ప్రేమ బోండాము

 

అంగజుడు ఖంగుతినవలె ,

శృంగారపు భంగు ' ఇటుల ' సిరు లొలికించెన్ ,

హంగుగ కొబ్బరి నీరము ,

రంగార సతీముఖీన , రమణుని జేరెన్ .

సిగలో మిర్చి మాల .....

 

మగడా ! మల్లెల కంటే ,

సిగలో ఈ మిర్చి మాల సింగారము , నీ

మగసిరి సెగ రగిలించును  

అగణితముగ రాగ బంధ మతిశయమొందున్  .

ముల్లు , గనంగ , లేదె .....

 

ముల్లు గనంగ, లేదె , నవమోహన! ముగ్ధవయోగభస్తి    రా

జిల్లెడు మోహనాలు , వికసించెడు మేని నిగారు సౌరులన్

విల్లున దొడ్గి నల్దెసల వేయ, గమించెడు లాగు దోచెడిన్

కల్లరి మన్మధుండు మొనగాడుగదే! నిను తూపుగాగొనెన్ .

మదనవిశిఖ

 

కురు లారబోసి , చూపుల

మరుతూపుల మోహనాలు , మదిలోతులలో

సొద దెలుపగ ,  ' మదన విశిఖ ' ,

పెదవులతో పైట చాటు పిలుపులు బంపెన్ .