శిరిడి రాజ !

కం . నన సంపెగ సొబగున నా
నన మున కోటేరు దీర్చు నవ్విధి సొబ గై
కొన దేరి నాసి కాగ్రము
ఘన దీక్షను జాట గంటి ఘనముగ సాయీ !

కం . అధరములో మధు రోక్తుల
సధనములో త్రిభువన హిత సంభాషణ ది
వ్య ధిషణ వేదములో యన
నధర మధుర బింబ ఫలము లరసితి సాయీ !

కం . పలు జన్మల తపమున పు
వ్వులు నీ గళ సీమ జేరు పుణ్యము బడసెన్
వలమురి శంఖమొ యన మం
గళ మయ గళ సీమ గంటి ఘనముగ సాయీ !

కం . భూజనుల కండ దండలు
ఈ జగతిని నాదు కొనగ నేర్పడినవి నీ
యాజాను బాహు దండలు
మా జన్మకు సుగతు లట్లు మాన్యుడ సాయీ !

ఆ.వె. అభయ ముద్ర దాల్చి యరచేత దక్షిణ
హస్త మెత్తి జగతి నాదు కొనెడు
నీదు చేతి చలువ పాదు కొంటిర తండ్రి !
శ్రీని వాస సాయి ! శిరిడి రాజ !

కం . పాయని దయకు నిధానము
హాయికి కడ లేని చోటు అమృత మయ మౌ
నీ యేద పై తల నానిచి
హాయిగ ఏడ్వంగ నాకు ఆశర సాయీ !

ఆ.వె. ఎడమ కాలి తొడకు కుడి కాలు కీలించి
పైన నెడమ చేయి పాదు కొల్పి
కొంద రాయి నెక్కి కూర్చుంటివా తండ్రి !
శ్రీని వాస సాయి ! శిరిడి రాజ !

కం . నీ పదములు శ్రీ పధములు
ఈ పృధ్వికి యెన్న దగిన యేడు గడలు మా
కాపద మొక్కుల తెరువులు
మా పాలిటి కల్ప తరులు మాన్యుడ సాయీ !

ఆ.వె. హే సమస్త విశ్వ సృష్ఠి కారక ప్రభో !
హే సంస్త ప్రాణి హృదయ వర్తి !
తే నమోస్తు దివ్య తేజో శుభాకార 1
శ్రీని వాస సాయి ! శిరిడి రాజ !

........... వెంకట రాజా రావు . లక్కాకుల

సాయి నాధునికి " షష్ఠ్యంతాలు "

2010-11-19T14:42:00.001+05:30

సాయి నాధునికి " జయ మంగళ షష్ఠ్యంతాలు "

కం . జయ మంగళ శుభ కరునికి
జయతు జయతునిఖిల లోక జగదీశునకున్
జయ పావన శుభ చరితుకు
జయతుజయతు సాయి నాధు చరణ యుగళికిన్

కం . జయ రంజిత శుభ నాముకు
జయతు జయతు సాయి రాము సర్వజ్ఞు నకున్
జయ జగతీ జన వరదుకు
జయతు జయతు కరుణామయు చరణ యుగళికిన్

కం . జయ సర్వాంతర్యామికి
జయతు జయతు సర్వ కార్య జయ శీలునకున్
జయ విశ్వ జనావరుణికి
జయతు జయతు దేవ దేవు చరణ యుగళికిన్

కం . జయ యోగీశ్వర వరునికి
జయతు జయతు సాయి కృష్ణ జనార్ధనునికిన్
జయ గీతా చార్యునికిని
జయతు జయతు పరమ గురుని చరణ యుగళికిన్

కం . జయ జగదా ధారునికిని
జయతు జయతు జంగమ పతి సాయి శివునికిన్
జయ దీన జనావనునికి
జయతు జయతు లోక ప్రభునిచరణ యుగళికిన్

కం . జయ బ్రహ్మార్చిత మూర్తికి
జయతు జయతు దత్త సాయి జ్ఞా నాంభసికిన్
జయ చిన్మయ సందీప్తికి
జయతు జయతు ఆది పురుషు చరణ యుగళికిన్

కం . జయ సర్వ వ్యాపనునికి
జయతు జయతు సాయి విష్ణు జలజేక్షణుకిన్
జయ నారాయణ విభునికి
జయతు జయతు వేద వేద్యు చరణ యుగళికిన్

కం . జయ నిత్య పరం జ్యోతికి
జయతి జయతు సర్వ సిధ్ధి సంభావ్యు నకున్
జయ గుణ సాయి ప్రభునికి
జయతు జయతు సద్గురు వర చరణ యుగళికిన్

----- వెంకట రాజా రావు . లక్కాకుల

శ్రీ సాయి ప్రభుని సర్వ దేవతా సత్తా క మూర్తి మత్వం

2010-11-19T00:09:00.000+05:30

" సర్వ దేవతా సత్తాక దివ్య మంగళ మూర్తీ ! "

శ్రీ సాయి నాధా !

ఆ . వె . శేష నగము జేరి చెలు వార కొలువైన
వేంకటేశ్వరుడవు వెలయ మాకు
కలల పంటవైన యిల వేల్పు నీవెరా
శ్రీని వాస సాయి ! శిరిడి రాజ !

ఆ . వె. తిరుమ లేశు నెదను దీటు గా కొలువైన
అమ్మ- త్రిభువనాల కండ దండ
పరమ సాధ్వి యైన పద్మావతియె నీవు
శ్రీని వాస సాయి ! శిరిడి రాజ !

ఆ . వె . తాను విశ్వ మందు తన యందు విశ్వమ్ము
" తామరాకు నీరు " తనరు భంగి
వెలయు విష్ణు రూప ! విశ్వావనీ నాధ !
శ్రీని వాస సాయి ! శిరిడి రాజ !

ఆ . వె . పసిడికి నిలువెల్ల భాసురంబగు కొల్వు
శ్రీకరముల నెలవు చిత్త మెల్ల
సిరులు రూపు దాల్చు శ్రీలక్ష్మి యే నీవు
శ్రీని వాస సాయి ! శిరిడి రాజ !

ఆ . వె . సకల శుభము లిచ్చి సాయుజ్యముల నిచ్చి
సగము తనువునిచ్చి సత్కరించు
భక్త సులభు డైన పరమేశ్వరుడ వీవు
శ్రీని వాస సాయి ! శిరిడి రాజ !

ఆ . వె . అరయ ప్రాణికోటి కాహార మిచ్చేటి
అమ్మ – త్రిభువనముల కన్న పూర్ణ
సర్వ మంగళ , శుభ , శర్వాణి యే నీవు
శ్రీని వాస సాయి ! శిరిడి రాజ !

ఆ . వె . విశ్వ స్రస్ట తాను విశ్వమ్ము సృజియించి
మొదలి జన్మలరసి విధి లిఖించె
బ్రహ్మ నీవె పరమ బ్రహ్మమ్ము నీవెరా
శ్రీని వాస సాయి ! శిరిడి రాజ !

ఆ . వె . వరలు దేహమెల్ల వాగర్ధ విభవమ్ము
భావ సంపదల ప్రభావ మయము
ఎరుక రూపు దాల్చు పర శారదే నీవు
శ్రీని వాస సాయి ! శిరిడి రాజ !

ఆ . వె. రామ నామ మధుర రస ధార సేవనా
నంద మహిమ లెన్న నాతరంబె
సాయి రాము డనగ సర్వోన్నతుడ వీవె
శ్రీని వాస సాయి ! శిరిడి రాజ !

కం . శ్రీ రాము పత్ని , జనకజ ,
గారాముల భూమి పుత్రి , కమనీయ ,దయా
వారాశి , సీత నీవయి
కారుణ్య రసాబ్ధి దేల్చి కావర సాయీ !

కం. శ్రీరాము బంటు , అంజని
గారాముల కూర్మి సుతుడు , కరుణాంబుధి , మా
కారాధ్యు డైన మారుతి
నీరూపున గాంచు వరము నియ్యర సాయీ !

కం . పూర్వాద్రి రూప ! పశ్చిమ
పర్వత రూపాయ ! తే నమామి – యటంచున్
సర్వేశుడవగు దినకరు
సర్వోన్నత మూర్తి ! నీకు సన్నుతి సాయీ !

ఆ.వె. తివిరి భూజనులకు దేదీప్య మానమై
వెలుగునిచ్చి బ్రోచు వేద వేద్య !
తిమిర సంహరణకు దీప్తి నీవేనురా !
శ్రీని వాస సాయి ! శిరిడి రాజ !

ఆ.వె. చలన రధము నీవు సారధి యును నీవు
కొదమ గుర్రములును రధియు నీవు
చరమ పధము నీవు చైతన్యమే నీవు
శ్రీని వాస సాయి ! శిరిడిరాజ !

ఆ.వె. మదిని నిన్ను బెట్టి మొదలిడి నట్టి యే
కార్య మైన సఫల కారియగును
యింత కన్న జనులు యేమి కోరేరు రా
శ్రీని వాస సాయి ! శిరిడి రాజ !

--- వెంకట రాజా రావు . లక్కాకుల

శ్రీ సాయి నాధుని' ఏకాదశ సూత్రాలు '

2010-11-05T00:57:00.001+05:30

శ్రీసాయి నాధుని " ఏకా దశ సూత్రాలు "

ఆ . వె .శిరిడి జేరు టెల్ల సిరులకు మార్గమ్ము
సర్వ దు:ఖ హరము సర్వ శుభము
నీదు దర్శనమ్ము నిత్య కళ్యాణమ్ము
శ్రీనివాస సాయి ! శిరిడి రాజ !

ఆ.వె తనర నెవరి కైన ద్వారకా మాయిని
జేరి నంత శాంతి చేరు వగును
అరయ నార్తు డైన నిరుపేద కైనను
శ్రీని వాస సాయి !శిరిడ రాజ !

ఆ . వె .పరమ పురుష ! నీవు భౌతిక దేహమ్ము
వీడి వర సమాధి కూడి ఉన్న
నాడు సైత మవని నప్రమత్తుండవే
శ్రీనివాస సాయి ! శిరిడి రాజ !

ఆ . వె .నీదు భక్త జనుల నిత్య రక్షణ భార
మొనసి వర సమాధి ముఖమునుండె
మోయు చుంటి వెంత మోదమ్ము రా నీకు
శ్రీని వాస సాయి ! శిరిడి రాజ !

ఆ .వె .శ్రీ సమాధి జేరి చేయెత్తి పిలిచిన
పలికి మాటలాడు ప్రభుడ వీవు
శ్రీ సమాధినుండి చేయెత్తి దీవించు
శ్రీనివాస సాయి ! శిరిడి రాజ !

కం . నిన్నాశ్ర యించు వారిని
పన్నుగ నిను శరణు జొచ్చు భక్తజనుల నా
పన్నుడి వై రక్షించు ట
యెన్నగ నీ బాధ్యత యని యెంతువు సాయీ !

కం . నీయందు దృష్టి నిలుపుచు
పాయకనినుకొలుచు నట్టి భక్త జనుల పై
శ్రీయుత నీకటాక్ష శ్రీ ల
మేయము గా బరపుచుందు మేలుర సాయీ !

ఆ . వె.సత్య మెరుగ లేక సంసార బంధాల
జిక్కి బాధలొందు జీవజనుల
బరువు మోయ నీవు ప్ర త్య క్ష మౌదువు
శ్రీనివాస సాయి ! శిరిడి రాజ !

ఆ . వె .ఎవరు గాని నిన్ను యెద నిండ భావించి
నీసహాయము కొర కాస పడిన
తక్షణాన నీవు తగ నాదు కొందువు
శ్రీనివాస సాయి ! శిరిడి రాజ !

కం . శ్రీ భాగ్య నిధులు గూడుచు
నీ భక్తుల గృహములెల్ల నిండారును నీ
యే భక్తుని గృహ మైనను
శోభనమే – లేమి చొరదు శుభకర సాయీ !

ఆ . వె .సర్వ కార్య ధర్మ నిర్వహణ లన్నియు
శ్రీసమాధినుండె జేతు ననుచు
మాట ఇచ్చి మమ్ము మన్నించినావురా
శ్రీ నివాస సాయి ! శిరిడి రాజ !

తెలుగు పద్య మెంత టేస్టురా ! రుచి చూడు

2010-10-27T23:03:00.001+05:30

తెలుగు పద్య మెంత టేస్టు రా ! రుచి చూడు

నెల్లూరు సన్నబియ్యము
జెల్ల పులస రాజమండ్రి చేపల పులుసున్
చల్లని మంజీర నీళ్లు
చెల్లును పద్యపు రుచికర చెలువము తోడన్
*****
తెలుగు పద్యమెంత టేస్టు రా ! రుచి చూడు
చేప పులుసు కంటె , చెలిమి కంటె ,
మల్లె విరుల కంటె , మనసైన పని కంటె
భాగ్య నగరి లోని బ్రతుకు కంటె
*****
పుట్టిల్లు తెలంగాణా
మెట్టిన పురి సింహ పురము మిగిలిన చోట్లన్
పట్టము గట్టిరి తెలుగులు
దిట్టగదా ! తెలుగు పద్య ధీర కవితలో
*****
తెలుగు పద్య సఖికి తిక్కన్న నేర్పించె
అచ్చమైన రాజ హంస నడలు
మాట తీరు మంచి మర్యాద నేర్పిరి
వేమన , గురజాడ వివిధ గతుల
*****
తెలుగు సొంతమైన తేట గీతులు నేర్చె
నాట వెలదు లందు నాట్య మాడె
కందమందు కనుల విందులు సమకూర్చె
తెలుగు పద్య మౌర ! తెలుగు జాణ

విద్యా సదుపాయాల కల్పన లో ప్రభుత్వ బాధ్యతలు

2010-10-26T22:03:00.001+05:30

విద్యా సదుపాయాల కల్పన లో ప్రభుత్వాల బాధ్యత

విద్యా సదుపాయాల కల్పనలో ప్రభుత్వాల బాధ్యత
గణనీయమైన ప్రాధాన్యత సంత రించు కొని ఉంది . జాతీయాదాయం లో అధిక శాతం విద్యా సదుపాయాల
కోసంఖర్చు చేసే ప్రభుత్వాలు విజ్ఞ త గల ప్రభుత్వాలు .
విద్యా వనరులు ఎక్కువగా ఉన్న దేశాల లోని ప్రజలు ఎక్కువ శాతం
విద్యా వంతులౌ తారు . విద్యా వంతులున్న సమాజం లోని ప్రజలు తమ సమస్య లకు
తామే చక్కని పరిష్కారాలు చూసుకో గల్గుతారు . అలాంటి దేశాలు అభి వృధ్ధి
పధంలో దూసుకు పోతాయి . ఆ దేశాల లోని ప్రభుత్వాలకు అవినీతి , ఆశ్రిత పక్ష
పాతం , లంచగొండితనాల మీద పోరాడ వలసిన అవసరం ఉండదు . అక్కడ ఉగ్రవాదం ,
వేర్పాటువాదం , హత్యలు , దోపిడీలు, అంటురోగాల వ్యాప్తి – అనే సమస్య
లుండవు . ప్రభుత్వాలు సజావుగా నడుస్తాయి . వ్యవసాయ , పారిశ్రామిక
ఉత్పత్తులు పెరుగు తాయి. జాతీయాదాయం ఇబ్బడి ముబ్బడిగా పెరుగు తుంది .
ఇదంతా విద్యవల్ల ఏర్పడే బహుళ ప్రయోజనం .
మరి ఈ ప్రయోజనాన్ని ప్రభుత్వాలు ఎంతవరకు గుర్తిస్తున్నాయి
. " విద్యాశాఖ పద్దు క్రింద ఇన్ని కోట్లు ఖర్చు చేస్తున్నాం . ఖర్చు తప్ప
ఈశాఖ లో ఆదాయం కంపించడం లేదు " – అని గతంలో ఒక మంత్రి మహోదయులు
సెలవిచ్చారంటే మన ప్రభుత్వాలను నడిపే ప్రబుధ్ధులు ఎంతటి విద్యాసక్తి
గలవారో , వారిలోగల ప్రజాసేవాభావం ఏపాటిదో , ఎంత తల్లకిందులుగా
కార్యమగ్నమై ఉందో కీర్తించ వలసిందే .
దేశ ప్రజలంతా విద్యా వంతులైతే డబ్బు తీసుకొని ఓటెయ్యరు
కదా . సారా పొట్లాలనూ , బిర్యానీ పొట్లాలనూ దరి దాపుల్లోకి రానియ్యరు కదా
. విద్యా వంతు లైన ప్రజల పై ప్రలోభాలు పనిచెయ్యవు . వారికేమి కావాలో చేయ
గల్గినప్రభుత్వాలనే నిక్కచ్చిగా ఎన్నుకొంటారు . రౌడీ రాజ కీయాలకూ , గూండా
ప్రభుత్వాలకూ చెల్లు చీటీ పడుతుంది మరి .
నూటికినూరుశాతం విద్యా వంత మైన సమాజం ఏర్పడడానికి ప్రభుత్వ పరంగా
ఏమేమి చేయాలి ?
కనీసం ఇంటర్ మీడియట్ స్థాయి వరకు ఒకే ఒక ప్రభుత్వ సెక్టార్ లోనే
విద్యాలయాలు నిర్వహింప బడాలి . విద్యాలయాలు రెసిడెన్షియల్ విధానంలో సకల
సదుపాయాలు కల్గిన " ఎడ్యుకేషనల్ కాంప్లెక్సులు " గా తీర్చి దిద్ద బడాలి .
అంటే పిల్లవాడు నర్సరీ లో " ఎడ్యుకేషనల్ కాంప్లెక్సులో
"అడుగుపెడితే ఇక ఇంటితో , తల్లి దండ్రు ల తో సంబంధం లేకుండా – అక్కడే
పెరిగి పెద్దవాడై విద్యాబుధ్ధులతో ఇంటర్ పూర్తిచేసుకొని మంచి మూర్తిమత్వం
రూపు దిద్దుకొని ప్రయోజకుడై బయటి ప్రపంచములోకి రావాలి. దీని కోసం
తల్లిదండ్రులనుండి ఒక్కరూపాయి కూడా వసూలుచేయరాదు , పేద ధనిక తేడాలుందరాదు
. పెద్ద పంచాయితీ లైతే ఒకటి , చిన్న పంచాయితీలు రెండు మూడింటికి కలిపి
ఒకటి చొప్పున – జనాభా ప్రాతి పదికన – ఏర్పాటుచేయ వచ్చు . ఖర్చు
విషయానికి వస్తే విద్యా శాఖలో ఒక్కో ఊళ్లో – మెయిన్ స్కూలు, హెచ్ సి, జి
సి, నాన్ ఫార్మల్, హైస్కూలు, ఆర్ బీ సీ, ఎయిడెడ్, ఇంకా ఇంకా అనేకానేక
దండుగ మారి దుకాణాలన్నీమూసేసి ఆనిధులను విని యోగించవచ్చు . అదేవిధంగా
సాంఘిక సంక్షేమ , గిరిజన సంక్షేమ మొదలైన అవినీతిమయ హాస్టల్ల అవసరం ఉండదు
. ఇప్పుడు నిర్వహిస్తున్న రెసిడెన్షియల్ విద్యాలయాల అవసరంలేదు , ఇలా
విద్యా శాఖ నంతా ఒక కొలిక్కితెచ్చి ప్రభుత్వాలు పిల్లల నందర్నీ దత్తత
తీసుకొని ఇంటర్ వరకూ చదివించే బాధ్యత తీసుకొంటే – అటు తర్వాత ఏర్పడ బోయే
సమాజాన్ని ఊహించుకొంటే ఎంత ఆనందం కల్గుతుందో గదా !

పేదల పిల్లలలో విద్యాసక్తత పెంచడానికి తగిన మెకానిజం లేదు

2010-10-21T12:14:00.001+05:30

విద్యార్ధులను విద్యాసక్తులను చేయడానికి తగిన మెకానిజం లేదు
ఉన్న వాళ్ల పిల్లలు – వాళ్ల తల్లి దండ్రులు విద్యా వంతులు కావడం వల్ల
సహజం గా వాళ్ల లో విద్యాసక్తత ఏర్పడి ఉంటుంది . ఆ కుటుంబాలలో తదనుగుణమైన
పరిస్థితులూ ఆ వాతావరణమూ ఉంటుంది . వాళ్లు చది వే పాఠశాలలలోని
సహాధ్యాయులుకూడా విద్యాసక్తత గల కుటుంబాల నుండి వచ్చిన వారైనందువల్ల
వాళ్ల తో పోటీ పడే స్థాయి ఏర్పడి ఉంటుంది . డబ్బు ఖర్చు చేసి చదివించే
ధనవంతుల బిడ్డలవడంవల్ల వాళ్లు చదివే కార్పోరేట్ విద్యా సంస్థ లో
విద్యాసక్తత పెంచే అనేక ఆధునిక వసతులుంటాయి .
వీటన్నికంటే బాల్యంనుంచే తల్లి దండ్రులు
తమ పిల్లలకు ఉన్నతస్ఠితులు అందుకోవాలనే సంకల్పాలను గట్టిగా ఏర్పరచి
ఉంటారు . సదరు సంకల్పాలకు అనుగుణంగా ఆయా ఊ హలలో విద్యాసక్తతలు
ఏర్పరచుకొంటారు . ర్యాంకులు సాధి6చి తదనురూప ఉన్నతస్థితులు అందుకొంటారు .
గ్రామీణ పేదల పిల్లల పరిస్థితి ఇందుకు పూర్తిగా భిన్నంగా ఉంటుంది .
తల్లి దండ్రులు నిరక్ష రాశ్యులు . తమ పిల్లల ఉన్నత స్థితుల పై కోరికలు
అంతర్లీనంగా ఉండవచ్చునేమోగాని ఆ స్థితి గతులు తమకు లేనే లేవనే
నైరాస్యం కోరికలకు అడ్డుకట్ట వేస్తుంది . నిరక్ష రాశ్యులు కావడం వల్ల
తమకేలేని విద్యాసక్తి ని తమపిల్లల కేర్పరచ లేరు .
ఈ పేదపిల్లలుచదివే ప్రభుత్వ పాఠ శాలలు
- అందులోని అర గొర వసతులు వీల్లలో విద్యాసక్తత ఏర్పరిచే స్థాయిలో
లేవని కరాఖండిగా చెప్పవచ్చు . ఇందుకు బాధ్యతవహించ డానికి సుతరామూ
ఇష్టపడని అందులోపనిచేసే ఉపాధ్యాయ సత్తములకు వీళ్లపట్ల అంతగొప్ప అనురాగా
లుంటాయని అనుకోవడం అత్యాశే అవుతుంది .
కాబట్టి పేదల పిల్లలను పాఠశాలలో
చేర్పించ డానికి గాని , వారికి విద్యాసక్తులేర్పరచడానికిగానీ , వారు
పాఠశాలలలో కొనసాగడానికిగానీ , భవిష్యత్ లో వారికి ఉన్నత స్థితు
లేర్పడడానికి అవకాశా లేర్పరచడంలో గానీ తప్పని సరిగా తగిన మెకానిజం
ఉండి తీరాలి . అప్పుడే సమాజం లో బడుగుల ధనికుల మధ్య అంతరాలు కాస్తైనా
తగ్గి శాంతియుత వాతావరణం ఏర్పడే అవకాశం ఉంది .

ప్రభుత్వ పాఠశాలల నిర్వీర్యానికి తల్లి దండ్రులు కూడా ఒక కారణమే

2010-10-20T15:02:00.000+05:30

తల్లి దండ్రుల నిరక్షరాశ్యత – నిరాసక్తత
ఇన్నేండ్ల స్వతంత్ర భారతావని లో గ్రామీణ ప్రాంతాలు
కనీసం నలభై శాతం అక్షరాశ్యతకు కూడా నోచు కో లేదు . ప్రముఖకారణం పేదరికం
. నిరంతర జీవన పోరాటం . రెక్కాడితే గాని డొక్కాడని పరిస్థితి . తాగుడు
మొదలైన దురల వాట్లు . అపరి శుభ్ర పరిస్తితులు . అనారోగ్యాలు .
ఈ దుర్భర పరిస్థితుల నుండి తమను తాము ఉధ్ధరించు
కొంటే తప్ప –బయట పడ లేని దుస్థితి .
అనాదిగా ఇటువంటి దుస్థితి లోనేపడి అలవాటుపడి బయటపడడానికి చేత కాని
అజ్ణానం ముసురుకొన్న గ్రామీణ భారతా న్ని చైతన్యం చేయడానికి చదువొక్కటే
మార్గం .
నిద్ర లేవంగా నే పిల్లలకు ఇంత కలో గంజో పడేసి
కూలి నాలి కెల్లి సాయంత్రానికి ఇల్లు చేరుకొనే గ్రామీణ నిరు పేదలకు తమ
పిల్లలు బడికెల్తున్నారో బజారున పడుతున్నారో – చదువుతున్నారో బలాదూర్
తిరుగు తున్నారో తెలుసుకొనే తీరికెక్కడిది . ఓపికెక్కడిది .
అసలు వీళ్లకు తమపిల్లల విద్యాబుద్దుల పట్ల
నిరాసక్తత సహజం గానే ఉంది . పిల్లలుకూడా దారి తప్పి , వీళ్ల మాట సుతరామూ
వినక పోవడమూ అచట కనిపించే సహజ వాతా వరణం . పాఠశాలలకు సక్రమంగా వెళ్లరు .
వెళ్లి నా చదువు పై గురి కుదరదు. ధ్యాస అసలే ఉ6డదు . అక్కడ వీళ్లను
పట్టించు కొనే వాళ్లస లుండరు . ప్రైమరీ తోనో ఆరేడు తరగతులతోనో
మానేస్తారు .
షరా మామూలే . కాస్త వయస్సు రాగానే
పెద్దలలాగానే కూలి నాలి . మళ్లీ అదే బ్రదుకులు
– అవే పరిస్థితులు .
మరి వాళ్ల తరపున – వాళ్ల పిల్లల తరపున వకాల్తా
పుచ్చుకొనే వాళ్లేరి . తమను తాము ఉధ్ధరించుకో లేని వీళ్లను ఉధ్ధరించే
బాధ్యత తీసుకొనే దెవ్వరు .
మరి , ఎనభై శాతం ఉన్న గ్రామీణ భారతం ఉధ్ధరింప
బడని నాడు - అది చేసాం ఇదిచేసాం – అని కాగితాలపై ప్రగతి సూచికల
గణాంకాలన నివేదికలు ప్రకటించుకొనే ఈ ప్రభుత్వాలు ఈ నగ్న సత్యాలకు
జవాబు దారీ వహించ వలసిన అవసరం లేదా ?

ప్రభుత్వపాఠశాలల నిర్వీర్యానికి కారణాలు

2010-10-19T20:42:00.001+05:30

ప్రభుత్వపాఠశాలలు నిర్వీర్యం కావడానికి ఉపాధ్యాయులుకూడా కొంతవరకూ కారణమే
ప్రభుత్వపాఠశాలలు నిర్వీర్యం కావడానికి అందులో
పనిచేస్తున్న ఉపాధ్యాయులుకూడా కొంత కారణం అనక తప్పదు . నాటి
ఉపాధ్యాయునికి నేటి ఉపాధ్యాయునికి అనేక అంశాలలో తేడా ఉన్న మాట వాస్తవం
.లక్ష్యసుధ్ధిలోగాని విద్యాబోధనలోగాని "రోల్ మోడల్"గా
మార్గదర్శకత్వంవహించడంలో గాని నేటితరం ఏ అంశంలోనూ పోల్చడానికి సాహచించ
లేము.
నాటి ఉపాధ్యాయునికి తన వృత్తిపరమైనధ్యాస తప్ప
వేరె వ్యాపకాలు లేవు . కాబట్టి మార్గ దర్శకుడిగా సమాజంచేత పూజింప బడినాడు
. అందుకే నాటి ఉపాధ్యాయుడు " గురుర్బ్రహ్మ గురుర్విష్ణు గురుర్దేవో
మహేశ్వర: " .
నేటి ఉపాధ్యాయుడికి అంతటి ఓపికా లేదు. అంతటి
తీరికా లేదు . నిర్దేశిత టీచర్ ట్రయినింగులలో , పోటీ పరీక్షలలో నెగ్గి
ఉద్యోగంలొ ప్రవేసించడంతోనే తన శక్తి యుక్తులకు ఫుల్ స్టాప్
పెట్టేస్తున్నాడు .
ట్రైనింగులో తాను నేర్చుకొన్న బోధనా పధ్ధతులు
కృత్యాలు అక్కడనేవదిలేసి వస్తున్నాడు . తరగతి గది లోకి ప్రవేసించ డానికి
ముందు సమగ్రమైన ప్రిపరేషన్ అవసరం . ఎన్నొ సమ కూర్చు కోవాలి . అందుకు ఎంతో
సమయం వెచ్చించాలి . తరగతి గది లో పాటించ వలసిన తీరు – తెన్నులు అనగా
ఆహార్యంలోగాని మాట తీరులోగాని మర్యాదలు పాటించడంలోగాని ఎంతో ఓపిక అవసరం .
విద్యార్ధులు తమ ఉపాధ్యాయుణ్ణి రోల్ మోడల్ గా భావిస్తారు .
నేటిఉపాధ్యాయుడు ఈవిషయంలో నిర్లక్షం వహిస్తున్నాడు . ఫలితంగా విద్యార్ధి
తప్పు దారిపడుతున్నాడు. అస్తవ్యస్త సమాజం దాపురిస్తూవుంది . ఈకారణంగానే
ఉపాధ్యాయ వృత్తి గురుతర బాధ్యయతలతోనిండిన – సమాజానికి బాధ్యత వహించవలసిన
వృత్తి గా భావింప బడుతూ ఉంది .
ఉపాధ్యాయులలో వృత్తిపరమైన డెడికేషన్ లేకపోవడం
, విద్యావిధానంలో అకౌంటబిలిటీ లోపించడం , వృత్తి లో కొలమానాలు
నిర్దేశించకపోవడం , శాఖాపరమైన తనిఖీలు తూతూమంత్రంగా నిర్వహించ బడడం ,
ఇక ముఖ్యంగా ఉపాధ్యాయులు ఇతర ఆదాయ వనరులను విరివిగా నిర్వహిస్తూ
ఈవృత్తిని ఉపవృత్తిగా భావించడం చూస్తూవుంటే నేటిప్రభుత్వ పాఠశాలల
నిర్వీర్యానికి ఉపాధ్యాయులుకూడా కొంత కారణంగా భావించడంలో తప్పులేదు.
ప్రభుత్వ ఉపాధ్యాయులలో ఏ ఒక్కరూ తమ బిడ్డలను
ప్రభుత్వ పాఠశాలలలో చదివించడానికిఇష్టపడడం లేదంటే ప్రభుత్వ పాఠశాలలు
అందిస్తున్న విద్య పై తమకు నమ్మకం లేనట్లే కదా ! అంటే తమపై తమకు
నమ్మకంలేనట్లే కదా !!

విద్యలో నేటి బోధన-అభ్యసన స్థితిగతులు

2010-10-19T12:54:00.001+05:30

ప్రియమిత్రులారా!

వెంకటరాజారావు.లక్కాకులఅనబడే నేనుముప్పైయెనిమిదేండ్లుగవర్ణమెంటుహైస్కూల్లలోఉపాధ్యాయుడిగా హెడ్మాష్టరుగాపనిచేసిరిటైరైనాను.ఈసుధీర్ఘమైనకాలగమనంలోవృత్తిపరమైన అపారఅనుభవంతోబోధనాభ్యసనాలలోప్రస్తుతస్థితిగతులుప్రమాణాలు అనేఅంశంపైస్థూలంగానాకుతెలిసినఅంశలపైచర్చావేదికఏర్పాటుచేసిసమాజాజికితమద్వారాఒకచక్కనిదిశానిర్దేశంచేయాలని ఆశిస్తున్నానుబోధనాభ్యసనాలలో ప్రస్తుత స్థితిగతులు-ప్రమాణాలు ఒకప్పుడువిద్యాభ్యసనానికిప్రభుత్వపాఠశాలలేశర ణ్యం.సామాజికఅంతరాలహెచ్చుతగ్గులకుఅస్కారంలేనిచదువులుండేవి .ధనవంతుడికొడుకైనాపేదవాడికొడుకైనాఒకేపాఠ శాలలోచదివేవారు.దీనివల్లఅంతరాలలోకూడాసఖ్యత ఏ ర్పడి సామాజికసమతుల్యతకుదోహదంకలిగేదిప్రస్తుతవిద్యలో ప్రైవేటు భాగస్వామ్యంవిసరించి దరిమలా ధన వంతులస్కూల్లూపేదలస్కూల్లూ(ప్రభుత్వపాఠశాలలు)ఏర్పడ్డాయి . ధ నికుడుధనాధికుడుగానూపేదనిరుపేదగానూస్థిరంఅయ్యేపరిస్థితులుఏర్పడ్డాయి.కేవలంపదిశాతంప్రైవేటుపాఠశాలలుమాత్రమేఉన్నతప్రమాణాలు పాటస్తున్నాయి .మిగతా తొంభైశాతం విద్యావ్యాపారాలుచేస్తూ అక్రమమాఅర్గాలలో అవాంఛితపోటీసృస్టిస్తున్నా యి . ప్రభుత్వ పాఠశాలలుఎన్రోల్మెంటు పడిపోయి కొనసాగించాల్నావద్దా అనేస్థితికి చేరుకొన్నాయిదీనికికారణంగా1 . ప్రభుత్వాల నిర్లక్ష్యం 2.ఉపాధ్యాయుల బాధ్యతారాహిత్యం3.తల్లిదండ్రులనిరాసక్తత నిరక్షరాస్యత4.విద్యార్ధులను

విద్యాసక్తులనుచేసేమెకానిజంలేకపోవడంబాధ్యతవహించవలసినవార ంతాని ర్లక్ష్యంవహిస్తున్నపాపానికిచిన్నారులుచదువుకు స్వస్థిచిప్పిశిక్షననుభవిస్తున్నారువివిధతరగతుల స్థాయులలోఇరవైశాతంకూడాప్రమాన్ణాలుసాధించినవారులేరంటేమనపాఠశాలలస్థాయిఏపాటిదోఊహించవప్రతివారూ బాధ్యతలనుంచితప్పించుకొనపైపెచ్చుప్రమాణాలగ్రాఫులుపెంచుకోవడానికిఅక్రమమార్గాలనుప్రోత్సహించడంచూస్తుంటే విద్యలొ విపరీతధోరణులు ఎంతదూరంవెళ్తాయో! !