ఎందాకా ఈ రోగపు .....

ఎందాకా ఈరోగపు
కుందున బతుకంగ వలయు కువలయ మంతా ?
ఎందాకా వ్యాక్సిన్ మన
కందునొ నందాక , తప్ప దందురు విఙ్ఞుల్ .

మా మా పరాక్రమమ్ములు
ధీమమ్ములు తేలిపోయె , తిరుమల వాసా !
నేమమ్మున నిను గొలుచుటె
భూమి జనుల బాధ తీరబోవు పథమ్మౌ .

గూడొదిలి , కూటికోసము
వేడుచు , పరదేశ మొచ్చి , వేసట పడి , పో
రాడిన పక్షుల కిప్పుడు
గూడే దిక్కను నిజంబు గొప్పగ దెలిసెన్ .

చేతులకు శానిటైజర్ ,
మూతికి మాస్కున్ ధరించు , పూస్కో రాస్కో
బోతివ , జనాల వెంబడి ,
గోతికి చేరువ యగుటయె , గూడే భద్రమ్ .