హద్దే లేదీ ఘనతకు
తద్దయు మన శిల్పకళ గత విభవము గనన్ ,
ఎద్దును గననగు నొకవై
పద్దెస నేనుంగు గనగవచ్చు చతురతల్ .
హద్దే లేదీ ఘనతకు
తద్దయు మన శిల్పకళ గత విభవము గనన్ ,
ఎద్దును గననగు నొకవై
పద్దెస నేనుంగు గనగవచ్చు చతురతల్ .
ఆండాళ్ - శ్రీరంగనాధుల
కళ్యాణ వైభోగమే భోగిపండుగ
---------------------------------------
తనపూలవనములో దొరి
కిన పాపకు, విష్ణుచిత్త కేశవదాసుం
డొనరగ ' కోదై ' నామం
బును, పూమాలయను, నర్థమున పేరిడియెన్ .
కోదై గోదాయయ్యెను
గోదా శ్రీరంగనాధు కూరిమి బొందెన్
శ్రీదామ మామె ముడువగ ,
మోదముతో తానుదాల్చె మురహరి ప్రీతిన్ .
గోదా కొప్పున ముడిచి , ప్ర
మోదముతో విడిచి పంపు, పూమాలలె , నా
మోదింతుననుచు, కలలో
శ్రీదాముడు వలుక , కూతురిన్ వేనోళ్ళన్
వొగుడుచు,' నాండాళ్ ఆండాళ్ '
తగ బిలిచెను, మురిసి తండ్రి , 'తల్లీ' యనుచున్,
జగ మంత, టామె నాండాళ్
యని బిలువగబట్టి గోద, ఆండాళ్ అయ్యెన్.
రోజూ వొకపాశురమున
రాజీవాక్షుని నెలంత రాగసుధలతో
పూజించ మెచ్చి యామెను
మోజున శ్రీరంగనాధమూర్తి వరించెన్
తుది , భోగి రోజు , రంగడు
ముదితను కళ్యాణమాడె ముచ్చటవడి, ఇ
వ్విధ వైభోగపు కళ్యా
ణ ధగధగకు ' భోగి ' యనగ నాదిన మొప్పెన్ .
కన్ను లరమోడ్పు లయ్యెను
పన్నుగ హృదయాలు తనిసి పరవశమయ్యెన్
వెన్నుని రాధిక తనువులు
మన్ననతో పెనసి ప్రేమ మధువులు పండెన్ .
గుట్టుగ నొకచో నిలువడు ,
నెట్టన పొరుగిండ్ల దూరు నితడని తాడున్
గట్టెను సత్యాసతి, చే
పట్టి కరంబుల, నితండు పట్టుంబడునా ?
తనసంపద, అధికారము,
ఘనవైదుష్యములవల్ల గౌరవమొనగూ
డున ? రా , దితరుల కందిం
చిన మేలొకటే , మనుజు విజితునిగ నిల్పున్ .
కోటలు దాటే మాటల
చాటింపులవల్ల మేలు జరుగదు జగతిన్,
దీటుగ మేల్ తలపెట్టి, న
దాటుగ సేయంగ నొరుగు, ధార్మిక కృతులన్ .
ఓ నీలా ! నీలాలక !
రానీవా మేనువిడిచి రాజీవాక్షున్ ,
శ్రీనాధుగొలువ నిదిగో !
మానినులము వచ్చినాము మంజులవాణీ !
' దేశభాషలయందు తెలుగు లెస్స' ని వల్కె,
రాయలు కర్ణాట రాజరాజు,
' సుందర తెలుగ ' ని చొక్కి వచించె, సు
బ్రహ్మణ్యభారతిరా , తమిళుడు ,
అరయ ' ఇటాలియన్ ఆఫ్ ద ఈష్ట్ ' అంచు, ని
కోలకోంటి ఒక ఇటాలి మెచ్చె,
' అద్భుత ' భాషని అరచి చెప్పెను, బ్రౌను
ఇంగ్లీషుదొర గణియించి ఘనత,
దేశ దేశాల పండితుల్ తెలుగు మెచ్చి
వొగిడినా , రిదిగొ ! నిచటి 'వోగు దగిడి
గాళ్ళు' తామె బుధులవోలె, గ్రామ్యమనుచు
తెలుగు నుడులను నిరసింత్రు తులువ లగుచు .
సద్దు సేయంగవద్దు విశ్వంబ నీవు,
సరసములదేలుచున్నారు, సరసజగతి
నేలు రాధికాకృష్ణులు, హృదయ
సీమలొక్కటిగ, రసానుగామినులయి .