రాముడే రాజుగా రక్షగా

 గీత రచయిత :వెంకట రాజారావు లక్కాకుల

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

ఒక్కటే మాటగా ఒక్కటే శరముగా

ఒక్కసీతయెసతిగ యుగపురుషుడైనిలిచె 

దండ్రి కిచ్చిన మాట తలదాల్చి కడదాక

పడరాని యిడుముల పడియునూ విడువని

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

అన్నగా తమ్ములకు ఆదర్శమూర్తిగా

మన్ననలుపొంది యీమనుజులందరకు రావణుని చావుతో రామబాణము శక్తి రామనామము శక్తి రాజిల్లె లోకాన 

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

తొలుత శ్రీరామయని పలుకులో రాతలో

పలుకక రాయక వెలయింప రేదియు 

పల్లెలా పట్నాల ప్రతి మందిరాలలో

కడగి సీతారామ కళ్యాణములు సేయ

రాముడే రాజుగా రక్షగా ప్రజలకు

త్రిజగాలు కొలిచేను త్రేతాయుగాదిగా

కుల్లూరు నేలతల్లికి వందనం

 

గీత రచయిత : వెంకట రాజారావు లక్కాకుల

నేల తల్లికి వందనం
కుల్లూరు నేలతల్లికి వందనం
దేశ దేశాలందు దేదీప్య మానమై
పేరైన నా తల్లి  నేలతల్లికి వందనం (నేల తల్లికి)

గల గలా పెన్నమ్మ కదలి వచ్చే నేల
తెలుగు గంగా జలం తిరిగి పారేనేల
ఊరి నల్దిక్కుల పారజూచిన గాని
శ్రీసస్య శ్యామల సిరులు గన్పడు నేల ( నేల తల్లికి )

కోటలో వైభవం కూడిమాడిన మహా
రాచరిక శౌర్యాల రాయలేలిన నేల
నిలువు పటాకత్తి సుళువుగా పనిబూని
చెలగి గుర్రపురౌతు చేయి తొడిగిన నేల ( నేల తల్లికి)

పసుపు కుంకాలతో పట్టు పుట్టములతో
తర తరాలుగ నిల్చి తగ మమ్ముకాపాడు
బంగారు నా తల్లి పరమ పారంజ్యోతి
పోలేరు రక్షగా రాణ కెక్కిన నేల  ( నేల తల్లికి )

ఇల నాల్గు చెరగులా వెలుగులను వెదజల్లి
పేరు ప్రఖ్యాతులను బిరుదులను పొందిన
పరగ విద్యాధికులతో పరవశంబున దిగి
వర సరస్వతి తల్లి వచ్చి నిల్చిన నేల  ( నేల తల్లికి )
 

చూచితి నిజరూపమును

 

గీత రచయిత : వెంకట రాజారావు లక్కాకుల

చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
కటివస్త్రమొక్కటి గరిమ పైపంచె వలెవాటు
ఒండు రెండాభరణాలు వలనొప్ప నొప్పుగా
నీల మేఘమురీతి నిలువొప్ప తనువొప్పగా
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
తీరుగా తిరుచూర్ణము తిరుమణి నుదుటిపై గల
ఓర కన్నుల స్వామిని ఓహోహో యేమి రూపు
తిరుమల గిరి వాసుని  దేవకీ దేవి సుతుని
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
పునుగు జవ్వాదియును పచ్చకప్పురము విరుల
పరిమళములు దశదిశలను పరిపరి వ్యాపింపగా
రత్నఖచితమకుటముధారిని
రాజీవసుమలోచనుని
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు
త్రిభువన సేవిత పదకంజ దేవదేవు తిరునాధుని
ముక్కోటి దేవదేవీజన మ్రొక్కులుబడయు స్వామిని 
మునిజన హృదయ సంస్థిత మురళీ మోహనుని
చూచితి నిజరూపమును శోభాయమానముగా
అరయ లక్ష్మీవారపు అరుదైన అందచందాలతో
దివ్యమంగళ శ్రీనివాస తిరు తేజో విభవములు

జై భజరంగ బలీ

 గీత రచయిత : వెంకట రాజారావు లక్కాకుల

జై భజరంగ బలీ
—---------------
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
బల అతిబల సువిధ ఘన శక్తి సహితా
అమృత హస్తా అణిమాద్యష్టసిధ్ధి సందీప్తా
భజరంగ బలీ  దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
శివ రుద్రాంశ జనన చరిత యుత శ్రిత మూర్తీ
భవ తారక మంత్ర సతత భజిత శ్రీరామ భక్తా
భజరంగ బలీ   దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
ప్రాతస్మరణీయ ప్రవిమల మహాభక్త శిఖామణీ
సీతాలక్ష్మణసమేత శ్రీరామచంద్ర సేవనాఘనా
భజరంగ బలీ    దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే
అతి బలశాలీ వాయుపుత్ర హనుమా  వినుమా
జిత రాక్షస సమూహ శివా చిరంజీవ కనుమా
భజరంగ బలీ    దయ మము పాలింపు తండ్రీ
జయ సంజీవిని పర్వత హస్తా
జయ భయ విదూర మహితా
జయ రామ నామ హృదయ స్థితా
జయ సీతాలక్ష్మణసమేత హనుమా నమోస్తుతే

ఆడుకుందాం రారా

 గీత రచయిత : వెంకట రాజారావు లక్కాకుల

ఆడుకుందాంరారా

------------------------

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా !

నింగిలో నిండు చందమామ నిలిచి వెలుగె చూడు

నేలపై  పండువెన్నె లల్లుకొనుచు పరవశించె

నేడు

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా

చెట్లన్నీ వాసంతపు చెలువాలతొ మురుసెను

రేయంతా రుతు రాగపు శ్రీలు విరిసి తనిసెను

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా

గోవులు లేగలు వెన్నెల కోవెలలకు తరలి వచ్చె

కోవెలలో నాట్యమాడ గోపెమ్మల కోర్కె హెచ్చె

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా

బృందావన మధుబనిలో అందాలను రాశివోసె

సుందర సురుచిర సుమధుర శోభాన విలాస వేష 

ఆడుకుందాం రారా గోపాలకృష్ణా , ఆ

టాడు కుందాం రారా గోవిందకృష్ణా !

నిన్న తిరుమలేశుని దర్శించితిని

 

చూచితి కన్నులార , నిజ శోభల నీ గురువారమందు , ల
క్ష్మీ చెలువుండు తా నటుల శ్రీ నిలయంబున స్వస్వరూపుడై
రోచిషులూర నిల్చొనుట,లోతనువంతయు పుల్కరించె , నే
మాచెలువమ్ము,భూషణవినాశుభమంగళమోహనాంగముల్ 

నిన్న తిరుమలకు వెళ్ళితి ,
నెన్నడు నిజ రూప దర్శనీయత గన లే ,
కన్నుల భాగ్యము పండెను
పన్నుగ శ్రీవారి గంటి , పరవశ నైతిన్ .

దివ్య మంగళ మూర్తిని తేరి పార
జూచితిని , తన్మయత్వము చూరగొనగ
శ్రీనివాసుని గంటిని , సిరులు పొంగు
తిరుమల మనోఙ్ఞతల్ జూచితిని ఘనముగ .

ఆనంద నిలయ వాసుని
శ్రీ నివసిత వక్ష శుభగ జిత మన్మధునిన్
భాను నిభు , తిరుమలేశుని
మానితగుణు తిరిగి తిరిగి , మరి మరి గంటిన్

ఆ యానందపు ఘనతలు
శ్రేయంబులు గూర్చు , మనసు ప్రియపడు , తనరున్
కాయము , కోర్కె నశించును ,
ధీయు , మహోన్నత విభవపు ధిషణలు పెరుగున్ .

సీతారాముల కళ్యాణ వైభోగం

 

కళ్యాణ రామయ్య కమనీయ మూర్తికి
పెండ్లికూతురు సీత విమల సతికి
భద్రాద్రి మందిర భవ్య మండప మందు
పరగ కళ్యాణ వైభవము జరిగె
కంచర్ల గోపన్న యెంచి సేయించిన
మాంగళ్య ధారణ మతిశయించె
రాష్ట్ర ప్రభుత్వము రమణమై తెచ్చిన
ముత్యాల తలబ్రాలు మురువు గాంచె

కన్నులారంగ గాంచి , మాకన్న ఘనులు
లేరు లేరనిరి తెలుగు వారు , నిజమె ,
సీతదీ రాముడిది తెల్గు సీమ యటులె
పెండ్లియును తెల్గు వారల పెండ్లి విథమె .

పద్యాలు రాయండి ఇలా సులువుగా

 

పద్యాలు రాయండి ఇలా సులువుగా
---------------------------------------------
సుమతి వేమన్నలు చూపిన బాటలో
పద్యాలు రాయండి బాగు బాగు
పదజాలము కొఱకు పరగ నిఘంటువుల్
పరికింప పనిలేదు బహు విథముగ
మనము మాటాడు ఆ మాటలే శోభిలు
పద్య మందున అర్థవంత మగుచు
ఇది సాధు విదిగొ అసాధు వను రభస
మనకేల గ్రామీణ భాష మనది

చాల సులభము సఖుడ ! పద్యాలు రాయ
స్టైలు కాస్తంత పట్టుకో చాలు చాలు
నీవు పద్యాలు రాయంగ నేర్వగలవు
ఈ యుగాదిన మొదలెట్టు మేల జాగు .

ఈ యుగాది గూర్చి రాయండి ఇక్కడే
చిన్న మాటలందు చెలువు మెరయ
వెర పదేల రావ వేమన పద్యాలు
వాటి బాట పట్ట వచ్చు స్టైలు .

ఉప్పు కప్పురంబు ఒక్క పోలిక నుండు
చూడ చూడ రుచుల జాడ వేరు
సగము పద్య మయ్యె  సఖుడ ఇట్టివి రెండు
సగము లైన పద్య సౌరు లొలుకు .

యతులు గణము లనుచు మతివోగ గానేల
భయము వలదు స్టైలు పట్టు మొదట
పిదప యతి గణాలు వెదుకు కొనుచు వచ్చి
పద్య మందు పడును వరుస గాను .

ఉగాది శుభాకాంక్షలు

 

' ఉగాది ' కాహ్వానం
-------------------------
చైత్ర శుధ్ధపాడ్యమిని , వసంతగమన
శుభదినముతో , మొద ' లుగాది ' శోభలొదవు
తెలుగు నేలకు , ఇదికదా , తెలివి గలుగు
తెలుగు కాలఙ్ఞుల మనోఙ్ఞ ధీ విభవము .

ధరణికి శుభప్రద ' రాక్షస
పరాభవోగాది ' నామ పర్వము వచ్చెన్ ,
అరయగ నా వెను వెంటనె
పరాత్పరుని ' రామనవమి ' పర్వము వచ్చెన్ .

దొంగలకు , మోసగాళ్ళకు
భంగ పరచి సకల జనుల భాగ్యము దోచే
పంగులకు పరాభవములు ,
బెంగేల , హరి పరమాత్మ పేర్మిడి కలుగన్ .

ధర్మము తప్పిన , తప్పదు
కర్మ , పరాభవం బెవడికైన గల్గు నను నిజం
బర్మిలి నినదించుటకే
మర్మముగ పరాభవమని మరి పేరిడిరో !

తెలుగు పూలతోట తేనెలు దిగగద్రావి
రమణ యెలకవి కోకిలల్ ' రామ కీర్త
నా రసాబ్ధిని ' శుభ యోగమందు మునిగె
రార మముజేర , జయము , భద్రాద్రి రామ !

తుపాకి రాముడు

 

కుల్లూరి పోలేరు తల్లి మందిర సంక్రాంతిశోభ

 

ముంగురుల్ జారె .....

 

ముంగురుల్ జారె , జాజిపూల్ మూర దిగియె
మోముపై సిగ్గు దొంతర పోల్చి చూడ
ఇంతి యంగజు కేళికా హేల నుండి
లేచి వచ్చిన విశ్రాంతి లీల దెలియు .

కుల్లూరు పోలేరు తల్లి

 

మణికిరీట ప్రభామయ , మయూఖ రుచిర ,

దివ్యమంగళ రూపు తేజరిల్ల ,

వజ్రాలు పొదిగిన వడ్డాణము మెరయ ,

కాలి యందెలు ఘల్లు ఘల్లురనగ ,

పసుపు గంధపు పూతపై , కుంకుమంబద్ది

ఫాలభాగమ్ము శోభనము గూర్చ ,

లేచి , ననుజూచి , వచ్చి , పోలేరు తల్లి

బిడ్డడా ! రార , యని బిల్చు ప్రేమతోడ ,

బ్రమయొ , పిచ్చియొ గానిండు ,  ప్రతిదినంబు

అమ్మవాకిట జేరి ప్రణామ మిడగ .

నూతన (2026)ఆంగ్లసంవత్సర శుభాకాంక్షలు

 

ఆయు రారోగ్య భాగ్య సౌఖ్యాల నిచ్చి
నవ వసంతంబు మిమ్ముల నడుపు గాత !
నవ నవోన్మేష సంతోష యవనికలకు
బాట లిడుగాక ! క్రొత్త సంవత్సరమ్ము  .

'మన కుగాది గదా ! ఇది మనది కాదు'
అనుచు కొందరు నిరసింత్రు , అవని యంత
నే డనుసరించున దిదియె , నీవు నేను
పదుగు రేగెడు బాటలో పడుట మేలు .

నేటి మా కుల్లూరు

ఒక నాటి కుల్లూరి యున్నతుల్ స్మరియింప

గర్వ ముప్పొంగు సాగరము రీతి

సు విశాలమై , కళల్ శోభించు పెంకుటిళ్ళు

ఇంటి ముంగట నొప్పు   జంటరుగులు

ఎత్తుగా ప్రహరీలు ఇంపుగా ముంగిళ్ళు

ఏపుగా పెరిగిన వేప చెట్లు

ప్రతి యింటి వెనుకల బావియు , వంటిల్లు

మధ్యన హాలు ధీమమ్ము గదుర

అన్ని వసతులు గల్గి సంపన్న మై , యొ

నర్చు వైభవోపేత ఘనతలు ' నాడు '

కటకటా ! కనంగ , నిటు నా కళ్ళ ముందె

రూపు గోల్పోయె , నేమిటీ లోప మకట !

ఏరీ మా పెద్ద తలలు

ఏరీ మా చెలిమికాండ్రు , ఏమై పోయెన్

ఊరి మహోన్నత శోభలు ?

ఊరంతా ఘన నిశీధి  , ఊరా కాడా ?

పటుతర గృహాలు కూలెన్

ఎటు చూచిన శిధిల కుడ్య హేలె కనబడున్

మటు మాయ మాయె వెలుగులు

పటిమలు గోల్పోయె ఊరి ప్రాభవమెల్లన్ 

రూపాయి కనగ నోచని

మా పల్లెల లోన ' నాడు ' మా ఊరి గృహాల్

ప్రాపుగ వందలు వేలుగ

రూపాయిలు గలిగి వెలిగె రుణదాతలుగా .

చుట్టు పక్క లూళ్ళ సొరిది రైతులు గూడ

రుణము కొఱకు రాని రోజు లేదు

పార జూడ నొక్క నూరు రూపాయలు

పుట్ట వరయ ' నాడు ' చుట్టు పట్ల .

ధన ధాన్య రమా విలసిత

ఘనతలు తలదాల్చి బలిజ ధార్మిక గృహముల్

మొనసి తదితర కులాలకు

దిన వెచ్చము లిచ్చి , బతుకు తెరవు లొసంగెన్ .

ప్రతి యింట యినప్పెట్టెలు

అతిశయముగ పసిడి నిండి అలరారె , ధన

స్థితి , భూ స్థితి  శ్రుతి మించుడు

నతులిత వైభవము తోడ నందల మెక్కెన్ .

 

క్రిక్కిరిసిన జనములతో

పెక్కగు అంగళ్ళు ' నాడు ' పెంపు వహించెన్

అక్కజ మవి యెటు వోయెనొ ?

పక్కూళ్ళ జనాలు రారు పదిమందైనన్ .

వందలాది బలిజవాళ్ళ కుటుంబాలు

వలస వోయె నగర బాట బట్టి

ఊరు వదలినారు ఉద్యోగములబట్టి

కూలె యిళ్ళు , మొలిచె కుటజ తతులు .

అసలూరు నిర్ మనుష్యము

మసలిన పాళేల జన సమర్థత పెరిగెన్

పసగల వారు గతించిరి

కసుమాలపు జాతి హెచ్చె ,  కళదప్పె కడున్ .

నేడు జీసస్ జయంతి

 

పాలకుల మతాధిపతుల దుర్మార్గాలు
నిరసించి ప్రశ్నించి నిలిచినాడు
పీడిత తాడిత పేదల పక్షాన
ధీరుడై  అండగా పోరినాడు
జనజీవనమున నిజానిజాలను దెల్పి
ప్రజలను చైతన్య పరచినాడు
అన్యాయ తీర్పు దౌష్ట్యానికి గుర్తుగా
సిలువపై ప్రాణాలు విడిచినాడు

భూమిపై దిగి వచ్చి ఈ పుణ్యమూర్తి
ప్రజల కోసము బ్రతికి ఈ ప్రజల కొఱకు
అమరు డైనాడు క్రీస్తు ,  మహాను భావ !
మరల రావయ్య , యొకమారు , మహికి తండ్రి !

సొగసుల సోయగాల .....

 

సొగసుల సోయగాల దినుసుల్ జడి దాకి కకావికై , మనో

ఙ్ఞగతి సరాగమాడు నవమన్మథ ప్రేయసియో యనంగ తాన్

సుగతినిగాంచె నీయమప్రచోదితయై,యెదనిండమోహనాల్

రగిలి, మనోగతామృత సరాంతర మగ్న ప్రమోద సంస్థితిన్ .

తడిసి ప్రకృతిలో రూపు తాదాత్మ్య మొంది
ముగ్ధ మోహన ఆనంద మూర్తి యయ్యె
ఇంత కన్న పరవశత్వ మేది కలదు ?
విభవములహో ! అనుభవైకవేద్యము కద !

చిత్తజు వేటుకు జిక్కి .....

 

నెత్తికి చేయి సేర్చి తరుణీ ! యిటు వానను దోగ నేటికో ?
చిత్తము వేదనన్ గుదిసి , చిత్తజు వేటుకు జిక్కి ,  సొక్కిన
ట్లిత్తరి గాన నయ్యెడిని , ఇంతటి చక్కదనాలు నీటిలో
గత్తర బిత్తరల్  దడిసి , గ్రక్కె సెగల్ , వగకాడె శత్రువా ?

జడ యల్లాడెడు .....

 

11, నవంబర్ 2020, బుధవారం

జడ యల్లాడెడు .....

 

జడ యల్లాడెడు,జాజిపూతురుముతో ,జాల్వారు కుచ్చుల్లతో,

నడు మల్లాడెడు,మాయురే!పిడికెడై ,నాజూకు యొడ్డాణపుం

గుడుసై,ముందుకువెన్కకై యొడలు,సోకుల్ మాడ , చెంచెక్కలా

డెడు ఊపుల్,చెఱుకుంగడల్ బలెను,చేడెల్ ,చూడ కన్విందగున్ .

శ్రీనివాసునికి అలివేలు కైసేత

 

తిరువాభరణములు దీసి పక్కనబెట్టి

ఇమ్ముగా హరికి గోణమ్ము గట్టి

పన్నీట దడిసిన పచ్చడమ్ములు దెచ్చి

లలితంపు రొమ్ము తల మొలజుట్టి

తుమ్మెదమైచాయ దొడరు నచ్యుతునికి

శిరసాది పచ్చ కప్పురము నలది

కన మల్లె పూవల్లె కన్నుల కింపైన

స్వామికి పునుగు జవ్వాది పట్టి

శుక్రవారాలు అలవేలు శోభనవతి

మగని కైసేసె ,  నెన్ని జన్మాల ఫలమొ !

దివ్యమంగళ వేంకట దేవదేవు

మోము వీక్షించు కొనరండు , పుణ్యఫలము 🙏

అంతరంగ మధురిమ

  అంతరంగ మధురిమ

------------------

పుట్టితి గొప్పవంశమున , బూనితి జ్ఞానము , మంచిమార్గమున్

బట్టితి , నొజ్జనైతి , విలువల్ గల జీవనయాన మొందితిన్

గట్టిగ శిష్యకోటికి వికాస మొసంగితి నేర్చినంతలో

నెట్టి యవాంఛనీయ పను లేమియు జేసి యెరుంగ నెన్నడున్ .

చేసితి ధర్మకార్యములు , సేవలు పూనిక నున్నయంతలో

వ్రాసితి వెంకయార్యు నిజ వాస చరిత్రము గద్యమందునన్

వ్రాసితి సాయినాధు ననవద్య మహత్వము పద్యమందునన్

వ్రాసితి పద్యమందు విలువల్ గల వెంకయ స్వామి సూక్తులన్ .

కోరిన దైవకార్యముల గూడి వసించితి , నూరిలోని పో

లేరు మహేశ్వరిన్ , పరిమళించిన భక్తి ప్రపత్తులొప్పగా

నేరిచినంత వట్టు , యను నిత్యము గొల్చి , తదేక సేవలో

తీరుగ నిర్వదేండ్లు గడి దేరి తరించితి , నింత యేటికిన్ 

ఎన్నడొ యెన్బదేండ్ల తరి , నేర్పడ గట్టిన , చిన్న దేవళం

బెన్నగ గచ్చులూడి , దురపిల్లి , విభూతి నశించి , జీర్ణమై 

చన్న యెడన్ , గలంగుచు విచారణ జేసి , మహోజ్జ్వలమ్ముగా

కన్నులు కాంతులీను గుడి గట్ట దలంచితి నెంతయున్ గడున్ .

ఎంతగ పూర్వ జన్మముల నెట్టివి పుణ్యఫలంబు లున్నవో ,

చింతన సేయుటే తడవు , చేరిరి పుణ్యులు , చేరె డబ్బు , యా

వంతయు క్లేశముల్ వొడమ , వద్భుతమే యిది , భూరి యాలయం

బెంతయు శోభలన్ మెరయ , నింద్ర నిభా భవనంబె  యేర్పడెన్ .

ఇంత కన్న నే యదృష్టము కోరేది ?

జన్మసఫల మయ్యె , చాలు చాలు ,

పరగ నింత యిచ్చె పరమాత్మ కృష్ణుండు

వందనాలు నీకు పరమ పురుష !

2025 క్రొత్త సంవత్సర శుభాకాంక్షలు

 బ్లాగు పెద్దలు , మిత్రులు , బహు విదురులు

ఘన శుభాకాంక్ష లందుకోండి , నవ వత్స

రాన , ఆంగ్లమా ? తెలుగుదా ? లోన సంశ

యాలు మాని , నేడె వసుధ యంత మొదలు .

పండుగ ,  ' గ్రెగేరియన్ కే

లండరు ' జనవరి ఒకటి , ఇలా వచ్చేసెన్ ,

నిండు ప్రపంచములో ని

ట్లుండగ ,  మనకొక ' యుగాది ' యు , కలదు , ఐనన్

ఆంగ్ల సంవత్సరాదిగా అనుచునె , దిన

దినము దీనినే గణనకు తీసు కొనుచు ,

మనది వేరను భావన మనుగడ విడి ,

తప్ప దిందున కొనసాగ , దారి లేదు .

ఆయు రారోగ్య భాగ్యాలు , నభ్యుదయము

అష్టవిథ సంపదలు , విజయాలు కలుగు

గావుత ! పరమాత్మ దయను ఘనులు ! మీకు 

క్రొత్త సంవత్సరాన మా కూర్మి నతులు 🙏 .

గీతాజయంతి

భవ జలధి దాటు మార్గము , బహు సుబోధ

ముగ నుడివి , జగతిని విమోహ బంధ

ముక్త మొనరించె కృష్ణయ్య , పుణ్యభాగు ,

డా జగద్గురు గీతా జయంతి నేడు .

దేశమంటే .....

దేశమంటే

---------------

దేశమంటే మనుషులోయ్ 

అన్నాడు గురజాడ

ఆ మనుషులందున్న నికృష్టుల

చెప్పగా మరచెన్

పూర్వ మెపుడో పుణ్యపురుషులు 

పుట్టినారట పూజనీయులు

నేడు పుట్టిరి నీతి బాహ్యులు

భూమి భారముగా

పుట్టి ప్రజాజీవిత మందు మనగా

పూని తహతహలాడు వారే

మంచి యన్నది మాయమైనది

రాజకీయములో

కోరి కూర్చుని తినుటె యెరిగిరి

కాయకష్టము సేయు వారలు

కరవు పుడమిని  , వెగటు గల్గును

నేటి మనుషులలో

తేలికగ అనృతము లాడుటలె

మోసమును నమ్మి బతుకుటలే

ఎట్ల సంపాదించినది గా దెంత యన్నదె

మిన్నయందురు

దేశమంటే మట్టిగాదోయ్

దేశమంటే మనుషులోయ్

ఈ పనికిరాని మనుషులోయ్

ఇంత ఘన దరిద్రులోయ్

విష్ణు సంకీర్తనం .....

 పద్మసంభవదేవి బాహుబంధమ్ముల

నలరు శ్రీకృష్ణుని చెలువు వొగిడి ,

సత్యా వసంతుని సరస సల్లాపాల

ప్రణయ గాధల చెలువార తనిసి ,          

రాధికా రమణి చేరంగ రాసక్రీడ

సలిపిన మధుర ప్రసంగము విని ,

బృందావన విహార ప్రియ‌సమాగమ

వినుత రస పిపాస విథము దెలిసి ,

విష్ణు సంకీర్తనా చార్య విమల మతులు ,

చేరి  , వసుదేవ సుతుని , నోరార , పాడి ,

ఆడుదురు , అట్టి భక్తుల , అమల పాద

రజము దొరికిన చాలును , బ్రతుకు పండు .