పద్మసంభవదేవి బాహుబంధమ్ముల
నలరు శ్రీకృష్ణుని చెలువు వొగిడి ,
సత్యా వసంతుని సరస సల్లాపాల
ప్రణయ గాధల చెలువార తనిసి ,
రాధికా రమణి చేరంగ రాసక్రీడ
సలిపిన మధుర ప్రసంగము విని ,
బృందావన విహార ప్రియ‌సమాగమ
వినుత రస పిపాస విథము దెలిసి ,
విష్ణు సంకీర్తనా చార్య విమల మతులు ,
చేరి , వసుదేవ సుతుని , నోరార , పాడి ,
ఆడుదురు , అట్టి భక్తుల , అమల పాద
రజము దొరికిన చాలును , బ్రతుకు పండు .
కృష్ణ పరబ్రహ్మ కెరగి ప్రార్థింతు , గాని ,
కనికరించ డదేమిటో కరివరదుడు !
కానివాడిన ? ఇంతగా కఠిన వైఖ
రి గొన , ఔనులే , నేనేమి ప్రియ సఖుడన ?
ఏ పాదములను సేవించ నిశ్చింతగా
జనుల జీవితములు సాగిపోవు
ఏ పాదముల్ యిల కేడుగడయయి ధ
ర్మమ్ము నిల్ప నవతరణము దాల్చె
ఏ పాదముల స్పర్శ ఈ భరత యవనిన్
పరమ పావనగాగ విరియ జేసె
ఏ పాద ధూళికై యిలను పెక్కేడులు
నిరతము మునులు ధ్యానించి గనిరి
అట్టి పరమాత్మ పాదము లందు , పూని
మనసు నిల్పితి నీ జన్మ మందు , నడుగొ !
కృష్ణ పరబ్రహ్మ , గోపికా బృంద సహిత
రాస కేళీ వినోద విలాసనముల .
ఏ మనుభవించె కృష్ణయ్య , భూమి పైని ,
పుట్టుకా , చెఱసాలలో , యెట్టు లెటులొ
గొల్ల లిండ్లను బెరిగె , మేనెల్ల యాల
ధూళి దూసరితమయి దులకిసపడ .
మేనమామ శత్రువయి యేమేమొ చేసె
తనను చంపించ , తలిరాకు తనమునందె
గదిసి పోరాడ వలసె , రాకాసి గమిని ,
యేరికైనను నిట్టి రాయిడులు గలవె !
ఆల గాచెను , మన్నుల రాల విపిన
తలములన్ , యెండ లనక , వాన లన కకట !
అలసి సొలసి , కఠిన వృక్షముల మొదలుల
నిద్దురోయెను , ముద్దు మో మద్దె మురికి .
రాచపుటక బుట్టె , మధుర రస విరాజ
మాన , పంచభక్ష్యంపు సమ్మాన భోజ
నమ్ము లేవి ? వెన్నలకు ప్రాణమ్ము లూన ,
గొల్ల లిండుల గోరాడె , గోస బడియె .
రాధతో గూడి , యమునా తటీ , ధరాది
తల , లతా నికుంజముల , నితాంత ప్రణయ
జలధి , మునిగిన తన ప్రేమ ఫలిత మేమి ?
తుదకు యెడబాటె మిగిలెను , యెద బొగిలెను .
కడకు , కొడుకుల గోల్పడి , కడుపు రగిలి
ఇంతకును కారణమ్ము ' నీవే ' యటంచు ,
పూని గాంధారి శపియించె , మునిగె నీట
ద్వారకాపురి యాదవుల్ పడిరి చచ్చి .
ఇన్నియును ముందె తెలిసియు , మిన్నకుండె ,
తాను పరమాత్మ యయ్యును , ధరణి పూని
ధర్మమును నిల్ప అవతారధారి యైన
కృష్ణ పరమాత్మ , తప్పునే ! కర్మ ఫలము !
యదా యదా హి ధర్మస్య గ్లానిర్భవతి భారత |అభ్యుత్థానమధర్మస్య తదాత్మానం సృజామ్యహమ్
పండితోత్కర్షకు పట్టువడ డితండు
సదమల భక్తి పాశమున గాని ,
రాజ రాజోన్నత రాజసములకు గాదు
తులసీ దళానికి తూగు నితడు ,
భోగ లాలస భాగ్య పూజనములకు గాదు
పేదింటి పూవులు ప్రియ మితనికి ,
మహిత మహామంత్ర మాహాత్మ్యముల గాదు
తనను సమర్పించ తనియు నితడు ,
కృష్ణు డితడు , సనాతన విష్ణు డితడు ,
వాసుదేవుడితడు , భక్త వరదు డితడు ,
తనను నమ్మిన వారికి , త్రాత యితడు ,
నెమ్మి , యెదలోన కొలువయ్యె , నమ్మి కొలుతు .
చిన్నప్పటి కన్నయ్యను ,
కన్నప్పుడు యెంత ముద్దుగారేనో , హా !
పన్నుగ యౌవన శ్యాముడు ,
కన్నుల కపురూప , అందగాడనిపించెన్ .
ఎన్నంగా మధ్యవయసు
నున్నప్పుడు , రాజనీతినోమి , చతురుడై
యెన్నని పార్శ్యాలు , హరివి ,
సన్నుత పరమాత్మయే , విశాల జగతికిన్ .
క్రోధ ముపసంహరించి , పరోపకార
సంయమము బూని , ధరణిపై సకల ప్రాణి
మేలు దలచుము , కరుణతో , కాల పురుష !
నే డుగాదిని నిన్ను నే వేడు 🙏 కొందు .
పదపడి పసిడికి , మణులను
పొదిగిన విధమున , పదములు ,భువన మనోఙ్ఞా !
గదిసి , ప్రతి శ్లోక మొక , ని
గధిత మణి మనోఙ్ఞహార కధనంబు గదే !
ఏమా సంస్కృత పద బం
ధామృత రసధుని ? ముకుంద ! తర్జుమ సేయన్
ధీమంబగు భాష గనము
భూమిని సంస్కృతము దప్ప , పుణ్య గురువరా !
శ్రుతి పేయ , మధుర శబ్దము ,
లతి లలిత , శుభగ , మనోఙ్ఞమయి , సంగీతా
మృతము కురిపించె , వంశీ
జతయై , గీతా స్రవంతి , సంగీత ప్రియా !
వినునతడు , చెప్పు నతడును
ఘను లయితే గాని , గీత , కాదు గ్రహింపన్
విను మిద్దరు, తమ వలె , భా
షను , యుద్దండులుగ , కృష్ణ ! సాధించ వలెన్ .
కన్ను లానంద భాష్పముల్ గ్రమ్మె , నీదు
దివ్యమంగళ మూర్తి దేదీప్యమాన
మయి గనంగ , రామా ! కమల దళాక్ష !
జన్మ ధన్యత గాంచెను , జన జగతికి .
అదిగో ! అయోధ్య రాముడు ,
గదిసి మందిరములో , సుఖాసీనుడవన్
ముదితంబగు సమయము , స
మ్ముదితం సయ్యెన్ , నమోస్తు 🙏 మోహన రామా !
రాముని యవతారము , ఈ
భూమికి రక్షా కవచము , పూని వెలిసె , సం
క్షేమము లొసగగ , భారత
భూమి , నయోధ్యను , పున్నెపు ప్రోవై .
స్పందించుచు చెట్టుమధ్య భానుండుండెన్ ,
ఎందుకు మ్రోడయె భూజము ?!
ఎందున ఖర్మ సరిలేదొ , ఇటు తగులవడున్ .
ఐదేళ్ళప్పటి రాముని ,
మోదపు చిరునవ్వురూపు , మోహనమై , ఆ
పాద శిఖము , జనముల కా
మోదంబై నిలిచె , నెంత ముగ్ధత్వంబో !
అతడి నుదుటి చిచ్చు , అనితర సాధ్యమ్ము
తగుల బెట్టును , విశ్వజగతి నెల్ల
అతడి గళమున గల , ఆ కాలనాగులు
కాల గమనమును కాటువేయు ,
అతడి తోడ నడచు , నతుల త్రిశూలమ్ము
పుడమి నడయాడెడు , చెడును బొలియు
అతడి చే దిరుగాడు , నరిది డమరుకము
నరుల నడతల , హెచ్చరిక సేయు
హరు డతండు , విశ్వగురు డతండు , కడు సం
హరు డతండు , కలడు , నరుడ ! ' నేనె
శక్తిమంతుడ ' నన జనకు , ఈ విశ్వమ్ము
ఈ శ్వరుని తలపున , నేల బడెడు .
ఆ యెదలో , కొలువై హరి ,
తీయని కలలోకి జారె , తెరువదు , తెర వీ
హాయిని పాయని , పరవశ
సాయుజ్యము చెందె , నెంత సరస హృదయ యో !
జడ తడిచె , నొడలు తడిచెను
ఒడలికి ముడిబడిన కట్టు టుడుపులు తడిచెన్
కడదాకా ఉడుపుల బడు
మడత మడత లోని సొగసు మరిమరి తడిచెన్ .
పడగలువిప్పి, నాలుకలు పైపయిచాచి, మహోజ్జ్వలాకృతిన్,
గడపల ముందు, మంటలు సెగల్ వెలిగ్రక్కుచు, భోగి పర్వముల్
నిడు గన నౌను, తెల్గు కమనీయ మనోఙ్ఞత, పల్లెటూర్లలో,
సడులబెడంగునన్, మకరసంక్రమణానికి ముందు సందడుల్ .
వైకుంఠవాస కృష్ణా !
రాకా శశి వాసుదేవ ! రారా భువికిన్
ఏకాదశి శుభ దినమున
నీ కాళ్ళను తాకి మ్రొక్కి నెమ్మి తరింతున్ .