సుజన సృజన

సుజన సృజన
ఓం నమో సాయి నాధాయ

3, జులై 2012, మంగళవారం

గురు పూర్ణిమ సందర్భంగా - శ్రీసాయినాధుని ఏకాదశ సూత్రాలు


శిరిడి జేరు టెల్ల సిరులకు మార్గమ్ము

సర్వ దు:ఖ హరము సర్వ శుభము

నీదు దర్శనమ్ము నిత్య కళ్యాణమ్ము

శ్రీనివాస సాయి ! శిరిడి రాజ !


 తనర నెవరి కైన ద్వారకా మాయిని

జేరి నంత శాంతి చేరు వగును

అరయ నార్తు డైన నిరుపేద కైనను

శ్రీని వాస సాయి !శిరిడ రాజ !



పరమ పురుష ! నీవు భౌతిక దేహమ్ము

వీడి వర సమాధి కూడి ఉన్న

నాడు సైత మవని నప్రమత్తుండవే

శ్రీనివాస సాయి ! శిరిడి రాజ !


నీదు భక్త జనుల నిత్య రక్షణ భార

మొనసి వర సమాధి ముఖమునుండె

మోయు చుంటి వెంత మోదమ్ము రా నీకు

శ్రీని వాస సాయి ! శిరిడి రాజ !


శ్రీ సమాధి జేరి చేయెత్తి పిలిచిన

పలికి మాటలాడు ప్రభుడ వీవు

శ్రీ సమాధినుండి చేయెత్తి దీవించు

శ్రీనివాస సాయి ! శిరిడి రాజ !


 నిన్నాశ్ర యించు వారిని

పన్నుగ నిను శరణు జొచ్చు భక్తజనుల నా

పన్నుడి వై రక్షించు ట

నెన్నగ నీ బాధ్యత యని యెంతువు సాయీ !


 నీయందు దృష్టి నిలుపుచు

పాయక నినుకొలుచు నట్టి భక్త జనుల పై

శ్రీయుత నీకటాక్ష శ్రీ ల

మేయము గా బరపుచుందు మేలుర సాయీ !


సత్య మెరుగ లేక సంసార బంధాల

జిక్కి బాధలొందు జీవజనుల

బరువు మోయ నీవు ప్ర త్య క్ష మౌదువు

శ్రీనివాస సాయి ! శిరిడి రాజ !


ఎవరు గాని నిన్ను నెద నిండ భావించి

నీసహాయము కొర కాస పడిన

తక్షణాన నీవు తగ నాదు కొందువు

శ్రీనివాస సాయి ! శిరిడి రాజ !

 శ్రీ భాగ్య నిధులు గూడుచు

నీ భక్తుల గృహములెల్ల నిండారును నీ

యే భక్తుని గృహ మైనను

శోభనమే లేమి చొరదు శుభకర సాయీ !



సర్వ కార్య ధర్మ నిర్వహణ లన్నియు

శ్రీసమాధినుండె జేతు ననుచు

మాట ఇచ్చి మమ్ము మన్నించినావురా

శ్రీ నివాస సాయి ! శిరిడి రాజ !


6 వ్యాఖ్యలు:

  1. ఓం సాయి రాం.
    సాయిబాబ అందరినీ ఎప్పుడూ చల్లగానే చూస్తారు.ఆయన మహిమలు అనిర్వచనీయం.
    సాయీ అంటే ఒయీ అని పలికే ఒకే ఒక్క దైవం.
    ఇవి పంచుకున్నందుకు బోలేడు ధన్యవాదాలండీ..!!
    గురుపౌర్ణమి శుభాకాంక్షలు

    ప్రత్యుత్తరంతొలగించు
  2. నడుస్తున్న కాలంలో పిలిస్తే పలికే దైవంగా , గురువుగా కీర్తింప బడుచున్న శిరిడీ సాయినాధుడు బోధించిన ఏకాదశ సూత్రాలు నివేదన పద్యరూపంగా వ్రాసిన టపాకు సభక్తికంగా స్పందించి నందుకు ధన్యవాదములు సీతగారూ ,
    గురుపౌర్ణమి శుభాకాంక్షలు .

    ప్రత్యుత్తరంతొలగించు
  3. రాజారావు గారూ!
    చాలా బాగున్నాయి పద్య సౌరభాలు...
    ఆలస్యమైనా...
    గురుతుల్యులైన మీకు గురుపూర్ణిమ శుభాభినందనలు....
    మీ ఆశీస్సులు కోరుతూ...
    @శ్రీ

    ప్రత్యుత్తరంతొలగించు
  4. శ్రీనివాస్ గారూ ,
    సంతోషం . సదా శ్రీ సాయి నాధుని ఆశీస్సులు . ధన్యవాదములు .

    ప్రత్యుత్తరంతొలగించు
  5. శ్రీనివాస సాయి అని ఎందుకు అంటారండి? చెప్పగలరా?

    ప్రత్యుత్తరంతొలగించు
  6. జలతారు వెన్నెల గారూ ,
    ఇందులో ప్రత్యేకించి ఏమీ లేదండి . మా యిల వేల్పు శ్రీనివాసుడు . సాయిబాబా బోధనలు , ప్రేమతత్త్వం . జీవనవిధానం - అంటే చాలా యిష్టం . నేను వ్రాసి ప్రచురించిన 'శ్రీనివాస సాయి! శిరిడి రాజ !'అనే నివేదన రూప శతకం లోని వీ పద్యాలు . శతకం లోని ప్రతి పద్యం చివరిపాదాన్ని మకుటం అంటారు . మకుటంలో రచయిత తన పేరును కూడా ఒక ముద్రగా సూచిస్తాడు . అన్నీ కలగలపి సదరు శతకంలో మకుటంగా' శ్రీనివాస సాయి !శిరిడి రాజ ! 'అని పేర్కొనడం జరిగింది . ధన్యవాదములు .

    ప్రత్యుత్తరంతొలగించు