అందుకో ఆదుకో

 గీత రచయిత : వెంకట రాజారావు లక్కాకుల

మాయమ్మా మమ్మేలు పోలేరు తల్లీ

--------------------------------------------

అమ్మా ఓ యమ్మా మాయమ్మా మమ్మేలు తల్లీ

అద్భుతాలు సృష్టించే అమ్మా  మా పోలేరమ్మా

అందుకో ఆదుకో అడు గడుగున లలితమ్మా

రత్న ఖచిత వేదికపై రమణీయ రంగముపై

ఇంద్రభవన మందిరమం దిందుశోభ నందితవై

కోటిసూర్య ప్రభల వెలుగు కళ్యాణీ పరమేశ్వరీ

అమ్మా ఓ యమ్మా మాయమ్మా మమ్మేలు తల్లీ

అద్భుతాలు సృష్టించే అమ్మా  మా పోలేరమ్మా

అందుకో ఆదుకో అడు గడుగున లలితమ్మా

ఖల జనముల పీచ మణచ కాళికవై కాపాలికవై

ఇల సుజనుల రక్షింపగ  ఈశ్వర హృదయేందిరవై

భువనావనపరంజ్యోతి దుర్గా శైలసుతా శ్రీలలితా 

అమ్మా ఓ యమ్మా మాయమ్మా మమ్మేలు తల్లీ

అద్భుతాలు సృష్టించే అమ్మా  మా పోలేరమ్మా

అందుకో ఆదుకో అడు గడుగున లలితమ్మా

పసుపూ కుంకుమ చందన పరిచర్చిత శ్రీవపుషా

సతత హరిత శుభ ప్రాంగణ సంపత్తరు  విభవా

ఆలయ గోపుర విలాస హాళుల ఆనంద నిలయ

అమ్మా ఓ యమ్మా మాయమ్మా మమ్మేలు తల్లీ

అద్భుతాలు సృష్టించే అమ్మా  మా పోలేరమ్మా

అందుకో ఆదుకో అడు గడుగున లలితమ్మా

తెలుగు భాష

 గీత రచయిత : వెంకట రాజారావు లక్కాకుల

తెలుగులో మాటాడు
తెలుగు లోనె మాటాడు
తెలుగు వాళ్ళందరితో
తెలుగు తెలిసిన వారందరితో
తెలుగు లోనె మాటాడు               
 
ముగ్థ మోహన రూపు
మురిపాల తెలుగు లిపి
ముత్యాల సిరి పేర్చు
ముగ్గులను తలపించు     

తెలుగులో మాటాడు
తెలుగు లోనె మాటాడు
తెలుగు వాళ్ళందరితో
తెలుగు తెలిసిన వారందరితో
తెలుగు లోనె మాటాడు        
 
మురళీ రవం లాంటి
మోహన గానాలు పల్కు
 శబ్ద జాల మొలికించే
 సంగీతపు సరిగమ సిరి      

            
తెలుగులో మాటాడు
తెలుగు లోనె మాటాడు
తెలుగు వాళ్ళందరితో
తెలుగు తెలిసిన వారందరితో
తెలుగు లోనె మాటాడు      

దిగంతాల నజంతాల
పద సంపద పొదువు కొన్న
నుడి కారపు సొంపులు గల
మడి మాన్యపు టక్షరాల     

తెలుగులో మాటాడు
తెలుగు లోనె మాటాడు
తెలుగు వాళ్ళందరితో
తెలుగు తెలిసిన వారందరితో
తెలుగు లోనె మాటాడు      
 
తెలుగు తోట పూ మొక్కకు
సంస్కృత లత లంటు గట్టి
తెలుగు దనపు నీరు పెట్టి
తెలుగు పూలు పూయించిన     

తెలుగులో మాటాడు
తెలుగు లోనె మాటాడు
తెలుగు వాళ్ళందరితో
తెలుగు తెలిసిన వారందరితో
తెలుగు లోనె మాటాడు        
 
మాతృ భాష మమకారం
మంచి నీటి చెలిమ విథం
పర భాషల వ్యామోహం
ఎండ మావితో స్నేహ పథం     

తెలుగులో మాటాడు
తెలుగు లోనె మాటాడు
తెలుగు వాళ్ళందరితో
తెలుగు తెలిసిన వారందరితో
తెలుగు లోనె మాటాడు      

మనదేశం మనగీతం

 గీత రచయిత : వెంకట రాజారావు లక్కాకుల

మనదేశం – మనగీతం

-----------------------------

మనదేశం మనగీతం   మహనీయత చాటుదాం

అడుగడుగున జాతీయత   అంతరాన నిలుపుదాం           

జన గణ మన పాడుదాం   జనయిత్రిని పొగుడుదాం

వందే మాతర మందాం    వందనా లర్పిద్దాం        

         మనదేశం మనగీతం   మహనీయత చాటుదాం

అడుగడుగున జాతీయత   అంతరాన నిలుపుదాం   

మహనీయుల జీవితాల   కథలు చదువుదాం

మనసంతా దేశ భక్తి    మకరందం నింపుదాం        

         మనదేశం మనగీతం   మహనీయత చాటుదాం

అడుగడుగున జాతీయత   అంతరాన నిలుపుదాం   

పౌరసత్వ బాధ్యతలను   పక్కాగా పాటిద్దాం

గత కాలం కన్న  మించు   ఘనత  నిలుపుదాం     

మనదేశం మనగీతం   మహనీయత చాటుదాం

అడుగడుగున జాతీయత   అంతరాన నిలుపుదాం   

మనదేశం మనగీతం   మహనీయత చాటుదాం

అడుగడుగున జాతీయత   అంతరాన నిలుపుదాం   

 

అన్న దమ్ములకు మల్లే   హుందాగా జీవిద్దాం

ప్రపంచాన భరత జాతి   ప్రతిష్ఠ పెంచుదాం                     

మనదేశం మనగీతం   మహనీయత చాటుదాం

అడుగడుగున జాతీయత   అంతరాన నిలుపుదాం   

ఆమె పేరు భరత మాత

 గీత రచయిత : వెంకట రాజారావు లక్కాకుల

ఆమె పేరు భరతమాత

ఆమే నా జనయిత్రి

అద్భుత భారత ధరిత్రి

ఆమె ఘనత హిమవన్నగ

ఉత్తుంగ గిరీశ శృంగ

ఆమె కీర్తి నిర్జర ఝరి

ధవళ ఫేన దీప్తికి సరి

ఆమె పేరు భరతమాత

ఆమే నా జనయిత్రి

అద్భుత భారత ధరిత్రి

ఆమె వాక్కు వేదోపనిష

దద్భుత సాహిత్య నికష

ఆమె యునికి ఉదధి త్రయ

సంవలయిత రత్న గర్భ

ఆమె పేరు భరతమాత

ఆమే నా జనయిత్రి

అద్భుత భారత ధరిత్రి

భరతావని జనియించిన

ప్రతి పౌరుని తనువంతా

ఆమె తలపు అణు వణువున

ఆనందపు పులకింత

ఆమె పేరు భరతమాత

ఆమే నా జనయిత్రి

అద్భుత భారత ధరిత్రి

నీవు లేని చోటు .....

 గీత రచయిత : వెంకట రాజారావు లక్కాకుల

నీవు లేనీ చోటు  నింగిలో నేలలో

పరికింప లేదురా  ప్రభు సాయి నాధా     

ఇలలోన కలలోన  నెలవు నెలవులలోన

పలుకులో పాటలో  పరమాత్మవూ నీవె

పుడమిపై మొలకెత్తి  పొలుపుగా వికసించు

రంగు రంగుల పూల రంగులోనూ నీవె

పిందెలై కాయలై   ప్రియమార పండిన

మధుర ఫలముల లోని మధువులూ నీవె

నీవు లేనీ చోటు  నింగిలో నేలలో

పరికింప లేదురా  ప్రభు సాయి నాధా     

ఇలలోన కలలోన  నెలవు నెలవులలోన

పలుకులో పాటలో పరమాత్మవూ నీవె

జల జలా ప్రవహించు జలరాశియూ నీవె

తళ తళా మెరయు  గిరి శిఖరమూ నీవె

వెలుగులు విరజిమ్ము  విశ్వాంతరాళాన

వెలుగువై నీవుండ  వెరపేమిరా మాకు

నీవు లేనీ చోటు  నింగిలో నేలలో

పరికింప లేదురా  ప్రభు సాయి నాధా     

ఇలలోన కలలోన  నెలవు నెలవులలోన

పలుకులో పాటలో  పరమాత్మవూ నీవె

దారి నీవేయని దరిజేరినామురా

దారి జూపించి మా  దిక్కుగా నిలుమురా

వేవేల సంస్తుతుల  వినుతించి పొగిడేము

పరవశంబున కొల్చి  పాటలను పాడేము

నీవు లేనీ చోటు నింగిలో నేలలో

పరికింప లేదురా  ప్రభు సాయి నాధా     

ఇలలోన కలలోన  నెలవు నెలవులలోన

పలుకులో పాటలో పరమాత్మవూ నీవె

ఏ యుగమున గాని

 గీత రచయిత : వెంకట రాజారావు లక్కాకుల

వెంకయ్య స్వామి

----------------------

ఏ యుగమున గాని  ఇంత స్వచ్చతముని

విని యెరుగము తండ్రీ  వెంకయ్య స్వామీ

వశ్యవాక్కు లనుచు   వచియింతురే గాని

నిన్ను గన్నంతనే   నిజమనుచు తెలిసెను

ఏ యుగమున గాని   ఇంత స్వచ్చతముని

విని యెరుగము తండ్రీ   వెంకయ్య స్వామీ

పసుల మనుషుల రోగ   బాధలను తప్పింప

నిన్నంపె పరమాత్మ    నీల మోహన రూప

ఏ యుగమున గాని   ఇంత స్వచ్చతముని

విని యెరుగము తండ్రీ   వెంకయ్య స్వామీ

జలయఙ్ఞములు జేసి   జనములకు మాతండ్రీ

వ్రేలిముద్రలను వేసి   విల్లు వ్రాస్తివి స్వామీ

ఏ యుగమున గాని   ఇంత స్వచ్చతముని

విని యెరుగము తండ్రీ    వెంకయ్య స్వామీ

గొలగమూడి నివాస   గోవింద పరమాత్మ

ఆది నారాయణ రూప   ఆదుకో వెంకయ్య

ఏ యుగమున గాని   ఇంత స్వచ్చతముని

విని యెరుగము తండ్రీ  వెంకయ్య స్వామీ

ప్రణుతింతు ప్రణుతింతు

 గీత రచయిత: వెంకట రాజారావు లక్కాకుల

ప్రణుతింతు ప్రణుతింతు ప్రభు సాయి నాధా

------------------------------------------------------

విని తరించితిమి నీ విమల బోధల సుధలు

ప్రణుతింతు ప్రణుతింతు ప్రభు సాయి నాధా

నిన్ను నమ్మిన వాళ్ళు నిజ జీవితాలలో

ఎదురైన కష్టాల నెదిరి గట్టెక్కుదురు   

విని తరించితిమి నీ విమల బోధల సుధలు

ప్రణుతింతు ప్రణుతింతు ప్రభు సాయి నాధా

కల్మషము లేని నీ కరుణా కటాక్షాల

తడిసిన యెల్లరు తరియించ గలరు    

విని తరించితిమి నీ విమల బోధల సుధలు

ప్రణుతింతు ప్రణుతింతు ప్రభు సాయి నాధా

చేతులు జోడించి నీ చెంత జేరిన వాళ్ళ

భద్రతల బాధ్యతలు భరియింతువీవు    

 విని తరించితిమి నీ విమల బోధల సుధలు

ప్రణుతింతు ప్రణుతింతు ప్రభు సాయి నాధా

మది మందిరములలో నిను నిలిపి నిశ్చింత

నెమ్మది హాయిగా నిదుర వోదుమురా    

విని తరించితిమి నీ విమల బోధల సుధలు

ప్రణుతింతు ప్రణుతింతు ప్రభు సాయి నాధా

కృష్ణరారా

 గీత రచయిత : వెంకటరాజారావు లక్కాకుల

కృష్ణ రారా చిన్నికృష్ణ రారా

--------------------------------

కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

స్వఛ్ఛమైన మనసులన్ని  పాల సమానం

పాలు చిలికి తీయు వెన్న   ప్రేమ సమానం

ప్రేమ వెన్న నైవేద్యం  ప్రియమని నమ్మితి కృష్ణా   

 కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

మమకారపు పిచ్చి ప్రేమ కుమ్మరించియశోదమ్మ 

తర తరాల తల్లి ప్రేమ  త్రచ్చి వెన్న తినిపించెను

కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

మనసున తనువున    తానై అణువణువున రాధమ్మ     

అనురాగపు ప్రేమ వెన్న    పెన వేయుచు తిని పించెను

కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

తమను తాము అర్పించుచు    తరుణులు గోపిక రమణులు  

తరగని ప్రేమల వెన్నలు    తరచి తరచి తినిపించిరి

కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

ఘనముగ యమునా వనమున    తినిపించిరి గోపాలురు  

అడుగడుగున నడయాడుచు    ఆడి పాడి చెలిమి వెన్న

      

కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

తెలుగుల తేనియలద్దిన    పద్య సుధల భాగ్యనిధుల

భాగవతపు భక్తి వెన్న     తినిపించెను పోతన్న         

 కృష్ణ రారా

చిన్ని కృష్ణ రారా

ప్రేమ వెన్న నైవేద్యం పెట్టినానురా

ఆరగించి వరములిచ్చి ఆదుకోరా

దివ్య పురుషులు

 గీత రచయిత : వెంకట రాజారావు లక్కాకుల

తప్పేమి దైవాన్ని దశ దిశల దర్శించగా

గొప్పదనమిది భరత ఖండమం దనాదిగా

 

అవ్యయుని రూపాన నారాథ్యులై వెల్గు

దివ్య పురుషులు లేని దిక్కొకటి గలదా 

తనర జన గణము నొక్క త్రాటిపై నడిపింప

తీరు తీరుల గలరు దివ్యప్రభావులు

తప్పేమి దైవాన్ని దశ దిశల దర్శించగా

గొప్పదనమిది భరత ఖండమం దనాదిగా

యెల్లెడల మనుజుల వెన్నంటి కాపాడు ఆ

కరుణాంతరంగు నీశ్వరుని దర్శింప

దారి జూపించు మహితాత్ము లెందరో

పంతమేటికి ఈ భాగవతుల సేవలో 

తప్పేమి దైవాన్ని దశ దిశల దర్శించగా

గొప్పదనమిది భరత ఖండమం దనాదిగా

 

అరుదైన పరమాత్మ సురుచిరమూర్తిని

అరసి కొలువందగును ఆరాధ్యులందున

ఇందిరారమణునీ హిమశైలజానాధునీ

ఇనకులేశునిగాని ఘనశ్యామునీగాని

తప్పేమి దైవాన్ని దశ దిశల దర్శించగా

గొప్పదనమిది భరత ఖండమం దనాదిగా

 

తిరుమలేశునిగాని తిరు రామానుజులగాని

సరిలేని శుభనాము  శిరిడి సాయినిగాని

సద్గురుడు వెంకయ్య స్వామి వారల గాని

పరమాత్మ రూపాన పరిపరి దర్శించగా

తప్పేమి దైవాన్ని దశ దిశల దర్శించగా

గొప్పదనమిది భరత ఖండమం దనాదిగా

శ్రీ శ్రీనివాసా శ్రీవెంకటేశా

 గీత రచయిత : వెంకట రాజారావు లక్కాకుల

శ్రీ శ్రీనివాసా  శ్రీవేంకటేశా

ఇలవేల్పు నీవయ్య  ఇందిరారమణా

కలియుగ దైవమై ఘనవైభవముతోడ

తిరుమల గిరులపై తిరముగా నిలిచావు 

నిన్ను దర్శించుటే నిజమైన భాగ్యము

శ్రీ శ్రీనివాసా  శ్రీవేంకటేశా

ఇలవేల్పు నీవయ్య  ఇందిరారమణా

దివ్య మంగళ మూర్తి దేదీప్యమానమై

భక్త కోటికి కనుల పండుగై వెలిశావు 

నిగమాలు కీర్తించె నీలమోహనరూప

శ్రీ శ్రీనివాసా  శ్రీవేంకటేశా

ఇలవేల్పు నీవయ్య  ఇందిరారమణా

నిత్య కళ్యాణాలు పచ్చతోరణ ప్రభలు

అనుదినోత్సవములు అరుదైన సేవలు

కనులు చాలవు రెండు కమలాయతాక్ష

శ్రీ శ్రీనివాసా  శ్రీవేంకటేశా

ఇలవేల్పు నీవయ్య  ఇందిరారమణా

కోరిన జనులకు కొంగు బంగారమై

వరముల గుప్పించు వరదాన గుణశీల

మమ్ము రక్షింపరా మహనీయ మూర్తి

శ్రీ శ్రీనివాసా  శ్రీవేంకటేశా

ఇలవేల్పు నీవయ్య  ఇందిరారమణా

రాముడే రాజుగా రక్షగా

 గీత రచయిత :వెంకట రాజారావు లక్కాకుల

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

ఒక్కటే మాటగా ఒక్కటే శరముగా

ఒక్కసీతయెసతిగ యుగపురుషుడైనిలిచె 

దండ్రి కిచ్చిన మాట తలదాల్చి కడదాక

పడరాని యిడుముల పడియునూ విడువని

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

అన్నగా తమ్ములకు ఆదర్శమూర్తిగా

మన్ననలుపొంది యీమనుజులందరకు రావణుని చావుతో రామబాణము శక్తి రామనామము శక్తి రాజిల్లె లోకాన 

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

తొలుత శ్రీరామయని పలుకులో రాతలో

పలుకక రాయక వెలయింప రేదియు 

పల్లెలా పట్నాల ప్రతి మందిరాలలో

కడగి సీతారామ కళ్యాణములు సేయ

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

కుల్లూరు నేలతల్లికి వందనం

 

గీత రచయిత : వెంకట రాజారావు లక్కాకుల

నేల తల్లికి వందనం
కుల్లూరు నేలతల్లికి వందనం
దేశ దేశాలందు దేదీప్య మానమై
పేరైన నా తల్లి  నేలతల్లికి వందనం (నేల తల్లికి)

గల గలా పెన్నమ్మ కదలి వచ్చే నేల
తెలుగు గంగా జలం తిరిగి పారేనేల
ఊరి నల్దిక్కుల పారజూచిన గాని
శ్రీసస్య శ్యామల సిరులు గన్పడు నేల ( నేల తల్లికి )

కోటలో వైభవం కూడిమాడిన మహా
రాచరిక శౌర్యాల రాయలేలిన నేల
నిలువు పటాకత్తి సుళువుగా పనిబూని
చెలగి గుర్రపురౌతు చేయి తొడిగిన నేల ( నేల తల్లికి)

పసుపు కుంకాలతో పట్టు పుట్టములతో
తర తరాలుగ నిల్చి తగ మమ్ముకాపాడు
బంగారు నా తల్లి పరమ పారంజ్యోతి
పోలేరు రక్షగా రాణ కెక్కిన నేల  ( నేల తల్లికి )

ఇల నాల్గు చెరగులా వెలుగులను వెదజల్లి
పేరు ప్రఖ్యాతులను బిరుదులను పొందిన
పరగ విద్యాధికులతో పరవశంబున దిగి
వర సరస్వతి తల్లి వచ్చి నిల్చిన నేల  ( నేల తల్లికి )
 

చూచితి నిజరూపమును

 

గీత రచయిత : వెంకట రాజారావు లక్కాకుల

చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
కటివస్త్రమొక్కటి గరిమ పైపంచె వలెవాటు
ఒండు రెండాభరణాలు వలనొప్ప నొప్పుగా
నీల మేఘమురీతి నిలువొప్ప తనువొప్పగా
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
తీరుగా తిరుచూర్ణము తిరుమణి నుదుటిపై గల
ఓర కన్నుల స్వామిని ఓహోహో యేమి రూపు
తిరుమల గిరి వాసుని  దేవకీ దేవి సుతుని
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
పునుగు జవ్వాదియును పచ్చకప్పురము విరుల
పరిమళములు దశదిశలను పరిపరి వ్యాపింపగా
రత్నఖచితమకుటముధారిని
రాజీవసుమలోచనుని
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
త్రిభువన సేవిత పదకంజ దేవదేవు తిరునాధుని
ముక్కోటి దేవదేవీజన మ్రొక్కులుబడయు స్వామిని 
మునిజన హృదయ సంస్థిత మురళీ మోహనుని
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు

జై భజరంగ బలీ

 గీత రచయిత : వెంకట రాజారావు లక్కాకుల

జై భజరంగ బలీ
—---------------
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
బల అతిబల సువిధ ఘన శక్తి సహితా
అమృత హస్తా అణిమాద్యష్టసిధ్ధి సందీప్తా
భజరంగ బలీ  దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
శివ రుద్రాంశ జనన చరిత యుత శ్రిత మూర్తీ
భవ తారక మంత్ర సతత భజిత శ్రీరామ భక్తా
భజరంగ బలీ   దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
ప్రాతస్మరణీయ ప్రవిమల మహాభక్త శిఖామణీ
సీతాలక్ష్మణసమేత శ్రీరామచంద్ర సేవనాఘనా
భజరంగ బలీ    దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
అతి బలశాలీ వాయుపుత్ర హనుమా  వినుమా
జిత రాక్షస సమూహ శివా చిరంజీవ కనుమా
భజరంగ బలీ    దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే

ఆడుకుందాం రారా

 గీత రచయిత : వెంకట రాజారావు లక్కాకుల

ఆడుకుందాంరారా

------------------------

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా !

నింగిలో నిండు చందమామ నిలిచి వెలుగె చూడు

నేలపై  పండువెన్నె లల్లుకొనుచు పరవశించె

నేడు

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా

చెట్లన్నీ వాసంతపు చెలువాలతొ మురుసెను

రేయంతా రుతు రాగపు శ్రీలు విరిసి తనిసెను

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా

గోవులు లేగలు వెన్నెల కోవెలలకు తరలి వచ్చె

కోవెలలో నాట్యమాడ గోపెమ్మల కోర్కె హెచ్చె

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా

బృందావన మధుబనిలో అందాలను రాశివోసె

సుందర సురుచిర సుమధుర శోభాన విలాస వేష 

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా !

నిన్న తిరుమలేశుని దర్శించితిని

 

చూచితి కన్నులార , నిజ శోభల నీ గురువారమందు , ల
క్ష్మీ చెలువుండు తా నటుల శ్రీ నిలయంబున స్వస్వరూపుడై
రోచిషులూర నిల్చొనుట,లోతనువంతయు పుల్కరించె , నే
మాచెలువమ్ము,భూషణవినాశుభమంగళమోహనాంగముల్ 

నిన్న తిరుమలకు వెళ్ళితి ,
నెన్నడు నిజ రూప దర్శనీయత గన లే ,
కన్నుల భాగ్యము పండెను
పన్నుగ శ్రీవారి గంటి , పరవశ నైతిన్ .

దివ్య మంగళ మూర్తిని తేరి పార
జూచితిని , తన్మయత్వము చూరగొనగ
శ్రీనివాసుని గంటిని , సిరులు పొంగు
తిరుమల మనోఙ్ఞతల్ జూచితిని ఘనముగ .

ఆనంద నిలయ వాసుని
శ్రీ నివసిత వక్ష శుభగ జిత మన్మధునిన్
భాను నిభు , తిరుమలేశుని
మానితగుణు తిరిగి తిరిగి , మరి మరి గంటిన్

ఆ యానందపు ఘనతలు
శ్రేయంబులు గూర్చు , మనసు ప్రియపడు , తనరున్
కాయము , కోర్కె నశించును ,
ధీయు , మహోన్నత విభవపు ధిషణలు పెరుగున్ .

సీతారాముల కళ్యాణ వైభోగం

 

కళ్యాణ రామయ్య కమనీయ మూర్తికి
పెండ్లికూతురు సీత విమల సతికి
భద్రాద్రి మందిర భవ్య మండప మందు
పరగ కళ్యాణ వైభవము జరిగె
కంచర్ల గోపన్న యెంచి సేయించిన
మాంగళ్య ధారణ మతిశయించె
రాష్ట్ర ప్రభుత్వము రమణమై తెచ్చిన
ముత్యాల తలబ్రాలు మురువు గాంచె

కన్నులారంగ గాంచి , మాకన్న ఘనులు
లేరు లేరనిరి తెలుగు వారు , నిజమె ,
సీతదీ రాముడిది తెల్గు సీమ యటులె
పెండ్లియును తెల్గు వారల పెండ్లి విథమె .

పద్యాలు రాయండి ఇలా సులువుగా

 

పద్యాలు రాయండి ఇలా సులువుగా
---------------------------------------------
సుమతి వేమన్నలు చూపిన బాటలో
పద్యాలు రాయండి బాగు బాగు
పదజాలము కొఱకు పరగ నిఘంటువుల్
పరికింప పనిలేదు బహు విథముగ
మనము మాటాడు ఆ మాటలే శోభిలు
పద్య మందున అర్థవంత మగుచు
ఇది సాధు విదిగొ అసాధు వను రభస
మనకేల గ్రామీణ భాష మనది

చాల సులభము సఖుడ ! పద్యాలు రాయ
స్టైలు కాస్తంత పట్టుకో చాలు చాలు
నీవు పద్యాలు రాయంగ నేర్వగలవు
ఈ యుగాదిన మొదలెట్టు మేల జాగు .

ఈ యుగాది గూర్చి రాయండి ఇక్కడే
చిన్న మాటలందు చెలువు మెరయ
వెర పదేల రావ వేమన పద్యాలు
వాటి బాట పట్ట వచ్చు స్టైలు .

ఉప్పు కప్పురంబు ఒక్క పోలిక నుండు
చూడ చూడ రుచుల జాడ వేరు
సగము పద్య మయ్యె  సఖుడ ఇట్టివి రెండు
సగము లైన పద్య సౌరు లొలుకు .

యతులు గణము లనుచు మతివోగ గానేల
భయము వలదు స్టైలు పట్టు మొదట
పిదప యతి గణాలు వెదుకు కొనుచు వచ్చి
పద్య మందు పడును వరుస గాను .

ఉగాది శుభాకాంక్షలు

 

' ఉగాది ' కాహ్వానం
-------------------------
చైత్ర శుధ్ధపాడ్యమిని , వసంతగమన
శుభదినముతో , మొద ' లుగాది ' శోభలొదవు
తెలుగు నేలకు , ఇదికదా , తెలివి గలుగు
తెలుగు కాలఙ్ఞుల మనోఙ్ఞ ధీ విభవము .

ధరణికి శుభప్రద ' రాక్షస
పరాభవోగాది ' నామ పర్వము వచ్చెన్ ,
అరయగ నా వెను వెంటనె
పరాత్పరుని ' రామనవమి ' పర్వము వచ్చెన్ .

దొంగలకు , మోసగాళ్ళకు
భంగ పరచి సకల జనుల భాగ్యము దోచే
పంగులకు పరాభవములు ,
బెంగేల , హరి పరమాత్మ పేర్మిడి కలుగన్ .

ధర్మము తప్పిన , తప్పదు
కర్మ , పరాభవం బెవడికైన గల్గు నను నిజం
బర్మిలి నినదించుటకే
మర్మముగ పరాభవమని మరి పేరిడిరో !

తెలుగు పూలతోట తేనెలు దిగగద్రావి
రమణ యెలకవి కోకిలల్ ' రామ కీర్త
నా రసాబ్ధిని ' శుభ యోగమందు మునిగె
రార మముజేర , జయము , భద్రాద్రి రామ !

తుపాకి రాముడు

 

కుల్లూరి పోలేరు తల్లి మందిర సంక్రాంతిశోభ

 

ముంగురుల్ జారె .....

 

ముంగురుల్ జారె , జాజిపూల్ మూర దిగియె
మోముపై సిగ్గు దొంతర పోల్చి చూడ
ఇంతి యంగజు కేళికా హేల నుండి
లేచి వచ్చిన విశ్రాంతి లీల దెలియు .

కుల్లూరు పోలేరు తల్లి

 

మణికిరీట ప్రభామయ , మయూఖ రుచిర ,

దివ్యమంగళ రూపు తేజరిల్ల ,

వజ్రాలు పొదిగిన వడ్డాణము మెరయ ,

కాలి యందెలు ఘల్లు ఘల్లురనగ ,

పసుపు గంధపు పూతపై , కుంకుమంబద్ది

ఫాలభాగమ్ము శోభనము గూర్చ ,

లేచి , ననుజూచి , వచ్చి , పోలేరు తల్లి

బిడ్డడా ! రార , యని బిల్చు ప్రేమతోడ ,

బ్రమయొ , పిచ్చియొ గానిండు ,  ప్రతిదినంబు

అమ్మవాకిట జేరి ప్రణామ మిడగ .

నూతన (2026)ఆంగ్లసంవత్సర శుభాకాంక్షలు

 

ఆయు రారోగ్య భాగ్య సౌఖ్యాల నిచ్చి
నవ వసంతంబు మిమ్ముల నడుపు గాత !
నవ నవోన్మేష సంతోష యవనికలకు
బాట లిడుగాక ! క్రొత్త సంవత్సరమ్ము  .

'మన కుగాది గదా ! ఇది మనది కాదు'
అనుచు కొందరు నిరసింత్రు , అవని యంత
నే డనుసరించున దిదియె , నీవు నేను
పదుగు రేగెడు బాటలో పడుట మేలు .

నేటి మా కుల్లూరు

ఒక నాటి కుల్లూరి యున్నతుల్ స్మరియింప

గర్వ ముప్పొంగు సాగరము రీతి

సు విశాలమై , కళల్ శోభించు పెంకుటిళ్ళు

ఇంటి ముంగట నొప్పు   జంటరుగులు

ఎత్తుగా ప్రహరీలు ఇంపుగా ముంగిళ్ళు

ఏపుగా పెరిగిన వేప చెట్లు

ప్రతి యింటి వెనుకల బావియు , వంటిల్లు

మధ్యన హాలు ధీమమ్ము గదుర

అన్ని వసతులు గల్గి సంపన్న మై , యొ

నర్చు వైభవోపేత ఘనతలు ' నాడు '

కటకటా ! కనంగ , నిటు నా కళ్ళ ముందె

రూపు గోల్పోయె , నేమిటీ లోప మకట !

ఏరీ మా పెద్ద తలలు

ఏరీ మా చెలిమికాండ్రు , ఏమై పోయెన్

ఊరి మహోన్నత శోభలు ?

ఊరంతా ఘన నిశీధి  , ఊరా కాడా ?

పటుతర గృహాలు కూలెన్

ఎటు చూచిన శిధిల కుడ్య హేలె కనబడున్

మటు మాయ మాయె వెలుగులు

పటిమలు గోల్పోయె ఊరి ప్రాభవమెల్లన్ 

రూపాయి కనగ నోచని

మా పల్లెల లోన ' నాడు ' మా ఊరి గృహాల్

ప్రాపుగ వందలు వేలుగ

రూపాయిలు గలిగి వెలిగె రుణదాతలుగా .

చుట్టు పక్క లూళ్ళ సొరిది రైతులు గూడ

రుణము కొఱకు రాని రోజు లేదు

పార జూడ నొక్క నూరు రూపాయలు

పుట్ట వరయ ' నాడు ' చుట్టు పట్ల .

ధన ధాన్య రమా విలసిత

ఘనతలు తలదాల్చి బలిజ ధార్మిక గృహముల్

మొనసి తదితర కులాలకు

దిన వెచ్చము లిచ్చి , బతుకు తెరవు లొసంగెన్ .

ప్రతి యింట యినప్పెట్టెలు

అతిశయముగ పసిడి నిండి అలరారె , ధన

స్థితి , భూ స్థితి  శ్రుతి మించుడు

నతులిత వైభవము తోడ నందల మెక్కెన్ .

 

క్రిక్కిరిసిన జనములతో

పెక్కగు అంగళ్ళు ' నాడు ' పెంపు వహించెన్

అక్కజ మవి యెటు వోయెనొ ?

పక్కూళ్ళ జనాలు రారు పదిమందైనన్ .

వందలాది బలిజవాళ్ళ కుటుంబాలు

వలస వోయె నగర బాట బట్టి

ఊరు వదలినారు ఉద్యోగములబట్టి

కూలె యిళ్ళు , మొలిచె కుటజ తతులు .

అసలూరు నిర్ మనుష్యము

మసలిన పాళేల జన సమర్థత పెరిగెన్

పసగల వారు గతించిరి

కసుమాలపు జాతి హెచ్చె ,  కళదప్పె కడున్ .