తస్మై శ్రీ గురవే నమః 2

అది 1971 జూలై 29 .

సమయం సాయంత్రం నాలుగ్గంటలు .

జూనియర్ కాలేజి ప్రిన్సిపల్ గది .

కుర్చీలో తథేక ధ్యానంతో పనిలో నిమగ్నమైన

ఒక ప్రసన్న గంభీర మూర్తి .

గుమ్మంలో ఇరవైయ్యేళ్ళ నూనూగు మీసాల

కుర్రాడు , రాజారావు – చేతిలో ఎప్పాయింట్ మెంట్

ఆర్డర్ తో

మే ఐ కమిన్ సార్

ప్రిన్స్పల్ సార్ తల కూడా పైకెత్తలేదు

కాస్తంత బిగ్గరగా మళ్ళీ మే ఐ కమిన్ సార్

ఈసారి సారు తల పైకెత్తేడు , ప్రశ్నార్థకంగా

నమస్తే సార్ , విష్ చేసి రాజారావు ఎప్పాయింట్ మెంట్

లెటరు టేబిల్ మీదుంచేడు

మాకూ వచ్చింది , ఏం చదువుకున్నావ్

చెప్పేడు రాజారావు

ఎక్కడ

చెప్పేడు

ఓహో , తమరు అక్కడి సరుకా

.......... మౌనం

సబ్జెక్టేమైనా వచ్చా

.......... మళ్ళీ మౌనం

ఒకటి , రెండు , మూడు .....సబ్జెక్టుకు సంబందించిన

ప్రశ్నలు , శర పరంపరలుగా

ధాటిగా రాజారావు సమాధానాలు

ప్రిన్స్ పాల్ గారిలోని చులకన భావం కొంత తగ్గినట్లని

పిస్తోంది . ముఖం కాస్తంత ప్రసన్నంగా మారింది .

కాస్త సరుకుందనీ , పనికొస్తాడనీ భావించి నట్లుంది

అదే , ఆనాటి పెద్దల గొప్ప గుణం .

చిటికెలో పాలూ , నీళ్ళూ వేరు చేసేస్తారు

          ----------------

కాలింగ్ బెల్ మోగింది , అటెండర్ వచ్చాడు

సీనియర్ అసిస్టెంట్ ని పిలవమని ఆర్డర్

సీనియర్ అసిస్టెంట్ హాజరు

ఎప్పాయింట్ మెంట్ ఆర్డరిచ్చి  , రాజారావును జాయిన్

చేస్కోవలసిందిగా ఉత్తర్వు  

సీనియర్ అసిస్టెంట్ రాజారావును ఆఫీస్ రూం లోకి తీసుకెళ్ళేడు

మీ ఒరిజినల్స్ ఇవ్వండి

సార్ , ఈనెలలోనే రిజల్ట్సొచ్చాయి , ఒరిజినల్స్ త్వరలోనే అందజేస్తాను

సీనియర్ అసిస్టెంట్ ప్రిన్సిపల్ రూంలోకెళ్లేడు , రాజారావు ఫాలో అయ్యాడు .

విషయం ప్రిన్సిపల్ కు విన్నవించ బడింది .

అలాగా , పర్లేదులే , జాయిన్ చేసుకోండి . యూనివర్సిటీకి

నేను రాసి తెప్పిస్తానులే .

సీనియర్ అసిస్టెంట్ మారు మాటాడకుండా జాయిన్ చేసుకున్నాడు

సదరు జూనియర్ కళాసాల అనుబంధ ఉన్నత పాఠశాలలో

రాజారావు ఉపాథ్యాయ వృత్తి మొదలయ్యింది .

             -------------

అప్పటి విద్యాలయాల మహోపాథ్యాయుల , ప్రథానోపాధ్యాయుల

వ్యక్తిత్వాలు మహోన్నతాలు . వారి నిర్వహణ సామర్థ్యం అద్భుతం .

వాళ్ళు రాగ ద్వేషాల కతీతులు . ఎవ్వరిలో ఏచిన్న సుగుణం కన్పించినా

మెచ్చుకుని ప్రోత్సహించే ఆ తత్త్వం ఇప్పటి వాళ్లలో మచ్చుకుకూడా కన్పించదు .

సమర్థతను గుర్తించడం , నిబధ్ధతకు పెద్ద పీట వెయ్యడం , తద్వారా

సంస్థను ముందుకు తీసుకెళ్లడం అప్పటి వాళ్లకు వెన్నతో పెట్టిన విద్య .

ఇప్పుడు భజన పరులకు ప్రాధాన్యతనిస్తూ , సంస్థలను నిర్వీర్యం చేస్తున్నారు .

                   ---------------

రాజారావుకు మొదట్నుంచీ అలాంటి మహోన్నత మూర్తుల సాహచర్యం ,

మార్గదర్సనం లభించింది . ఉపాథ్యాయ వృత్తిలో నిబధ్ధత , సబ్జెక్ట్ లో ప్రావీణ్యత

అలవడ్డవి . ప్రధానోపాధ్యాయులుగా సక్సెస్ సాధించడానికి బాటలు పడ్డవి .

తస్మై శ్రీ గురవే నమః   

 

 

 

  

 

  

 

ఏకాదశ సూత్రాలు

శిరిడి జేరు టెల్ల సిరులకు మార్గమ్ము

సర్వ దు:ఖ హరము సర్వ శుభము

నీదు దర్శనమ్ము నిత్య కళ్యాణమ్ము

శ్రీనివాస సాయి ! శిరిడి రాజ !


 తనర నెవరి కైన ద్వారకా మాయిని

జేరి నంత శాంతి చేరు వగును

అరయ నార్తు డైన నిరుపేద కైనను

శ్రీని వాస సాయి !శిరిడ రాజ !



పరమ పురుష ! నీవు భౌతిక దేహమ్ము

వీడి వర సమాధి కూడి ఉన్న

నాడు సైత మవని నప్రమత్తుండవే

శ్రీనివాస సాయి ! శిరిడి రాజ !


నీదు భక్త జనుల నిత్య రక్షణ భార

మొనసి వర సమాధి ముఖమునుండె

మోయు చుంటి వెంత మోదమ్ము రా నీకు

శ్రీని వాస సాయి ! శిరిడి రాజ !


శ్రీ సమాధి జేరి చేయెత్తి పిలిచిన

పలికి మాటలాడు ప్రభుడ వీవు

శ్రీ సమాధినుండి చేయెత్తి దీవించు

శ్రీనివాస సాయి ! శిరిడి రాజ !


 నిన్నాశ్ర యించు వారిని

పన్నుగ నిను శరణు జొచ్చు భక్తజనుల నా

పన్నుడి వై రక్షించు ట

నెన్నగ నీ బాధ్యత యని యెంతువు సాయీ !


 నీయందు దృష్టి నిలుపుచు

పాయక నినుకొలుచు నట్టి భక్త జనుల పై

శ్రీయుత నీకటాక్ష శ్రీ ల

మేయము గా బరపుచుందు మేలుర సాయీ !


సత్య మెరుగ లేక సంసార బంధాల

జిక్కి బాధలొందు జీవజనుల

బరువు మోయ నీవు ప్ర త్య క్ష మౌదువు

శ్రీనివాస సాయి ! శిరిడి రాజ !


ఎవరు గాని నిన్ను నెద నిండ భావించి

నీసహాయము కొర కాస పడిన

తక్షణాన నీవు తగ నాదు కొందువు

శ్రీనివాస సాయి ! శిరిడి రాజ !


 శ్రీ భాగ్య నిధులు గూడుచు

నీ భక్తుల గృహములెల్ల నిండారును నీ

యే భక్తుని గృహ మైనను

శోభనమే – లేమి చొరదు శుభకర సాయీ !



సర్వ కార్య ధర్మ నిర్వహణ లన్నియు

శ్రీసమాధినుండె జేతు ననుచు

మాట ఇచ్చి మమ్ము మన్నించినావురా

శ్రీ నివాస సాయి ! శిరిడి రాజ !

ఓం శ్రీ సమర్ధ సద్గురు సాయినాధ్ మహారాజ్ కీ జై .

శ్రధ్ధా , సబూరిలు చక్కగా పాటించ

             హితబోధ చేసిన హితు డతండు

రెండు రూపాయల దండి దక్షిణ గొని

             కష్టాలు బాపిన ఇష్ట సఖుడు

రోగార్తులను తాకి  రుజ బాధలను బాపి

            తాననుభవించిన త్యాగ శీలి

' సాయి ! కాపాడ  రారా  ' యన్న తక్షణ

            మాదుకొను కరుణామయు డతండు

సర్వ దేవతా సత్తాక సద్గురుండు

సాయి నాధుండు – శరణంచు శరణు వేడి

చరణములు తాకి తరియింత్రు జనులు – శరణు

శరణు గురు పౌర్ణమీ శుభంకర దినమున .

          ప్రపంచానికి మార్గ దర్శనం చేసిన మహాను భావులందరూ గురువులే .

ఈ గురు పరంపరలో వ్యాస భగవానుని పేర గురు పౌర్ణమి జరుపుకోవడం

ఆనవాయితీ . ఈ గురు పౌర్ణమి పర్వ దినాన్ని తాను జీవించినంత కాలమూ

శ్రీ శిరిడి సాయి బాబా వేడుకగా జరిపించేవారు . ఆయన సమాధి చేరిన తదుపరి

శ్రీ సాయి నాధుని మందిరాలలో గురుపౌర్ణమి వేడుకల సంబరాలు ఘనంగా

జరుపుకోవడం ఆనవాయితీగా వస్తున్నది .  

ప్రతి యొక్కరు సాయి తనకు

హితుడని భావించు సాన్ని హిత్యము చూడన్

అతడు మన గుండె నిండా

సతతము కొలువుండు టెల్ల సత్యమె యందున్ .

గురు పూర్ణిమ శుభ దినమున

గురురాట్ శ్రీ సాయి నాధు గొలిచిన జగతిన్

గురుతెరిగి సాయి నాథుడు

తిరముగ దు:ఖములు బాపి తీరము జేర్చున్ .

                                                                    ఓం శ్రీ సమర్ధ సద్గురు సాయినాధ్ మహారాజ్ కీ  జై .    

వొళ్ళంతా బంగారం .....

వొళ్ళంతా బంగారం
ఓ చోటే  సింగారం
బంగారం అసలైతే
సింగారం సిసలు

చుక్కల తళుకులు విరిసిన
విను వీధులు బంగారం
అద్భుతాల పాల పుంత
అందులోని సింగారం

అనంత జ్యోతులు నిండీన
పాల పుంత బంగారం
అవనిలోని చైతన్యం
అందులోని సింగారం

ప్రొద్దు పొడుపు  పరుచు కున్న
నేలంతా బంగారం
బుధ్ధి జీవి  ప్రభవించుటె
అందులోని సింగారం

ఆమని ఋతురాగంతో
ప్రకృతి శోభ  బంగారం
అందమైన పూలబాల
అందులోని సింగారం

పున్నమి వెన్నెల పొడవున
అర్ణవమే బంగారం
అంతులేని అగాధమే
అందులోని సింగారం

సత్య శోధనలు నిండిన
విఙ్ఞానమె బంగారం
ఎరుక గల్గు  ప్రతి మెదడూ
అందులోని సింగారం .

..... వినుట విఙ్ఞత కద ! .....

పిడివాదమను రోగ పీడితుల్ కొందరు
సహనమ్ము కోల్పోయి సంచరింత్రు
జ్వలిత హింసానంద సైకోలు కొందరు
అఙ్ఞాత రూపాన యరచు చుంద్రు
పాండిత్య బురదలో పడి దొర్లు కొందరు
తప్పులెంచుటె తమ గొప్ప యంద్రు
చెత్త రాతల కొంగుశ్రీల భూషించుచు
కొందరు పరవశంబందు చుంద్రు

కూటముల్ గట్టి కొందరు కూడి మాడి
పూని తమలోన తారు మెప్పులు వహింత్రు
సంయమనము పాటించరు చాల మంది
తెలుగు బ్లాగుల కామెంటు ధీరు లరయ .

అన్నియును తమకె తెలియునన్న యహమె ,
యతిశయమె మూలమింతకు _ స్వాతి శయము
వీడి , యితరులు చెప్పేది కూడ వినుటె
విఙ్ఞత కద ! , యిచ్చోట సర్వఙ్ఞు లెవరు ?

రఘువంశ సోము డా రాముడేలిన భూమి .....

రఘువంశ సోము డా రాముడేలిన భూమి
సీతా మహా సాధ్వి మాతృ భూమి

గీతా ప్రబోధి శ్రీ కృష్ణుండు జన్మించి
ధర్మంబు నిలిపిన కర్మ భూమి

సిధ్ధార్థు డుదయించి బుధ్ధుడై జగతికి
దారిచూపించిన ధర్మ భూమి

వేదాది విఙ్ఞాన శోధనల్ విరిసి _ ప్ర
పంచ గురువయిన భరత భూమి

ఘనత బొగడంగ వలయునో _ కాక_ జ్యోతి
షాది మోసాల నిలయమై చనుట జూచి
కలచి యేడ్వంగ వలయునో తెలియరాదు
పండితులె యిచట మోసాల బాట నడువ 

సంపద సృష్టించు చక్కని మార్గమ్ము
కృషి యొక్కటేను _ తక్కినవి మోస

మష్టలక్ష్మి ప్రతిమ లరయ రాత్రికి రాత్రి
కోటీశ్వరుడగున ?  కుట్ర గాద ?

పేరులో మార్పుచే పేద శ్రీమంతు డ
గుట న్యూమరాలజి కుట్ర గాద ?

గ్రహ శాంతి జరిపించ గతి మారి గ్రహ రాశి

అనుగ్రహ ఫలితాలు గనుట నిజమ ?

ఘనత దాల్చిన మేథావి ! కాస్త వినుము !
చదువుకున్నట్టి చదువు నసత్యములకు
పూని వెచ్చించ వద్దు , ఈ పుణ్య భూమి
పరువు తీయొద్దు  _ సుఖముగా బ్రతుకు కొఱకు 

వైద్యో నారాయణో హరీ .....

          నేడు  డాక్టర్స్ డే . గురువునూ , వైద్యుణ్ణీ దైవంగా భావించే కర్మభూమి మనది . వైద్యో నారాయణో హరి :   అని కదా ఆర్యోక్తి . అందువల్ల డాక్టర్లందరికీ పాదాభి వందనాలు .

          పూర్వం విద్యా- వైద్యం రెండూ సామాజిక అత్యావశ్యకాలుగా గుర్తించి సంస్థలూ , దాతలూ , ప్రభువులూ ఉదారంగా అవసరమైన వ్యవస్థల్ని ఏర్పాటు చేసి ఉచితంగా అందించేవారు . నేడు మన కర్మ కొద్దీ మనచేత ఎన్నుకొన్న మన ప్రజా ప్రభుత్వాలు మాత్రం విద్యనూ , వైద్యాన్నీ వ్యాపార వస్తువులుగా మార్చి ఖరీదయిన అవసరాలుగా చేశారు .

           ఇక అసలు విషయాని కొస్తే -----

నాకు చాలా రోజులుగా ఎడమవైపున కడుపులో మంటగా ఉంటుండేది . ఒకటి రెండు సార్లు డాక్టర్లు ఎండోస్కోప్ చేయించి అల్సర్లేవీ లేవన్నారు . ఒక డాక్టరు మాత్రం ఎండోస్కోప్ లో కనిపించక పోయినా పెప్టిక్ అల్సర్ ఉంది

మీకు అని ఒక కోర్సు మందులు రాయడం , వాడడం , ఉపశమించడం జరిగింది .

            మళ్ళీ ఈమధ్య కని పించే సరికి  - హైదరాబాదులో ఉన్నాంకదా అని – మహానగరంలో పేరొందిన

ఏకైక పెద్ద గ్యాస్ట్రో ఎంటరాలజీ హాస్పిటల్ లో చూపించి బాధనుండి పూర్తిగా విముక్తి పొందాలని ఆశ పడ్డాను .

            ఖాళీ కడుపుతో ఒకరోజు ఉదయాన్నే ఆరింటికి హాస్పిటల్ చేరుకున్నాను . అప్పటికే రిజిష్ట్రేషన్ కౌంటర్

వద్ద చాలా మంది గుమి గూడి ఉన్నారు . ఫీజు చెల్లించి నేనూ రిజిష్టర్ చేయించు కున్నాను . హాల్లో వెయిట్ చేయమన్నారు . తొమ్మిది కావస్తోంది . హాస్పిటలంతా హడావిడి మొదులైంది . సందర్శకులతో , సిబ్బందితో క్రిక్కిరిసి

సికిందరాబాదు రైల్వే ష్టేషన్ లా కనువిందు చేస్తోంది .

           ఈలోగా హాల్లో ఉన్న మైక్ లోంచి చెకింగ్ బ్లాకు లోకి ఆహ్వానిస్తూ కొన్నిపేర్లు ఎనౌన్స్ చేశారు . నాపేరు కూడా ఉండడం గమనించి వెళ్ళాను . ఒక్కో చిన్న చిన్న కేబిన్ లోకి ఒక్కొక్కర్ని పంపించారు . చెకప్ డాక్టర్ రావడంతో

నేను నా గోడు వెళ్ళబోసుకోవడం మొదలెట్టాను . ఆయన విటున్నాడో లేదో నాకయితే అర్థం కాలేదు . చిట్టీ మీద

రాసుకుంటూ పోతున్నాడు . అంతా ఒక్కనిమిషంలో అయిపోయింది . ఆ చీటీ నాకిచ్చి క్యాష్ కౌంటర్ కెళ్లమన్నాడు .

            కౌంటర్లో బిల్ వేసి రు.7900 – కట్టమన్నారు . నేనంత పైకం తీసుకెళ్ళ లేదు . కార్డుంది . తీసిచ్చాను .

పైకం జమ చేసుకుని , ఎండోస్కోపీ యూనిట్ కెళ్ళమన్నారు . ఎండోస్కోపీ తదుపరి , బ్లడ్ శాంపిల్ యూనిట్ ,

అల్ట్రా సౌండ్ స్కానింగ్ ఇవన్నీ అయ్యేసరికి పన్నెండు దాటింది . ఇంకా కొలనో స్కోప్ మిగిలే ఉంది . అప్పటి వరకూ

ఏమీ తిన లేదు , తాగలేదు . ఖాళీ కడుపే . ఓరి దేవుడా ఏమిటీ ఖర్మ అనుకుంటూ కొలనోస్కోప్ కోసం విచారించాను .

             హాస్పిటల్ మందుల షాపు చూపించి కొలనోస్కోప్ కిట్ కొని తెమ్మన్నారు . మంచినీళ్లు లీటర్ బాటిళ్ళు

రెండు కొనమన్నారు . కిట్ లోని టాబ్లెట్ మింగించినారు . ఒక్కొ లీటర్ లో రెండు పొట్లాల పౌడర్ కలిపి అరగంటకోసారి

తాగమన్నారు . అరగంట తర్వాత మోషన్స్ మొదులౌతాయి . పది పన్నెడు సార్లు మోషన్స్ తరువాత రండి . సెకండ్ ఫ్లోర్ లో కెళ్లండి . అంతా అర్థమౌతుంది . సాయంత్రం ఐదు తర్వాత కిందికి రండి అన్నారు .

            అన్నీ సిధ్ధం చేసుకుని సెకండ్ ఫ్లోర్ చేరే సరికి మిత్రులు ఆడా మగా చాలా మందే ఉన్నారు . నేనూ వారితో చేరి నరకంలో విహరించాల్సి వచ్చింది ఐదు వరకూ .

            కొలనో స్కోపీ యూనిట్ లోకి వెళ్లి టెస్ట్ పూర్తి చేసుకుని బయట పడే టప్పటికి ఏడయ్యింది .

రిపోర్ట్స్ కలెక్ట్ చేసుకునే సరికి ఎనిమిదయ్యింది . అన్నీ నార్మల్ రిపోర్ట్స్ .

            పది పన్నెండు మందిని ఒక్కో డాక్టర్ కేబిన్ కు తీసుకెళ్ళారు . డాక్టర్ సహాయకుడు మాఫైళ్ళు

తీసుకుని అవసరమైన సమాచారాన్ని నమోదు చేసి ఒక్కొక్కర్నీ డాక్టర్ వద్దకు పంపిస్తున్నాడు .

            నేను వెళ్ళే సరికి డాక్టర్ ఫోనులో మాట్లాడు తున్నాడు . నేను వెళ్ళి నిలబడ్డా . ఉలుకూ పలుకూ లేదు .

నిలబడే ఓపికలేదు . వయసా అరవై మూడు . రోజంతా ఉపవాసం . పైగా కొలనోస్కోప్ ప్రిపరేషన్ కోసం పది పన్నెండు సార్లు .......

            ఫోను సంభాషణ పూర్తయినట్లుంది . ఫైలందుకుని డాక్టర్ ఏదో రాస్తున్నట్లనిపించి , నేను నాగోడు

వెళ్ళబోసుకుంటున్నాను . వింటున్నట్లు లేదు . విన్నట్లు లేదని మళ్ళా మొదలెట్టేను . మందులు రాశాను కదా  అన్నాడు , ఇక వెళ్లమన్నట్లు చూచి . బెల్ కొట్టేడు , ఇంకొకర్ని పంపమని .

           తీరా ఏమి రాశాడా అని చూస్తే , పది మందుల పేర్లు టైప్ చేసిన ఒక స్లిప్ నా ఫైల్లో అంటించి ఉంది .

పేర్లకు ముందున్న బాక్స్ లలో ఈయన గారు సింపుల్ గా టిక్కులు కొట్టేడు . నాకేమనిపించిందంటే అసిస్టెంట్

మందుల స్లిప్పంటించడం , డాక్టర్ టిక్కులు కొట్టడం తప్ప వీళ్లకే అధికారాలూ లేవేమో అని .

           అంటే ఈ పేరు మోసిన హాస్పిటల్లోకి అడుగిడితే మనంచెప్పేది అస్సలు వినరు . అక్కడున్న దాదాపు

అన్ని టెస్టులూ వాయించేస్తారు . మందుల చీటీలు ముందే అంటించి మందులు అమ్మేసుకుంటారన్నమాట .

           ఏమిటో అంతా మాయాజాలం . మరి రోగం కుదిరిందా అంటే , కుదిరితే ఈ సోదంతా ఎందుకూ .

జాలంలో చిక్కుకుంటే గాని తత్త్వం బోధపడదు కదా !

                          వైద్యో నారాయణో ‘ హరీ ‘   -  అని సరిపుచ్చుకుందాం .  

  

    

అమ్మా , నీవీబిడ్డలకు బరువిప్పుడు !?

                కూతురికి అమ్మంటే ఇష్టం . కొడుక్కీ అమ్మంటే ఇష్టమే .

                కొడలికీ అమ్మంటే ఇష్టం . అత్తమ్మంటేనే అయిష్టం . 

                అత్తమ్మకూ కూతురంటేనే ఇష్టం .  కోడలంటేనే కష్టం .

                కొడుక్కి అమ్మంటే ఇష్టమే . ఐనా తనిష్టం ఇక్కడ మార్చుకొంటాడు .

                అల్లుడికీ అమ్మంటే ఇష్టమే . కానీ తనిష్టాన్ని ఏమార్చుకొంటాడు .

                లోపమెక్కడుందో అమ్మకీ తెలుసు , అమ్మలైన కూతుర్లకీ , కోడళ్ల కీ తెలుసు . అందరికీ తెలుసు .

                ఐనా “చదరంగం” ఆగడం లేదు .

                అందుకే అమ్మ తనింట్లోనే పనిమనిషిగా మారి పోయింది .  

  

    ఆహా ! ఈరోజు ఎంత సుదినం !  అంతర్జాతీయ మాతృపూజాదినోత్సవం .అమ్మప్రేమను పొగిడి పొగిడి  అలిసి పోయిన దినం . అమ్మప్రేమనంతా కళ్లకద్దుకొని కలాల్లోనూ , గళాల్లోనూ జార్చుకొని  , పేర్చుకొని  - టీవీ చానల్లూ , పేపర్లూ , బ్లాగుల నిండా చేర్చుకొని

అమ్మనూ , అమ్మప్రేమనూ ఆకాశాని కెత్తేశాం .అమ్మతనం  అజరామరమై అలరారుతోంది . ఇంకేం కావాలి అమ్మకు  ?

                అమ్మలందరూ యశోదమ్మలే . ప్రతి అమ్మకూ తన బిడ్డడు బంగారమే . బిడ్డల పొరపాట్లు నిరంతరం సమర్థిస్తూనే  ఉంటుంది అమ్మప్రేమ . తన బిడ్డ అమాయకుడనీ , ఇతరులు చెడగొడుతున్నారనీ ఆమె భావన . బిడ్డల చేత అతి సులభంగా మోసగించబడే ఈ అభాగ్యజీవిని - అదే – అమ్మ ను  బిడ్డలు అవలీలగా నమ్మించేస్తుంటారు .                

                ఫాపం ! అమ్మ !

                కొడుక్కూ , కోడలికీ , వాళ్ల పిల్లలకీ – ఊడిగం చేసే అమ్మ .

                తిట్లతో పాటు వాళ్లు పడేసే పట్టెడన్నంకోసం బ్రతుకీడుస్తోంది అమ్మ .

                ఒక్కడే కొడు కైతే   చావో రేవో వాడింట్లోనే .

                నలుగురైతే! ఆ యమ్మకు అగచాట్లే .

                ఆస్తి పంచుకున్నట్లు అమ్మనూ భాగాలేసుకొంటారు

                పట్టెడన్నం కోసం నలుగురింటా చాకిరీ తప్పదు .

                 

       కని పెంచిన  బిడ్డల కోసం అష్టకష్టాలు పడిన అమ్మకు ప్రతిఫలం ? మలిసంధ్య మనుగడ దుర్భరం .

ఈ జాతరలకు తెర పడేదెన్నడు ?

సీను : ssc ఎగ్జామ్ సెంటర్ .....
                         చీఫ్ సూపరింటెండెంట్ ఇన్విజిలేటర్లకు రూమ్ ఎలాట్ మెంట్ చేస్తున్నాడు .
రూమ్ నంబర్లు రాసిన చిట్లు రోల్ చేసి ఒక డబ్బాలో వేశాడు . ఒక్కో ఇన్విజిలేటర్ ఒక్కో చిట్టీ
తీస్తున్నారు . చిట్టీ ఓపెన్ చేసి  అలాట్ మెంట్ రిజిస్టర్లో ఇన్విజిలేటర్ నేమ్ ప్రక్కన రూమ్ నంబర్ వేసి
సంతకం తీసుకున్నాడు . ఎగ్జామ్ ఫైల్స్ తీసేసుకుని ఇన్విజిలేటర్లు రూములకు వెళ్ళిపోయారు .
                           హాల్ టికెట్ వెరిఫికేషన్లూ , అట్టెండెన్స్ షీట్లలో సంతకాలు తీసుకోవడాలూ ,
ఆన్సర్ షీట్ల పంపకాలూ పూర్తయినట్లుంది . సెకండ్ బెల్ కొట్టీ కొట్టంగనే డిపార్ట్ మెంటల్ ఆఫీసర్
రూముల్లో క్వశ్చన్ పేపర్లు పంపిణీ చేశాడు . థర్డు బెల్ తో పిల్లల చేతుల్లోకి చేరాయి . పిల్లలంతా
క్వశ్చన్ రీడింగ్ లో బిజీగాఉన్నారు .
                          చీఫ్ కు ఒక విషయం అర్థంకావడంలేదు . రూం నంబర్ టూ కు మొన్నా ,
నిన్నా , నేడూ వరుసగా ఒకే ఇన్పిజిలేటర్ ఎలాట్ కావడం ఎలా సాధ్యం ? ఇందులో ఏదో మతలబుంది .
అది అర్థంకావడానికి ఎంతో సేపు పట్టలేదు . రూం నంబర్ టూ మీద నిఘా ఉంచాడు .
                           అది మండల కేంద్రం . ఆ సెంటర్లో రెండు మూడు ప్రైవేటు స్కూల్ల పిల్లలు రాస్తున్నారు .
ఆయా స్కూళ్ళు మండల్ ఫస్ట్ కోసం పోటీ పడుతున్నవి .  అందులో భాగంగా అనేక మాల్ ప్రాక్టీసెస్
ప్లాన్ చేస్తున్నట్టున్నారు . రూం నంబర్ టూలో ఒక పిల్లాడు ఈపోటీలో ఉన్నాడు .వాడిని మండల్ ఫస్ట్
తీసుక రావడానికి ఈ మాల్ ప్రాక్టీసంతా . ఆ ఇన్విజిలేటర్ ప్రతి రోజూ రూం నంబర్ టూ స్లిప్ సేకరిస్తున్నాడు
లాటరీలో పచ్చిన వాళ్ళ నుండి . కొందరితో అతడు కుమ్మక్కయ్యాడు . రెండు రోజులీ తంతు జరిగింది .
మూడో రోజు దొరికి పొయ్యాడు . అతన్ని చీఫ్ రిలీవ్ చేసేశాడు . ఇలాంటి సిత్రాలెన్నో , ఎన్నెన్నో ఈ ఎగ్జామ్స్ లో .
                                        *****
సర్ ,
అడిషనల్  ?
నో సర్ , చిన్న డౌటుంది _ రూంకెల్లి వెరిఫై చేసుకొస్తాను .
ఏవిటీ ! అలా కూడా రాస్తారా , ఎగ్జామ్సు ? నో నో.......
                *****
అదో కార్పొరేట్ హైస్కూల్ క్యాంపస్ . ssc సెల్ఫ్ సెంటర్ .
అంటే ఇక్కడ జంబ్లింగ్ లుండవు . కేవలం సదరు హైస్కూల్ పిల్లలే పరిక్ష రాస్తారు .
చీఫ్ సూపరింటెండెంట్ , డిపార్ట్ మెంటల్ ఆఫీసర్ , ఇన్విజిలేటర్లు వగైరా సిబ్బంది
మొత్తం ఆ హైస్కూలు యాజమాన్యం పంపిన లిస్టు ప్రకారమే ఎప్పాయింట్
అవుతారనేది బహిరంగ రహస్యం . సదరు సిబ్బంది భారీగా నజరానాలు పుచ్చుకుని
సదరు యాజమాన్యం సేవాభాగ్యంలో తరిస్తారనేది వేరేగా ఉట్టంకించ పనిలేదు .
ఎగ్జామ్ హాల్లో పిల్లాడి కేదయినా డౌటొస్తే పక్కనే హాష్టల్ రూములో కెల్లి క్లియర్ చేసుకుని
వచ్చి మరీ రాయొచ్చన్నమాట . ఇదీ  కొన్నిచోట్ల  సెల్ఫ్ సెంటర్ల తంతు .
        పాపం , మన ఇన్విజిలేటరు కీ అనుభవం కొత్త . తప్పు చేయడానికి మనసొప్ప లేదు .
దరిమిలా , పనికిరాడని రిలీవ్ చేసేశారు .
                             *****
             ఇంకా అనేక చిత్ర విచిత్రాలుగా వింతలూ , విశేషాలతో విరాజిల్లుతున్న
ఈ ఎగ్జామ్స్ ప్రహసనం అవసరమా ?
పరీక్షల లక్ష్యం _ విద్యార్థి ఏడాది పొడవునా ఆర్జించిన విఙ్ఞానాన్ని మదింపు వేయడం .
కానీ , ఈ లక్ష్యం పెడ త్రోవలు పట్టింది . దీనికందరూ బాధ్యులే .
             ఇలాచేస్తే బాగుణ్ణు ! ? .  ssc లెవల్ వరకూ ఇంటర్నల్ అసెస్ మెంట్ చాలు .
ఇంటర్ తదుపరి ప్రతి అడ్మిషనుకూ ఎమ్ సెట్ మోడల్  లో టెస్ట్ నిర్వహించి , డిగ్రీలో - ( అది సాధారణ డిగ్రీ
కానీ , ఇంజనీరింగ్ , మెడికల్ కానీ , మరేదైనా కానీ ) _ అడ్మిషనిస్తే సరిపోతుంది .
ఈ చిత్ర విచిత్ర పరీక్షల జాతరలకు తెర పడుతుంది .

ఉగాది పంచాంగం

ఉగాది పర్వదినం నేడు . అందరికీ శుభాకాంక్షలు .
ఔత్తరాహికులకు ఫాల్గుణ బహుళ పాడ్యమి సంవత్సరాది .
హోలీ తర్వాతి రోజు .
దాక్షిణాత్యులకు చైత్ర శుధ్ధ పాడ్యమి సంవత్సరాది .
పదిహేను రోజులు తేడా .
ఆరోజు వాళ్ళు మామిడి పూత తింటారు .
ఈరోజు మనం వేప పూత తింటాం .
          *****
భారతీయులకు సంవత్సరాది అంటే ఋతు ప్రారంభం .
ఋతువులు వసంతంతో మొదులవుతాయి .
ఒక సంవత్సర కాలానికి
కాలానుగుణ మార్పులు మొదలయ్యే
మొదటి రోజు ఇది .
ఆహ్లాదం , ఎండలు , వానలు , మంచు , చలి , ఆకు రాలడం _
ప్రతి రెణ్ణెళ్ళకూ ఒక మార్పు
కథ మళ్ళీ మొదటికి .
              *****
వసంతం వచ్చేసిందనీ
ప్రకృతి పరువాలు పరుచుకుని
పుడమి అందాల హరివిల్లయ్యిందనీ
కవి కోకిలలు కావ్యగానం చేస్తున్నారు .
              *****
రాజ్యాధిపతి శని యనీ
మంత్రీ _ సేనాపతీ రెండు పోష్టులూ కుజుడు తీసేసుకున్నాడనీ
ఫలితం ఆందోళనకరమనీ
వర్షాలు పడవనీ
పంటలు పండవనీ
రోగాలు విజృంభిస్తాయనీ
ప్రజలు నానా యాతనలు పడతారనీ
రాజ్యాధిపతులు యుధ్ధాలలో మునిగితేలుతారనీ
కార్తాంతికులు పంచాంగ శ్రవణాలు పెట్టి మరీ
వాయించేస్తున్నారు .
            *****
భారతీయ సమాజంలో ఈప్రిడిక్షన్స్ ని
ముందస్తు హెచ్చరికలుగా భావించడం
సంప్రదాయంగా వస్తూవుంది .
అనంత విశ్వంలో మన సూర్య కుటుంబం లాంటి వ్యవస్తలు
కోటానుకోట్లు .
సూర్య కేంద్రకంగా వేర్వేరు కక్ష్యలలో
సూర్యాకర్షక ప్రభావానికి లోనై గ్రహాలూ, ఉపగ్రహాలూ
సూర్యుడి చుట్టూ పరిభ్రమిస్తున్నాయి .
వాటి కక్ష్యలలో గానీ , గతులలో గానీ మార్పుండదు .
             *****
భూమి మీది వాతావరణ మార్పులకు
భూమి చుట్టూ వేలాది మైళ్ళ పర్యంతం
వ్యాపించి ఉన్న వాతావరణమే కారణం .
కాలానుగుణ మార్పులను ప్రసాదిస్తూ
భూమి మీద ప్రాణికోటి జీవనయానానికి
దోహదం చేస్తూ ఉందీ వాతావరణ ఫలకం .
ఇది సహజం .
కానీ ,
మానవుని దురాశ ప్రకృతిని పాడు చేసి రక్షణ కవచాన్ని
నిర్వీర్యం చేస్తున్నది . అందువల్ల వాతావరణంలో
అసహజ పరిస్తితులు లెత్తుతున్నాయని సైంటిస్టులు
హెచ్చరిస్తున్నారు .
              *****
సరే ,
కాసేపు సిధ్ధాంతులు చెప్పేదే నిజమనుకుందాం .
మరి , ఆ విపరీత పరిణామాలు ఎదుర్కోవడానికి
ప్రభుత్వాలూ , ప్రజలూ సన్నధ్ధమౌతారా ?
ప్రభుత్వాధినేతలకు ప్రజాసేవ చేసే తీరుబాటెక్కడుంది ? 

ఏ పదముల నిను బొగడను ఇంతీ ?

అనురాగపు మనోజ్ఞతల అపురూపమా !

నట్టింటను నడయాడే నయన మనోహరమా !

అమ్మా నాన్నల నోముల కమృత ఫలమా !

పరాశక్తి ప్రతిరూపపు ప్రకృతి వరమా !

ఏ పదముల నిను బొగడను ఇంతీ !

ఇల వెలసిన అమృత పూర్ణ స్రవంతీ !

నీవు లేక మగ జాతికి నిలువ నీడ లేదు

నీవల్లే పురుషార్థపు పుణ్య ఫలము పొందు

నీ కడుపున ప్రభవించుటె నిజమని తెలియని మూర్ఖుడు

నీ నీడనె బ్రతుకు నీడ్చునిత్యాహంకారుడు

అజ్ఞానపు టంథకార పురుషాహంకారం

‘ అమృతమయి ’ జ్ఞానజ్యోతి

అండతోనె దూరం

ప్రతి మహిళా ‘ పరాశక్తి ‘.

ప్రపంచాన్ని నడిపించే

ప్రతిభా పాటవ శక్తుల

ప్రభావాల ప్రతిరూపం

ప్రతి తల్లీ తన తనయుడు

థర్మ నిరతు డవ్వాలని

ప్రతిన బూని శాసిస్తే

థర్మ పతితు డయ్యేనా ? ? ?

_ అమృత మయులైన 
మాతృ మూర్తులందరికీ 
మహిళాదినోత్సవ
శుభాకాంక్షలు  _

తెలుగేలా ? ఆంగ్లభాష తియ్యగనుండన్

' చిన్నూ , ఇంద బనానా తిను '
' మామ్ , నాకు బనానా ఇష్టం లేదు , ఆపిల్ కావాలి '
' నాన్నా , డాడ్ కి ఫోన్ చేసి చెప్తాన్లే , ఆఫీస్ నుంచి వచ్చేప్పుడు ఆపిల్ తెమ్మని . మా చిన్నూ గుడ్ బాయ్ , ఈరోజు బనానా తింటాడు . అస్సలు మారాం చెయ్యడు , ఓకే? '
' ఓకే ,  మామ్ '
' దట్స్ గుడ్ '
                    *********
' హలో బావ గారూ , ఏవిటో ఈరోజు పొద్దుట్నుంచీ ప్రయత్నిస్తూనే ఉన్నా , వల కలవడం లేదు. అంతర్జాలం అస్సలు తెరుచుకోవడంలేదు . సమస్యాపూరణం దుంగ లో సమస్య ఏ విచ్చాడో తెలిసి చావట్లేదు , తవరి నిస్తంత్రీభాషిణికి పిలుపందించి తగలడదామనీ..... '
' హారినీ...రావుడూ, నువ్వటోయ్ , అదేవిటోనోయ్ మా మేజోపరి భోషాణం పరిస్థితి కూడా అల్లానే తగలడింది . మూషికం చచ్చిందో , కీలు పలక పాడయ్యీందో తెలిసి చావట్లేదు .
'ఒరేయ్ అబ్బాయీ, ఈ భోషాణంతో నేను పడ్లేను, ఒక ఊరోపరి కానీ , హస్తోపరి కానీ కొని తగలడరా ' అంటే వింటాడా , మా శివుడు ? నిన్నకు నిన్న _ ' తెలుగేలా ఆంగ్లభాష తియ్యగ నుండన్ ' _ అంటూ ఒహ వెటకారపు సమస్యనిచ్చి చచ్చాడా పెద్దమనిషి . దాన్ని పూరించలేక నాతలప్రాణం తోక్కొచ్చిందనుకో . ఈరోజేమిచ్చి తగలడ్డాడో మరి ! నేనూ అందుకేగా జుట్టు పీక్కుంటుండేది . ఆ శర్మగారి నిస్తంత్రీభాషిణికి చేసి తగలడు . తెలుసుకుని నాకూ తగలడు . '
                    ***********
' హలో వదినా , ఈవినింగ్ సిక్స్ థర్టీకి మాటీవీలో వస్తుందే , అదే , ' ఈతరం ఇల్లాలు ' సీరియల్ , మిస్సయ్యాను నిన్న . మా పక్కింటావిడ సుథేష్ణ లేదూ, తనిష్కలో బేంగిల్స్ కొనడానికి తీసుకెల్లిందిలే , నాకైతే ప్రజెంట్ ట్రెండ్స్ తెలుసుననీ..... సర్లే , సూర్య టీవీ కొన్నాడా , సూర్య మదర్  ఒప్పుకుందా , అసలేంజరిగిందోనని ఒహటే టెన్షన్ ఫీలవుతున్నాననుకో , కాస్తంత డీటెయిల్డ్ గా నేరేట్ చెయ్యీ . '
                        *************
       భాష పారుటేరు . భాష జనబాహుళ్యానికి సొంతం . జనబాహుళ్య వినిమయమే భాషకు పరమప్రయోజనం . తరతరాలుగా మన తల్లిభాష మన తెలుగుభాష వర్థిల్లాలి .
      అరటి పండును బనానాగా , ఆపిల్ ను సీమరేగుగా మార్చొద్దు . అరటిపండునూ , ఆపిల్ నూ ఎట్లవట్ల వాడుకుందాం .
       ఓరుగంటినీ , ఒంటమిట్టనూ ఏకశిలానగరాలుగా సంస్కృతీకరించి ,
చక్రాయుధుణ్ణి చుట్టుకైదువుజోదుగా తెనిగించినంత మాత్రాన వాడుకలోకితీసుక రాగలిగేరా ?
          రైలు , రోడ్డు లాగే కంప్యూటర్ , టీవీ , ఇంటర్ నెట్ , ఫోన్ ,
మొదలైన పేర్లను తెనిగించబోయి , సంస్కృతీకరించి అంతర్జాలాలూ , మూషికాలూ చెయ్యాల్నా !
మన భాషలో చేరి విరివిగా వినిమయమయ్యే ఇతర భాషల పదాలు ఎట్టివట్ల వాడుకోవడం మన భాషకూ , మనకూ ప్రయోజనకరం . మాతృభాషపై కుహనా మమకారంతో ఆధునిక పరికరాల అసలు పేర్లను నకిలీ చేస్తే కృతకమై , వికృతభాష తయారౌతుంది .
           అట్లనే వినియోగంలో ఉన్న తెలుగు పదాలకు బదులు  ఆంగ్లపదాలను వాడి , వాటిని వాడుకలో లేకుండా చేయడం తరవాతి తరాలకు ద్రోహం చెయ్యడమౌతుంది .
            నా తెలుగు జాతికంతటికీ మాతృభాషా శుభాభినందనలు .

కొందరివాడుకాదు అందరివాడు

కొందరివాడుకాదు అందరివాడు
పురాణాలలో అందుబాటులో ఉండే
అందరివాడెవడైనా ఉన్నాడా అంటే
అతడితడే , ఆదిదేవుడు , అందరివాడు

పరస్థలాలనుండి తరలివచ్చి
మనుషుల్ని
దేవతలుగా, రాక్షసులుగా విభజించి
తామే దేపతలుగా  చెప్పుకుని 
స్థానికులను దక్షిణాదికి తరిమేసిన
మేథావి పరాసుల కుత్సితానికడ్డునిలిచి
పరాజితులకండగా నిలబడ్డ _ అందరివాడు

దేవతలుగా చెప్పుకునే వాళ్ళ
సాంప్రదాయక  రొటీన్ షోడశోపచారాలకంటే
దేవభాషగా  చెప్పబడే
వినియోగంలో లేని మాటల మంత్రాలకంటే
గ్రామీణుల అభిషేకాల స్వఛ్చతలకూ
హరోంహర నాద ఘోషలకూ
పులకించే - అందరి వాడు

చితాభస్మమే శ్రీకరంగా
పురుషుడూ ప్రకృతీ ఒక్కటై కనిపించే - అందరివాడు
ఉత్తరాదికి కైలాసవాసిగా
దక్షిణాదికి దయావారాశిగా - అందరివాడు

మాటలు చెప్పి మాయచేసి
కష్టాన్ని కాజేసే సోమరుల తరఫున కాదు -
కష్టించి పనిచేసే కష్టజీవుల తరఫున
మోసం చేసేవాళ్ళ తరఫున కాదు -
మోసగింపబడిన వాళ్ళ తరఫున
అణగద్రొక్కే వాళ్ళ తరఫున కాదు -
అణగారిన వాళ్ళ తరఫున
అసామాన్యుల తరఫున కాదు -
అతి సామాన్యుల తరఫున
అండగా నిలిచే - అందరి వాడు

పేదా గొప్పా తేడా లేకుండా
ప్రతి భక్తుడూ
నిరభ్యంతరంగా
నేరుగా లోనికెళ్ళి
తాకి దణ్ణం పెట్టుకో వీలున్న - అందరి వాడు
అతడే ఆది దేవుడు
హర  హర మహాదేవ -  శంభో శంకర
అందరికీ మహాశివరాత్రి శుభాకాంక్షలు