కన్నులానంద ....

 

కన్ను లానంద భాష్పముల్ గ్రమ్మె , నీదు

దివ్యమంగళ మూర్తి దేదీప్యమాన

మయి గనంగ , రామా ! కమల దళాక్ష !

జన్మ ధన్యత గాంచెను , జన జగతికి .

అయోధ్యలో రామప్రతిష్ట సమయం

 

అదిగో ! అయోధ్య రాముడు ,

గది‌సి మందిరములో  , సుఖాసీనుడవన్

ముదితంబగు సమయము , స

మ్ముదితం సయ్యెన్ , నమోస్తు 🙏 మోహన రామా !

నేడు అయోధ్యలో బాలరాముని ప్రతిష్ట

 

రాముని యవతారము  , ఈ

భూమికి రక్షా కవచము ,  పూని వెలిసె , సం

క్షేమము లొసగగ , భారత

భూమి , నయోధ్యను ,  పున్నెపు ప్రోవై .

ఖర్మ సరిలేదో ! ఇంతే !

 క్రిందన నీళ్ళున్నవి కడు ,

స్పందించుచు చెట్టుమధ్య భానుండుండెన్ ,

ఎందుకు మ్రోడయె భూజము ?!

ఎందున ఖర్మ సరిలేదొ , ఇటు తగులవడున్ .

బాలరాముని ముగ్ధమోహనరూపం

 

ఐదేళ్ళప్పటి రాముని ,

మోదపు చిరునవ్వురూపు , మోహనమై , ఆ

పాద శిఖము , జనముల కా

మోదంబై నిలిచె , నెంత ముగ్ధత్వంబో !

కుల్లూరు పోలేరుతల్లి ఆలయం

 పూని , పట్టు బట్టి  , నేను సంకల్పించి 

ఊరి జనము నంత , నొకటి జేసి

కోరి కట్టి నట్టి  ' కుల్లూరి పోలేరు

తల్లి '  ఆలయమ్ము   తనరె నిదిగొ !

సర్వము తానయైన వాడెవ్వడు ?

 

అతడి నుదుటి చిచ్చు , అనితర సాధ్యమ్ము

తగుల బెట్టును , విశ్వజగతి నెల్ల 

అతడి గళమున గల , ఆ కాలనాగులు

కాల గమనమును కాటువేయు ,

అతడి తోడ నడచు , నతుల త్రిశూలమ్ము

పుడమి నడయాడెడు , చెడును బొలియు

అతడి చే దిరుగాడు , నరిది డమరుకము

నరుల నడతల  , హెచ్చరిక సేయు

హరు డతండు , విశ్వగురు డతండు , కడు  సం

హరు డతండు ,  కలడు ,   నరుడ ! ' నేనె

శక్తిమంతుడ '  నన జనకు , ఈ విశ్వమ్ము

ఈ శ్వరుని తలపున , నేల బడెడు .

హరి సాయుజ్యము

 

ఆ యెదలో , కొలువై హరి ,

తీయని కలలోకి జారె ,  తెరువదు , తెర వీ

హాయిని పాయని , పరవశ

సాయుజ్యము చెందె , నెంత సరస హృదయ యో !

నేను నిర్మిస్తున్న అమ్మవారి ఆలయం

 మా కుల్లూరు గ్రామంలో నిర్మాణంలోని

శ్రీశ్రీశ్రీ పోలేరు తల్లి ఆలయం .

చేదు గలుగు గాక ....

చేదు గలుగు గాక , చిట్టి కాకర కూర ,

చేయి తిరిగి నట్టి స్త్రీలు వండ ,

రుచి యమోఘము , పలు రోగ బాధల నుండి

ముక్తి గలుగు , షుగరు వోవు తొలగి .

జడ తడిచె .....

 

జడ తడిచె , నొడలు తడిచెను

ఒడలికి ముడిబడిన కట్టు టుడుపులు తడిచెన్

కడదాకా ఉడుపుల బడు

మడత మడత లోని సొగసు మరిమరి తడిచెన్ .

తెల్గునేల సంబరాలు

 

పడగలువిప్పి, నాలుకలు పైపయిచాచి, మహోజ్జ్వలాకృతిన్,

గడపల ముందు, మంటలు సెగల్ వెలిగ్రక్కుచు, భోగి పర్వముల్

నిడు గన నౌను, తెల్గు కమనీయ మనోఙ్ఞత, పల్లెటూర్లలో,

సడులబెడంగునన్, మకరసంక్రమణానికి ముందు సందడుల్ .

ముక్కోటి శుభాకాంక్షలు

 

వైకుంఠవాస కృష్ణా !

రాకా శశి వాసుదేవ !  రారా భువికిన్

ఏకాదశి శుభ దినమున

నీ కాళ్ళను తాకి మ్రొక్కి నెమ్మి తరింతున్ .

దగ్గుకు చిట్కా 👌😀

 

వెల్లుల్లి దంచి , పలుచటి

తెల్లని చిరు వలువలోకి ,  తీర్చిన మూటన్ ,

అల్లన వాసన జూచిన ,

మెల్లగ కఫమెల్ల దొలగు , మేలగు కృష్ణా !

మా అమ్మ

 

బంగారు పేటంచు పట్టుపుట్టము గట్టి ,

రత్నాల హార సరాలు దొడిగి ,

మణికిరీట ప్రభామయ , మయూఖ రుచిర ,

దివ్యమంగళ రూపు తేజరిల్ల ,

వజ్రాలు పొదిగిన వడ్డాణము మెరయ ,

కాలి యందెలు ఘల్లు ఘల్లురనగ ,

పసుపు గంధపు పూతపై , కుంకుమంబద్ది

ఫాలభాగమ్ము శోభనము గూర్చ ,

లేచి , ననుజూచి , వచ్చి , పోలేరు తల్లి

బిడ్డడా ! రార , యని బిల్చు ప్రేమతోడ ,

బ్రమయొ , పిచ్చియొ గానిండు ,  ప్రతిదినంబు

అమ్మవాకిట జేరి ప్రణామ మిడగ .

కవి - పండితులకు కప్పు అల్లం టీ

 

అరయ నిమిష నిమిష , మాయుష్షు తరిగేను ,

దేహ ముండు వరకె దేనినైన ,

చేసి , ఘనత పొందు , చిరకీర్తి సాధించ ,

బతుకు గలదు చావు పైన , కృష్ణ ! 

ఘనులము ధిషణగల కవిపండితుల మంచు

మనల మనము వొగిడి మనుట కాదు

అరసి జనుల కొఱకు అవసర మగుపనుల్

ఒక్క టైన జేసి యొనర వలయు .

హితుడా !

 

నిదుర లేవంగనే  నిలువడి పరమాత్మ

యెదుట చేతులు జోడించు హితుడ !

భక్తిపాటల ననురక్తిగా చెవుల క

మంద సుఖానందమందజేయి ,

స్నానాదికాల ప్రస్తానములు ముగించి

దేవదేవుని గొలుము తీరినంత ,

పనికి వెళ్ళి పనిని భగవదత్తముగాగ

కష్టపడి యొనర్చు మిష్ట మొదవ ,

ఆలుబిడ్డలె తొలి ప్రాధాన్యతలుగ

ప్రేమలను పంచు మదియె శ్రీరామ రక్ష !

తల్లి దండ్రుల మరువకు , ధర్మ మరసి

సమ సమాజ హితము గోరి సాగు మిత్ర !

శ్రీ శ్రీ శ్రీ కుల్లూరు పోలేరు పరమేశ్వరి ఆలయ పునర్ణిర్మాణం

 

వందేళ్ళాయెను అమ్మకోవెలకు , సేవాదృక్పథంబుండుటన్,

ముందేపూని , గుడిన్ వినూత్నముగ , సొంపుల్గుల్క నిర్మించ నా

నందంబయ్యెడు , ఊరివారి తగు సాహాయ్యంబు లభ్యంబయెన్ ,

బంధం బివ్విధి తల్లితో తనర  ప్రాప్తంబయ్యె నీ జన్మకున్ .

ప్రేమ బోండాము

 

అంగజుడు ఖంగుతినవలె ,

శృంగారపు భంగు ' ఇటుల ' సిరు లొలికించెన్ ,

హంగుగ కొబ్బరి నీరము ,

రంగార సతీముఖీన , రమణుని జేరెన్ .

సిగలో మిర్చి మాల .....

 

మగడా ! మల్లెల కంటే ,

సిగలో ఈ మిర్చి మాల సింగారము , నీ

మగసిరి సెగ రగిలించును  

అగణితముగ రాగ బంధ మతిశయమొందున్  .

ముల్లు , గనంగ , లేదె .....

 

ముల్లు గనంగ, లేదె , నవమోహన! ముగ్ధవయోగభస్తి    రా

జిల్లెడు మోహనాలు , వికసించెడు మేని నిగారు సౌరులన్

విల్లున దొడ్గి నల్దెసల వేయ, గమించెడు లాగు దోచెడిన్

కల్లరి మన్మధుండు మొనగాడుగదే! నిను తూపుగాగొనెన్ .

మదనవిశిఖ

 

కురు లారబోసి , చూపుల

మరుతూపుల మోహనాలు , మదిలోతులలో

సొద దెలుపగ ,  ' మదన విశిఖ ' ,

పెదవులతో పైట చాటు పిలుపులు బంపెన్ .

చెంపకు చేయి సేర్చి .....

 

చెంపకు చేయిసేర్చి ,అతసీ కుసుమాభ ముఖీ మనోఙ్ఞ , రా

గంపు పెదాల వంపుల నిగారము మోహనమై సెలంగగన్,

సొంపుగ బుట్ట కమ్మలొకచో తనసోయగముల్ వెలార్చగన్

ఇంపులుగుల్కుచున్ కనులొకించుక దేనినొగాంచు తన్వియున్ .

వలపు వానచినుకు

 

చినుకు తాకి నంత చెలికాని చేస్పర్శ

మోహనాలు విరిసె మోము పైన ,

వలపు విరుల వోలు వాన చినుకు మురువు

కడు మనోఙ్ఞ ప్రకృతి గద ! పుడమిని .

HAPPY DIWALI

 

తినుట తాగుట కేన ఈ మనుజ జన్మ ?

చేయ ఘనకార్య మింకేమి చేత నవద  ?

పడిన తదనంతరమ్మును బ్రతుకు గలదు ,

దేహ మున్నప్పుడే దాన్ని సాధింప వలెను .