మీరూ మరో పద్యం కట్ట కూడదూ !

పళ్ళు చూడ    నోట నీళ్ళూరు చున్నవి

కళ్ళు తిప్ప లేని    కాంక్ష కలుగు ,

నేల తల్లి మనకు   కాలాను గుణముగా

తినుట కిచ్చె     ఋణము తీర్చుటెట్లు ?

బృందావనమున .....

భూమీ తలమును  రంగుల

ఆమని ముంచెత్తె , చివురుటాకులెరుపులో

పామిన శ్యామలమయ్యెను ,

ఏమని వర్ణించ వచ్చు నీ వని  యమునన్ .

నిండుగా పూచి  పొగడ  వన్నియలు వోవ

దరిసి నాధుని కైసేయ దండ గ్రుచ్చి

మురిసి రాధిక మాధవుముందు నిల్చి

గుండెలకు గుండెలానించి దండ గూర్చె .

మోదుగ పూగుత్తిని గన

మాధవునికి రాధమీద మనసు దవిలి , బిం

బాధరి మోవికి వంశీ

మాధుర్యపు కేళి పంచి మరులొలికించెన్ .

బృందావనమున గోపీ

బృందముతో కృష్ణు డాడె , బింబాధరులున్

బందీలై మాధవునికి

సంధించిరి సరస మధుర  సరి సమరమ్ముల్ .

ఇది వసంత హేల , యిల కెన్నిరంగులో

ప్రకృతి కన్య పూచి పరవశించె ,

ఇందు బ్రతుకు మనిషి కెందుకో  ప్రకృతితో

పాలు పంచు కొనుట పడుట లేదు .  

కోమల జల స్రోతస్విని గ్రామీణ తెలుంగు .....

'తప్పులెన్నువారు తమ తప్పులెరుగరు'
పండితులను గూర్చి పద్య  మిదియ ?
అన్ని తమకె దెలియునన్న యహంకార
మసలు విడరు వేమ!  సిసలు మాట .

పిడికెడు మంది ప్రబుధ్ధులు

పడి పడి తలలూచు కొఱక పద్యపుశోభల్ ?

నడయాడ వలద , తెలుగుల

నడివీధుల , నాల్గుదెసల నాట్యపు హేలల్ .

సాంప్రదాయ బధ్ధ సద్గుణ సంపన్న

బ్లాగు తనదటంచు పలికి , యొకడు

తెలుగు గ్రామీణుల తేట పదాలున్న

పద్యము ప్రకటించ  వద్దనియెను .

తనది తులసి వనము , తాకరాదనెనొక్క

యాచకుండు , భజన మేచకుండు

వారు వీరు జేరి వర్థిల్ల జేతురా ?

స్వార్థపరులు తెలుగుభాష నకట !

మహితాత్ములు పూర్వకవులు

మహనీయ గుణాలవాల మాన్యులు , వీరో ?

బహు నీచ మనో లాలస

మహితాత్ములు విడువరెపుడు మాలిన్యములన్ .

కోమల జల స్రోతస్విని

గ్రామీణ తెలుంగు , సదరు లలిత పదాలన్

ధీమమ్మున వెలయించిరి

వేమన్నయు అన్నమయ్య వేడుక కల్గన్ .