ఘనత బొగడంగ .....

శ్రీరామచంద్రుడు శ్రీకృష్ణ పరమాత్మ

ప్రభవించి నడిచిన భరత భూమి

వేదాది వాజ్ఞ్మయ విజ్ఞాన వీచికల్

పరిమళించిన పుణ్య భరత భూమి

బౌధ్ధాది మతముల వర బోధనామృత

ఫలములు మెక్కిన భరత భూమి

గాంధీ మహాత్ముని ఖడ్గమయి అహింస

దొరల చెండాడిన భరత భూమి

ఘనత లానాడు , ఇప్పుడీ కన్నులెదుట

సాక్ష్యమై నిల్చె దోపిడీ స్వామ్య మగుచు

నీతి మాలిన నేతల చేతుల బడి

పరువు గోల్పోయె నకట ! నా భరత భూమి   

..... మహిళ మహిమాన్వితా మూర్తి

అత్తలు కోడళ్ళు ఆడబడుచులు పర

         స్పరము ‘ సహకరించి ‘ బ్రతుకు రోజు

ఇరుగింటి పొరుగింటి ఇల్లాళ్ళ కష్టాలు  

          ఇంతుల ‘ కానంద ‘ మిడని రోజు

పక్కింటి తగవులు పడతికి టిక్కెట్టు

          లేని ‘ వినోదమ్ము’ కాని రోజు

మనకెందు కంటూనె  మాట పొల్లులు వోక

           పలు ‘ ప్రచారాల ‘ పాల్పడని రోజు

చెలగి ‘ ఈర్ష్య లసూయలు  స్త్రీకి సహజ ‘

మని  జగమ్మున భావింప బడని రోజు

‘ స్త్రీకి స్త్రీ శత్రు ‘ వను పేరు చెరగు రోజు

మహిళ మహిమాన్వితా మూర్తి , మాన్య చరిత .

' ఆడ పిల్లయే ' ఇంటికి అమృత ఫలము

 పుట్టి పుట్టంగనే పుణ్యాల ప్రోవయి

        కన్న వారికి గూర్చు కామ్యఫలము

బుడి బుడి నడకల బుజ్జాయి నవ్వులు

         నట్టింట ముత్యాల నగలు పేర్చు

పరికిణీ గట్టిన పాపాయి సొబగులు

           మురిపాల ముద్దులు మూట గట్టు

పెళ్ళీడు దరిసిన ప్రియ తనయ దిరుగు

            నాయింట లక్ష్మీ విహార మొనరు

ఘనులు కడుపార కూతురిన్ గన్న వారు

తల్లి దండ్రులు తనివార తమకు దాము

మురియు ననుభూతు లేమని బొగడ వచ్చు !

ఆడ పిల్లయే ఇంటికి అమృత ఫలము .

పండుగల నాడు కన్నుల పండు వగుచు

ఆడి పాడిచు దిరుగాడు ఆడ పిల్ల

ల కళ ఆయింటి నిండ వరాలు గురియు

ఆడ పిల్లయె సర్వస్వ మవని యందు .

అమ్మాయి నాన్న కూచీ ,

అమ్మకు గడు తోడు నీడ , అన్నయ్యకు ప్రా

ణ మ్మపురూప మ్మీ బం

ధమ్ములు గద ! ఆడ పిల్ల తనరిన యింటన్ .

 

మహా శివ రాత్రి శుభాకాంక్షలు

తలమీద గంగమ్మ తనువులో గౌరమ్మ 

ఇద్దరు చెలువల ముద్దు మగడు 

ఒల్లంత బూడిద వల్లకాడే యిల్లు 

పాములతో దిరుగు సాములోరు 

ఏనుగు తోల్గట్టి యెద్దు వాహనమెక్కి 

లోకాలనేలు భూలోక విభుడు 

డమరుక నాదాలు డప్పుల మోతలు 

శూలాల కోలాహలాల ప్రియుడు

అతడె హరహర మహదేవు డందరికిని 

సులభు డభయమ్ము పొందగా నిల వెలసిన 

లింగ రూపుడు మనల పాలించు ప్రభుడు 

ప్రణతు లర్పింతు నర్చింతు పరమ శివుని .

                                              

ప్రజా సేవ కోసం .....

రాష్ట్రాలు రెండైనై

తెలుగు నేతల వెలుగు

రెండింతలైంది

రెండు చోట్లా మొదులైంది

నేతల హడావుడి -

అబ్బే ,

పదవుల కోసం కాదు

ప్రజా సేవ కోసం

నిఝ్ఝంగా నిజం

ఇద్దరు ముఖ్య మంత్రులొస్తారు

ఇద్దరు పీసీసీ ప్రెసిడెంట్లొస్తారు

డజన్లకొద్దీ

మంత్రులొస్తారు -

రెన్నెళ్ళల్లో ఎలక్షన్లు

ఆగలేరా అందాకా -

అబ్బే ,

పదవుల కోసం కాదు

ప్రజా సేవ కోసం .

ఆగరు గాక ఆగరు

ఆగితే ,

ఆగబాగమై పోతాము

ప్రజా సేవ లేక -

రైతు వ్యవసాయం చెయ్యలేడు

రైతు కూలీకి పని దొరకదు

తాపీ మేస్త్రీ తటపటాయిస్తాడు

కార్యాలయాలు కకావికలై పోతాయి

గుమాస్తాల గుడ్లు తేలిపోతాయి

బళ్ళు బజారున పడతాయి

రవాణా రహదారి తప్పుతుంది

అందరూ అన్నం తినడం మానేస్తారు

అంతా అస్త వ్యస్త మౌతుంది

ప్రజా సేవ లేక -

అబ్బే ,

పదవుల కోసం కానే కాదు

ప్రజా సేవ కోసం .

భక్తి కైమోడ్చి పరమాత్మ ప్రాపు గనుము

పరగు విశ్వ మనంతము , భ్రమణ రూప

చలన చాలన సంవృత్త శక్తి మయము

అందుగల కోట్ల గ్రహ తారకాది చయము

కడు నసంఖ్యాక మయ్యును కక్ష్య విడవు


                                                                                
తాను నివ సించు విశ్వమే , తనకు సుంత

యైన బోధ పడుట లేదు , తాను శక్తి

మంతు డెట్లగు? విశ్వనియంత కన్న

నధికు డెట్లగు? నల్పాయువగు మనుజుడు

‘భార్య బిడ్డలు తాను ‘ – ఈమాత్ర మైన

చిన్న సంసార బాధ్యతే చేత గాని

మనిషి తనయంత కడు శక్తి మంతుడ నని

విర్ర వీగుట యది యెంత వెర్రి తనము ?

ఆవరించిన గాలి , సూర్య కిరణాలు,

పుడమిపై నీరు ప్రాణుల పుట్టుక లకు

బ్రతుకుటకు ప్రాపు - లిందెట్టి భాగ్య మైన

తొలుగ - సృష్ఠించ నేర్చునే మలిగి తేర ?

ప్రకృతి పరమైన భాగ్యాలు బావు కొనుచు

దాతనే మరచు కృతఘ్నతా విధాన

భావనలు గల్గు మానవా! పతన మవకు

భక్తి కైమోడ్చి పరమాత్మ ప్రాపు గనుము