6, జూన్ 2020, శనివారం
తల్లీ వందనం .....
భగవంతుని దర్శించగ
మగువా ! నీకన్న ఙ్ఞాని మహి నున్నాడా ?
తగలేయన పలువిద్యలు ?
జగమంతా నీ పదాల సాగిలబడదా ?
ఏదీ వైకల్య ? మువిద
కాదు , దురితకార్యరతులు ఘన వైకల్యుల్ ,
వేదిక లెక్కి ప్రవచనాల్
కాదు వచింప , నొక ధర్మ కార్యము వలయున్ .
పోలేరు పరంజ్యోతి పరమేశ్వరి .
మల్లీశ్వరి ! వరదాయిని
యెల్లన్ లోకములనేలు హేమాంబరి ! శ్రీ
కుల్లూరికి పరదేవత ! ,
తల్లీ ! పోలేరు ! నీకు దండాలమ్మా !
5, జూన్ 2020, శుక్రవారం
జన్మదినం .....
(జూన్ 5 నాజన్మదినం)
పుట్టిన రోజిది యని .....
------------------------
ఎందుకు జనించితినొ స్వామి ! యెవ్వియును ఘ
నతలు లేవు , కనీసము వెతలు లేని
బతుకు బతికితినా యన్న - వెతుక - నట్టి
బాట సుతరాము కనరాదు భాగ్య ధాత !
పుట్టినరో జిదియని యి
ప్పట్టున క్యాలండరు నను పదె పదె గాసిం
బెట్టుచు హసించె , స్వామీ !
పుట్టువునకు సార్థకత్వ పూర్ణత లేమిన్ .
ఒజ్జదన మొక కొంత మేలుజ్జగించి
కాస్త యూరట దొరికెను కమల నయన !
మండు టెండన బడి వచ్చు మనిషి కొకట
చల్ల దొరికిన వడువున జలజనాభ !
ఎంద రీ భూమి బుట్టి సాధించిరి , పురు
షార్థములు , సంశయమె , యైన , నంద రిటువ
లె వగతుర ? సందియమె స్వామి ! , చివరిమజిలి
యైన భయద రహితము శాయంగ రాద !
అంబు జోజ్జ్వల దివ్య పాదారవింద !
నీదు చింతనామృత చిత్త నీమ మొకటె
కడవ బెట్టంగ నావయై గానుపించు
జరను రుజలను దాటంగ , పరమ పురుష !
4, జూన్ 2020, గురువారం
మూతివిరుపు .....
చేతికి గాజుల గలగల ,
మూతివిరుపు , ముద్దుమోము , ముడిచిన మల్లెల్,
ఛాతీపై వాల్జడయున్,
నాతుల కందమ్ము - కులుకు, నయగారములున్ .
దీనికి సబ్స్క్రయిబ్ చేయి:
పోస్ట్లు (Atom)