ఎంతసొగసుగాడివి .....

ఎంత సొగసుగాడివి ! తను

వంతయు భూషణచయమ్మె యలరెడు కృష్ణా !

సుంతయు చూపులు మరలవు

సాంతము నిను జూచుచుండు జగదీశ ! హరీ !

ఇదిగదా ! స్నేహమన్న .....

ఇదిగదా ! స్నేహ మన్న , సారించి చూడ

నొకరు పరమాత్మ , నిరుపేద యొకడు చూడ ,

సరస కూర్చుని యొండొరుల్ చదురులాడు

చు , ఫలములు మెక్కుచున్నారు , చూడ తరమ ?

ఆదిపురుష ! నాకమందు లేవ.....

అమ్మపాలు ద్రావి , ఆలపాలును ద్రావి

నెమ్మది తనిసేవు నీరజాక్ష !

వెన్నమీగడలన సన్నుతింతువు కృష్ణ !

ఆదిపురుష ! నాక మందు లేవ ?

కృష్ణా ! ఇవిగో ! నవపారిజాతాలు .....

ప్రతిదిన శుభప్రభా విక

సిత సిత నవపారిజాత శ్రీవిరులు హరీ !

బ్రతిమాలె నీదు పదముల

జతచేరగ నివిగొ కృష్ణ ! శరణము తండ్రీ !

కొమ్మ కొమ్మకూ బొమ్ముంది ....

కొమ్మ కొమ్మకూ బొమ్ముంది , నిమ్మళముగ
చూడ నందరూ ఘన మనీషులె గణింప
ఎందరున్నారొ గమనింపు డెవ్వరెవరొ
అందరిని దెల్పు వారికి అందలములు .

చిత్రకారునికి కృతఙ్ఞతలు

లయకారకా ! హరా !

జలనిధులు గగనతలములు

వెలుగులు వాయువులు పుడమి వివిధాయువులన్

కలగాపులగము జేసి స

కలసృష్టి హరించి విలయకాలయముడవై ,

అంతా ఐపోవగ , యే

కాంత నిశీధీ దిశాంత కాంతి మయూఖా

ధ్వాంత సుఖాసీనుడవయి

శాంత శుభాకారతపము శాయగ హితమా ?

తులసీ రాముడు .....

పరమభక్తుడుతులసిదాస్ పరవశించి
ఎదుట పాడంగసీతాసమేతుడగుచు
లక్ష్మణస్వామి మారుతు లాలకింప
రాముడే వచ్చి విన బట్టె రామచరిత

వైద్యనారాయణులకు పాదాభివందనాలు

ఈ యిద్దరూ , కరోనా
గాయింబడి , ప్రక్క ప్రక్క గాసిలు , నందొ
క్కాయన డాక్టరు , కని , ప్ర
ప్రక్కాయన బా , ధపుడును , వైద్యము సేసెన్ 🙏.

(కార్టూనిష్ట్ కు ధన్యవాదములు ,కృతఙ్ఞతలతో)