ధర్మజుడే యెందుకని ? .....

తనకన్న తెలివిడి తనమున్న వారలు
లేరను యహముచే చేర డొకడు
తనకన్న సొగసైన ఘనులు లేరను నహం
కారము కనుగ్రప్పి చేర డొకడు
మగ లైదుగురి లోన మగువ ' కింద్ర సుతుడె '
' మక్కువ ' లోపమై చిక్కె నొకతె
విలు విద్యలో తన చెలువమ్ముపై నున్న
అతిశయ మొకనికి అడ్డు నిల్చె

మరణ వేదన పడుచున్న మనుజు జూచి
పరగ నానంద పడుటచే పడియె నొకడు
తుదకు ధర్మజుం డొక్కడే ముదము తోడ
బొందితో స్వర్గమును జేరె పూజ్యు డగుచు .

మొక్కనాటుము .....

ఇంటిలో నాటిన నింటిల్లపాదికీ

ప్రాణవాయువొసగి రక్షసేయు

బస్టాండులో నాట పదిమందితో నీకు

దీవన లిప్పించు పావనముగ

దేవాలయమ్ములో దీపించినాటిన

దేవుని కృపగల్గితీరు నీకు

తగ స్మశానవాటి తరువు నాటినవాడు

జన్మజన్మలకీర్తి జాతు డగును

చెట్టు నాటుము , శ్రీరస్తు, చెలిమికాడ!

పుట్టువుకు సార్థకమ్మగు, గిట్టికూడ

బతికియుందువు, చెట్టురూపాన, వంద

లేళ్ళు, భూమిపై చావు జయించి సఖుడ !

గురుపూర్ణిమ శుభాకాంక్షలు

వందే కృష్ణ జగద్గురుమ్ సురమునివ్రాతాది సంపూజితమ్ వందేవ్యాసమునిమ్ పురాణపురుషమ్ వాగీశ్వరమ్ ఙ్ఞానదమ్ వందే సాయి పరాత్పరమ్ సకలదేవవ్రాత రూపాద్భుతమ్ వందే సర్వగురుప్రపంచవిభవమ్ భాస్వంత మోక్షప్రదమ్ .

కృష్ణం వందే జగద్గురుమ్

శిఖిపింఛ వలయిత శీర్ష కుంతలభార
విపినప్రసూనాక్ష వీక్షితుండు
గిరిధాతు చిత్రిత తిరుతిలక మనోఙ్ఞ
వర రుచిర నిటల వర్ణితుండు
అమృత మ్మొలుక వేణు వనయమ్ము మ్రోయించు
లావణ్య రూప విలాసితుండు
బాల తమాల వినీల మంగళ తనూ
ప్రభల చెలంగు పరాత్పరుండు

నందబాలుండు , కృష్ణుండు , నగధరుండు
వాసుదేవుండు , గోగోప వర సఖుండు
గరిమ గీతోపదేశ జగద్గురుండు
మదిని సాక్షాత్కరించె నమస్కరింతు .

కృష్ణుణ్ణి తలుస్తేనే –

జగత్తంతా ‘ ఆడతనం ’ పరచు కొంటుంది .

‘ మథుర భక్తి ‘ మనోఙ్ఞమై విరుచు కుంటుంది .

జగన్నాధుని ఆరాధనతో ‘ మనోనేత్రం’ తెరుచు కుంటుంది .

కృష్ణుని పేరు వింటేనే –

జగత్తుకు ‘ భగవద్గీత ’ విన్పిస్తుంది .

‘ అధర్మంపై ’ ధర్మ పోరాటం మొదలౌతుంది .

ఆర్తులకు జగన్నాధుని ‘ ఆశ్రయం ’ లభిస్తుంది .

కృష్ణుని రూప లావణ్యం చూస్తేనే –

జగత్తులోని ‘ అందమంతా ’ కళ్ళకు కట్టినట్లు కనబడుతుంది .

ఆత్మకు ‘ అనిర్వచనీయమైన ’ ఆనందం కల్గుతుంది .

జన్మాంతర దు:ఖాలకు ‘ విముక్తి ’ లభిస్తుంది .

‘ మోవి ’ తాకిన ‘ క్రోవి ’  మోహనరాగ మాలపిస్తుంటే 

ప్రకృతి యావత్తూ సమ్మోహిత మైన ఈ వేళ

‘ బృందావన విహారిని ’ స్మరించు కొందాం .

మహాత్ముల సంస్మరణ

మానవ జీవితాలకు

మార్గ దర్శనం చేస్తుంది .

జగన్నాధుని  కని పెంచిన దేవకీ-వసుదేవులనూ , యశోదా-నందులనూ –

కృష్ణ ద్వైపాయణుణ్ణీ , కృష్ణనూ , కృష్ణ సచివుణ్ణీ –

రాధ , రుక్మిణి , మీరా , జయదేవుడు , వామదేవుడు , క్షేత్రయ్య మొదలైన భక్త శిఖా మణులనూ –

కృష్ణుణ్ణి తెలుగు వాకిటికి తెచ్చి , ప్రతిష్ఠించిన పోతన్ననూ

కన్నయ్యతో పాటు ‘ గురుపౌర్ణమి ’ రోజున

స్మరించు కుందాం .

“ కృష్ణం వందే జగద్గురుం “

వైద్యో నారాయణో 'హరీ'

గురువునూ , వైద్యుణ్ణీ దైవంగా భావించే కర్మభూమి మనది . వైద్యో నారాయణో హరి :   అని కదా ఆర్యోక్తి . అందువల్ల డాక్టర్లందరికీ పాదాభి వందనాలు .
ఈపోష్టు 2015 జులై 1న పబ్లిష్ చేసింది .

ఏరంగంలోనైనా దగా మోసం ఉంటే , ఎత్తి చూపడమే నా దృక్పథం . మిత్రుల కోసం మళ్ళీ

ప్రచురిస్తున్నాను .
        

  పూర్వం విద్యా- వైద్యం రెండూ సామాజిక అత్యావశ్యకాలుగా గుర్తించి సంస్థలూ , దాతలూ , ప్రభువులూ ఉదారంగా అవసరమైన వ్యవస్థల్ని ఏర్పాటు చేసి ఉచితంగా అందించేవారు . నేడు మన కర్మ కొద్దీ మనచేత ఎన్నుకొన్న మన ప్రజా ప్రభుత్వాలు మాత్రం విద్యనూ , వైద్యాన్నీ వ్యాపార వస్తువులుగా మార్చి ఖరీదయిన అవసరాలుగా చేశారు .

           ఇక అసలు విషయాని కొస్తే -----

నాకు చాలా రోజులుగా ఎడమవైపున కడుపులో మంటగా ఉంటుండేది . ఒకటి రెండు సార్లు డాక్టర్లు ఎండోస్కోప్ చేయించి అల్సర్లేవీ లేవన్నారు . ఒక డాక్టరు మాత్రం ఎండోస్కోప్ లో కనిపించక పోయినా పెప్టిక్ అల్సర్ ఉంది

మీకు అని ఒక కోర్సు మందులు రాయడం , వాడడం , ఉపశమించడం జరిగింది .

            మళ్ళీ ఈమధ్య కని పించే సరికి  - హైదరాబాదులో ఉన్నాంకదా అని – మహానగరంలో పేరొందిన

ఏకైక పెద్ద గ్యాస్ట్రో ఎంటరాలజీ హాస్పిటల్ లో చూపించి బాధనుండి పూర్తిగా విముక్తి పొందాలని ఆశ పడ్డాను .

            ఖాళీ కడుపుతో ఒకరోజు ఉదయాన్నే ఆరింటికి హాస్పిటల్ చేరుకున్నాను . అప్పటికే రిజిష్ట్రేషన్ కౌంటర్

వద్ద చాలా మంది గుమి గూడి ఉన్నారు . ఫీజు చెల్లించి నేనూ రిజిష్టర్ చేయించు కున్నాను . హాల్లో వెయిట్ చేయమన్నారు . తొమ్మిది కావస్తోంది . హాస్పిటలంతా హడావిడి మొదులైంది . సందర్శకులతో , సిబ్బందితో క్రిక్కిరిసి

సికిందరాబాదు రైల్వే ష్టేషన్ లా కనువిందు చేస్తోంది .

           ఈలోగా హాల్లో ఉన్న మైక్ లోంచి చెకింగ్ బ్లాకు లోకి ఆహ్వానిస్తూ కొన్నిపేర్లు ఎనౌన్స్ చేశారు . నాపేరు కూడా ఉండడం గమనించి వెళ్ళాను . ఒక్కో చిన్న చిన్న కేబిన్ లోకి ఒక్కొక్కర్ని పంపించారు . చెకప్ డాక్టర్ రావడంతో

నేను నా గోడు వెళ్ళబోసుకోవడం మొదలెట్టాను . ఆయన విటున్నాడో లేదో నాకయితే అర్థం కాలేదు . చిట్టీ మీద

రాసుకుంటూ పోతున్నాడు . అంతా ఒక్కనిమిషంలో అయిపోయింది . ఆ చీటీ నాకిచ్చి క్యాష్ కౌంటర్ కెళ్లమన్నాడు .

            కౌంటర్లో బిల్ వేసి రు.7900 – కట్టమన్నారు . నేనంత పైకం తీసుకెళ్ళ లేదు . కార్డుంది . తీసిచ్చాను .

పైకం జమ చేసుకుని , ఎండోస్కోపీ యూనిట్ కెళ్ళమన్నారు . ఎండోస్కోపీ తదుపరి , బ్లడ్ శాంపిల్ యూనిట్ ,

అల్ట్రా సౌండ్ స్కానింగ్ ఇవన్నీ అయ్యేసరికి పన్నెండు దాటింది . ఇంకా కొలనో స్కోప్ మిగిలే ఉంది . అప్పటి వరకూ

ఏమీ తిన లేదు , తాగలేదు . ఖాళీ కడుపే . ఓరి దేవుడా ఏమిటీ ఖర్మ అనుకుంటూ కొలనోస్కోప్ కోసం విచారించాను .

             హాస్పిటల్ మందుల షాపు చూపించి కొలనోస్కోప్ కిట్ కొని తెమ్మన్నారు . మంచినీళ్లు లీటర్ బాటిళ్ళు

రెండు కొనమన్నారు . కిట్ లోని టాబ్లెట్ మింగించినారు . ఒక్కొ లీటర్ లో రెండు పొట్లాల పౌడర్ కలిపి అరగంటకోసారి

తాగమన్నారు . అరగంట తర్వాత మోషన్స్ మొదులౌతాయి . పది పన్నెడు సార్లు మోషన్స్ తరువాత రండి . సెకండ్ ఫ్లోర్ లో కెళ్లండి . అంతా అర్థమౌతుంది . సాయంత్రం ఐదు తర్వాత కిందికి రండి అన్నారు .

            అన్నీ సిధ్ధం చేసుకుని సెకండ్ ఫ్లోర్ చేరే సరికి మిత్రులు ఆడా మగా చాలా మందే ఉన్నారు . నేనూ వారితో చేరి నరకంలో విహరించాల్సి వచ్చింది ఐదు వరకూ .

            కొలనో స్కోపీ యూనిట్ లోకి వెళ్లి టెస్ట్ పూర్తి చేసుకుని బయట పడే టప్పటికి ఏడయ్యింది .

రిపోర్ట్స్ కలెక్ట్ చేసుకునే సరికి ఎనిమిదయ్యింది . అన్నీ నార్మల్ రిపోర్ట్స్ .

            పది పన్నెండు మందిని ఒక్కో డాక్టర్ కేబిన్ కు తీసుకెళ్ళారు . డాక్టర్ సహాయకుడు మాఫైళ్ళు

తీసుకుని అవసరమైన సమాచారాన్ని నమోదు చేసి ఒక్కొక్కర్నీ డాక్టర్ వద్దకు పంపిస్తున్నాడు .

            నేను వెళ్ళే సరికి డాక్టర్ ఫోనులో మాట్లాడు తున్నాడు . నేను వెళ్ళి నిలబడ్డా . ఉలుకూ పలుకూ లేదు .

నిలబడే ఓపికలేదు . వయసా అరవై మూడు . రోజంతా ఉపవాసం . పైగా కొలనోస్కోప్ ప్రిపరేషన్ కోసం పది పన్నెండు సార్లు .......

            ఫోను సంభాషణ పూర్తయినట్లుంది . ఫైలందుకుని డాక్టర్ ఏదో రాస్తున్నట్లనిపించి , నేను నాగోడు

వెళ్ళబోసుకుంటున్నాను . వింటున్నట్లు లేదు . విన్నట్లు లేదని మళ్ళా మొదలెట్టేను . మందులు రాశాను కదా  అన్నాడు , ఇక వెళ్లమన్నట్లు చూచి . బెల్ కొట్టేడు , ఇంకొకర్ని పంపమని .

           తీరా ఏమి రాశాడా అని చూస్తే , పది మందుల పేర్లు టైప్ చేసిన ఒక స్లిప్ నా ఫైల్లో అంటించి ఉంది .

పేర్లకు ముందున్న బాక్స్ లలో ఈయన గారు సింపుల్ గా టిక్కులు కొట్టేడు . నాకేమనిపించిందంటే అసిస్టెంట్

మందుల స్లిప్పంటించడం , డాక్టర్ టిక్కులు కొట్టడం తప్ప వీళ్లకే అధికారాలూ లేవేమో అని .

           అంటే ఈ పేరు మోసిన హాస్పిటల్లోకి అడుగిడితే మనంచెప్పేది అస్సలు వినరు . అక్కడున్న దాదాపు

అన్ని టెస్టులూ వాయించేస్తారు . మందుల చీటీలు ముందే అంటించి మందులు అమ్మేసుకుంటారన్నమాట .

           ఏమిటో అంతా మాయాజాలం . మరి రోగం కుదిరిందా అంటే , కుదిరితే ఈ సోదంతా ఎందుకూ .

జాలంలో చిక్కుకుంటే గాని తత్త్వం బోధపడదు కదా !

                          వైద్యో నారాయణో ‘ హరీ ‘   -  అని సరిపుచ్చుకుందాం . 

ఇదీ _ కార్పొరేట్ హాస్పిటల్స్ దందా . దగా .

తస్మాత్ జాగ్రత్త .

తాపము హరియించువాడు .....

రూప గుణ యశో విభవము
లా పరమాత్మకు వినూత్న మై వెలుగొందున్
పాపా ! గోదా ! యతడే
తాపము హరియించువాడు తరతరములకున్

పరతత్వము చేరంగా .....

పరతత్వము చేరంగా
వరతప మొనరించి భక్తవరులు పరమునిన్
సురుచిర తన్వర్థమిటుల
తరుణీమణి రాధికవలె దాల్తురు చేరన్ .

అందరున్నత కులజులే .....

హస్త సాముద్రికం బందించి భవితను
నేడె కళ్ళకు గట్టు నేర్పరొకడు
జ్యోతిష్యము మనుష్యజాతికి తగిలించి
గతుల నాపాదించు ఘను డొకండు
పేరును సంఖ్యగా పేర్చి యిట్టటు మార్చి
నెంబరు గేమాడు నేర్పరొకడు
తాయెత్తు గట్టి మంత్రాలు మాయ లొనర్చ
నేమమ్ము గల మహనీయు డొకడు

అంద రున్నత కులజులే , అందులోను
శాస్త్ర పాండితీ ధిషణులే ,  చదువు నింత
ఘనముగా వాడుచున్నారు కడుపు కొఱకు
వారి ఘనతకు శతకోటి ప్రణతు లిడుదు .

ఆ వొడ్డూ పొడుగూ ....

ఆ వొడ్డూ పొడుగూ, ఆ
శ్రీవత్సము , పొగడదండ , శ్రీవంశీగా
నావన మోహన శుభతను
పావనమంగళ మనోఙ్ఞ భవ్యవిలాసాల్

ఎందే గంటిమ కష్ణా ?
అందమునకు అతివలండ్రు , అది నిజమా , కా
దందమునకు నీ రూపమె ,
డెందము పరవశమగు , మరుడే సరి రాడే !

రాధారాధితవంశీ
శోధన విధి గాంచు కృష్ణ ! శోభన మూర్తీ !
మాధవ ! రమాధవా! మధు
సూధన ! పరమాత్మ ! శ్రీయశోదానందా !

ఆ నలుగురు .....

భజన సేయ పావనికన్న భక్తు డేడి ,
రక్షసేయ రామునికన్న రాజు లేడు ,
తలప సీతకన్న కొలువ తల్లి లేదు  ,
అన్నసేవ లక్ష్మణుకన్న ననుజు డేడి .

సొగసు జూడ తరమా .....

నగుమోము నిగనిగల్ ధగధగా మెరయు నీ

సొగసుజూడ తరమా జగ దధీశ !

ఆడు తుమ్మెద రెక్క నడచు వినీల నీ

సొగసుజూడ తరమా జగ దధీశ !

మగశిఖి పింఛంపు మౌళి జిలుగుల నీ

సొగసు జూడ తరమా జగ దధీశ !

రమణుల మధ్య చేర నవ మోహనము నీ

సొగసు జూడ తరమా జగ దధీశ !

నంద గోపబాల! నగధర !గోవింద!

కృష్ణ! హరి! ముకుంద! కేశ !వాచ్యు

త! మురళీధరా! జిత మదన రూప! నీ

సొగసు జూడ తరమ జగ దధీశ !

భాగ్యప్రదాతా! నమో🙏.

హే ధాత్రీధరధారి!కృష్ణ!శుభగా!హేదివ్యసన్మంగళా!
రాధామాధవరూపమోహనవపూరాగామృతశ్శోభితా!
గాధాభాగవతా! జగద్గురు! శుభాంగా! అర్థనారీశ్వరా!
భాధాతప్తజనావనా! హరి!నమో🙏భాగ్యప్రదాతా! నమో🙏.

ఏమా పారవశ్యము ?

ఆ నీల మోహన తనూ
ధ్యాన పరవశయయి, సీత, యాతని మెడలో
పూని వరమాల వేయదు ,
ఊని చెలియ తాకుదాక, నూహాంతరయై .

నమో🙏సూర్యనారాయణా !

నమో🙏సూర్యనారాయణా !
.....................................

ఇనుడు చంద్రుండు పుడమి ఒకే వరుసకు
వచ్చిన ఖగోల అద్భుతం బదిగొ కనుడు ,
పుడమిపై సూర్యకిరణాలు పడు విధమ్ము
నడ్డుకొని యడ్డునిల్చు చంద్రగ్రహమ్ము .

ఇందువలన మరే మార్పు చెంద దవని ,
ఇది ఖగోళ సహజ చర్య , ఎవ్వియును న
నూహ్య కష్ట నష్టాలు వినూత్నములును
సంభవించ వాందోళన జనగ వలదు .

ఆరాశివారు చెడుదురు ,
ఈరాశులవారు లబ్ధి కెక్కుదు రనుచున్
నోరేసుక కార్తాంతికు
లూరక తెగవాగుచుందురు , వలదు వినగా .

సూర్యునికి గ్రహణ మేమిటి ?
ఆర్యా ! పరిపూర్ణ శక్తి కాద్యుండు , సదా
శౌర్యప్రతాప తాప సు
కార్యౌదార్యోజ్జ్వల ప్రకాశుడు మనకున్ .

వందే కృష్ణం పరాత్పరం .....

శిఖిపింఛ వలయిత శీర్ష కుంతలభార

విపినప్రసూనాక్ష వీక్షితుండు

గిరిధాతు చిత్రిత తిరుతిలక మనోఙ్ఞ

వర రుచిర నిటల వర్ణితుండు

అమృత మ్మొలుక వేణు వనయమ్ము మ్రోయించు

లావణ్య రూప విలాసితుండు

బాల తమాల వినీల మంగళ తనూ

ప్రభల చెలంగు పరాత్పరుండు

నందబాలుండు , కృష్ణుండు , నగధరుండు

వాసుదేవుండు , గోగోప వర సఖుండు

గరిమ గీతోపదేశ జగద్గురుండు

మదిని సాక్షాత్కరించె నమస్కరింతు .

డాక్టర్లు ఆర్గురు .....

ఇనుడు, విశ్రాంతి, వ్యాయామ, మెంచు తిండి,
ఆత్మవిశ్వాసము , హితులు నరయ మనకు
వైద్యు లార్గురు పుడమిపై వరలు చుండ్రు
చేరగా వెళ్ళు వారికి దూర మవకు .

1. సూర్యరస్మి
2 . విశ్రాంతి
3 . వ్యాయామము
4 . ఎంచుకునే ఆహారము
5 . ఆత్మవిశ్వాసము
6 . స్నేహితులు
ఈ ఆర్గురూ మన ఆరోగ్యాన్ని నిరంతరం పరిరక్షించే
డాక్డర్లు . భగవంతుడు ప్రసాదించిన ఈ ఆరుగురికి సమీపంలో ఉన్నావంటే
నీవు జబ్బుపడవు .

మనభాగ్య మెట్లున్నదో ?.....

మనభాగ్య మెట్లున్నదో ?
        ----------------------------
     2020 యేడాది  భౌగోళిక ప్రమాదాల పుట్టగా
గోచరిస్తోంది . చైనాలో మొదలైన కోవిడ్ వైరస్
ప్రపంచాన్ని వణికిస్తోంది . ఇంకెంతకాలం ? అంటే ,
టీకామందు(వ్యాక్సిన్) కనుగొనబడి ,అది సమర్థంగా
పనిచేసేదాకా ఈవైరస్తో సహజీవనం తప్పదు . ఆర్థికంగా చితికిపోవడం , అస్తవ్యస్తం అనుభవించాల్సిందే . మరోదారి లేదు .
           ఇక , రెండో ప్రమాదాన్ని నాసా హెచ్చరించింది . మామూలుగా ఉల్కలూ , గ్రహశకలాలూ అత్యంత వేగంగా భూమికి సమీపం నుండి
దూసుకు వెళ్ళడం కద్దు . కానీ , ఒక భారీ గ్రహశకలం
భూమివైపుగా దూసుకు వస్తోందనీ , అదిగాని ,
భూమి గురుత్వాకర్షణ ప్రభావానికిలోనైతే , భూగోళం
పై వినాశనం తప్పదనీ ఊహిస్తున్నారు .
           మూడవది . కార్తాంతిక మహానుభావుల
ప్రిడిక్షన్ . వీళ్ళవద్ద నాసా సంస్థకున్న సశాస్త్రీయ సాంకేతిక సరంజామా లేకున్నా , పూర్వపు అనుభ
వాలనుబట్టి ముందస్తు తీర్మాణాలు చేస్తుంటారు .
కురుక్షేత్రయుధ్ధానికి పూర్వం - 14రోజుల వ్యవధిలో
చంద్ర , సూర్యగ్రహణాలు సంభవించడం ఉటంకించి ,
దరిమిలా పరిణామాలను ఉదహరించి ,
ఈ నెలలోకూడా 14రోజులవ్యవధిలో చంద్ర సూర్య
గ్రహణాలు ఏర్పడడం , పూర్వపు దుష్పరిణామాలు
పునరావృతమౌతాయనీ ఊదరగొట్టేస్తున్నారు .
జరుగనున్నది జరుగక మానదు కదా !
       ఐనా , మానవుడు మహామేధావి !? . అనేక
విపరిణామాలను తప మేథోబలంతో ఎదిరి పోరాడి
జీవనం కొనసాగస్తున్నాడు . మరి , మాధవు డనుకూ
లిస్తాడో , లేదో? . మనభాగ్య మెట్లున్నదో ?

హా!తెలిసెన్ .....

హా !తెలిసెన్ కళారహసి , అద్భుతసృష్టికి ' బాపు ' చిత్రముల్
ఖ్యాతివహించు టెందులకొ , యల్లదె రంగులపాత్ర సాచె తా
చేతుల , సీత చిత్రమును శ్రీరఘురాముడు గీయుచుండగా
నాతని శిష్యుడై , యరసె నందున కౌశల మంత నేర్పుతోన్ .

రారా ! మాధవ ! .....

రారా! మాధవ ! రాధతో కలిసి , చేరన్  మా కుటీరానికిన్ ,
కోరన్ కోర్కెల , నచ్యుతా! మధురమౌ  గోవింద నామామృతం
బారంగ్రోలుటదక్క ,నాదొరవు, యీపళ్ళున్, పలారంబులున్ ,
క్షీరంబుల్ గొని  పోదుగాని , హరి ! రాశీభూత ప్రేమాంబుధీ !

అమ్మదొంగ ! నిన్ను నందందు వెదికేను .....

ముగ్ధ మోహన రూపు మునుపెన్న డెరుగను
కృష్ణయ్య! గోపెమ్మ కృపను గంటి
ఘనశ్యామ తనుఛాయ కమనీయ మెరుగను
కృష్ణయ్య! రాధమ్మ కృపను గంటి
మల్లెల సౌరులు – మధుపర్కములు గనన్
కృష్ణయ్య! రుక్మిణి కృపను గంటి
మోవిపై పిల్లన క్రోవి ముచ్చటెరుంగ
కృష్ణయ్య!  గోపన్న కృపను గంటి

అమ్మదొంగ ! నిన్ను నందందు వెదికేను
చిన్నగా మదిలోనె జేరినావ !
చిన్నికన్న ! నిన్ను గోపెమ్మతో జెప్పి
పద్య మందు కట్టి , పట్ట గలను .

తలపున గల 'గమ్య 'మందు....

కలమందున , గళమందున ,
కలలందున , కనుల యందు , కాంక్షల యందున్
పలు పలుకు లేల ? కృష్ణుడు
తలపున గల 'గమ్య 'మందు తానై యుండున్

తల్లీ వందనం .....

భగవంతుని దర్శించగ
మగువా ! నీకన్న ఙ్ఞాని మహి నున్నాడా ?
తగలేయన పలువిద్యలు ?
జగమంతా నీ పదాల సాగిలబడదా ?

ఏదీ వైకల్య ? మువిద
కాదు , దురితకార్యరతులు ఘన వైకల్యుల్ ,
వేదిక లెక్కి ప్రవచనాల్
కాదు వచింప , నొక ధర్మ కార్యము వలయున్ .

పోలేరు పరంజ్యోతి పరమేశ్వరి .

మల్లీశ్వరి ! వరదాయిని
యెల్లన్ లోకములనేలు హేమాంబరి ! శ్రీ
కుల్లూరికి పరదేవత ! ,
తల్లీ ! పోలేరు ! నీకు దండాలమ్మా !

జన్మదినం .....

(జూన్ 5 నాజన్మదినం)
పుట్టిన రోజిది యని .....
------------------------
ఎందుకు జనించితినొ స్వామి ! యెవ్వియును ఘ
నతలు లేవు , కనీసము వెతలు లేని
బతుకు బతికితినా యన్న  - వెతుక - నట్టి
బాట సుతరాము కనరాదు  భాగ్య ధాత !

పుట్టినరో జిదియని యి
ప్పట్టున క్యాలండరు నను పదె పదె గాసిం
బెట్టుచు హసించె , స్వామీ !
పుట్టువునకు సార్థకత్వ పూర్ణత లేమిన్ .

ఒజ్జదన మొక కొంత మేలుజ్జగించి
కాస్త యూరట దొరికెను కమల నయన !
మండు టెండన బడి వచ్చు మనిషి కొకట
చల్ల దొరికిన వడువున జలజనాభ !

ఎంద రీ భూమి బుట్టి సాధించిరి , పురు
షార్థములు , సంశయమె , యైన , నంద రిటువ
లె వగతుర ? సందియమె స్వామి ! , చివరిమజిలి
యైన భయద రహితము శాయంగ రాద !

అంబు జోజ్జ్వల దివ్య పాదారవింద !
నీదు చింతనామృత చిత్త నీమ మొకటె
కడవ బెట్టంగ నావయై గానుపించు
జరను రుజలను దాటంగ , పరమ పురుష !

మూతివిరుపు .....

చేతికి గాజుల గలగల ,
మూతివిరుపు , ముద్దుమోము , ముడిచిన మల్లెల్,
ఛాతీపై వాల్జడయున్,
నాతుల కందమ్ము - కులుకు, నయగారములున్ .