పోలేరు పరంజ్యోతి పరమేశ్వరి .

మల్లీశ్వరి ! వరదాయిని
యెల్లన్ లోకములనేలు హేమాంబరి ! శ్రీ
కుల్లూరికి పరదేవత ! ,
తల్లీ ! పోలేరు ! నీకు దండాలమ్మా !

జన్మదినం .....

(జూన్ 5 నాజన్మదినం)
పుట్టిన రోజిది యని .....
------------------------
ఎందుకు జనించితినొ స్వామి ! యెవ్వియును ఘ
నతలు లేవు , కనీసము వెతలు లేని
బతుకు బతికితినా యన్న  - వెతుక - నట్టి
బాట సుతరాము కనరాదు  భాగ్య ధాత !

పుట్టినరో జిదియని యి
ప్పట్టున క్యాలండరు నను పదె పదె గాసిం
బెట్టుచు హసించె , స్వామీ !
పుట్టువునకు సార్థకత్వ పూర్ణత లేమిన్ .

ఒజ్జదన మొక కొంత మేలుజ్జగించి
కాస్త యూరట దొరికెను కమల నయన !
మండు టెండన బడి వచ్చు మనిషి కొకట
చల్ల దొరికిన వడువున జలజనాభ !

ఎంద రీ భూమి బుట్టి సాధించిరి , పురు
షార్థములు , సంశయమె , యైన , నంద రిటువ
లె వగతుర ? సందియమె స్వామి ! , చివరిమజిలి
యైన భయద రహితము శాయంగ రాద !

అంబు జోజ్జ్వల దివ్య పాదారవింద !
నీదు చింతనామృత చిత్త నీమ మొకటె
కడవ బెట్టంగ నావయై గానుపించు
జరను రుజలను దాటంగ , పరమ పురుష !

మూతివిరుపు .....

చేతికి గాజుల గలగల ,
మూతివిరుపు , ముద్దుమోము , ముడిచిన మల్లెల్,
ఛాతీపై వాల్జడయున్,
నాతుల కందమ్ము - కులుకు, నయగారములున్ .

అమృతఫలాలు .....

అమృత ఫలాలు
--------------------
అమృతఫలాలివి , వీటిని
సుమశరు డింద్రుని వనమున చూచి , పుడమికిన్
రమణి రతీదేవి కొఱకు ,
శ్రమపడి కొనితెచ్చె రాగ రంజితు డగుచున్ .

రుచికి పడి , రతీ దేవి వ
లచి తన వనమున యమృతఫలమ్మును విత్తెన్ ,
సచిపతి కిష్ట ఫలదమగు
యచలము మదనాలి యింట నమరెను తరువై

వలరేని చెలిమికాడగు
వలపు వసంతుం డచటికి వచ్చెను , రాగా ,
కలయో మాయో తెలియదు ,
విలసిల్లెను చెట్టు పూప పిందె ఫలాలన్ .

మావి పండు తిన్న మన్మథ పతిసతుల్
మదన మోహ ఝరుల మరులు గొనిరి ,
మధుర ఫలము మహిమ మదనాయితమ్మను
నిజము తెలిసె , దివిజ రుజయు దెలిసె .

భూలోక మంత మావుల
జాలము నాటించి చిత్తజాతుడు , మిథునా
లోల సరాగాలాలస
లీలల పండించె , సృష్టి లీల లివేగా .

ఎందాకా ఈ రోగపు .....

ఎందాకా ఈరోగపు
కుందున బతుకంగ వలయు కువలయ మంతా ?
ఎందాకా వ్యాక్సిన్ మన
కందునొ నందాక , తప్ప దందురు విఙ్ఞుల్ .

మా మా పరాక్రమమ్ములు
ధీమమ్ములు తేలిపోయె , తిరుమల వాసా !
నేమమ్మున నిను గొలుచుటె
భూమి జనుల బాధ తీరబోవు పథమ్మౌ .

గూడొదిలి , కూటికోసము
వేడుచు , పరదేశ మొచ్చి , వేసట పడి , పో
రాడిన పక్షుల కిప్పుడు
గూడే దిక్కను నిజంబు గొప్పగ దెలిసెన్ .

చేతులకు శానిటైజర్ ,
మూతికి మాస్కున్ ధరించు , పూస్కో రాస్కో
బోతివ , జనాల వెంబడి ,
గోతికి చేరువ యగుటయె , గూడే భద్రమ్ .

అల్లో లక్ష్మణ .....

వోటేసిన వారి నడుగు ,
వోటు గొనిన వారు గెలిచి పొడిచిన దేమో ?
నేటి రహదార్లు నుడువును ,
ఏటికి ఈ చేతగాని యేలికల పనుల్ ?

అల్లో ! లక్ష్మణ ! యనుచున్
పిల్లల పెండ్లాము తోటి , వేలాదిగ , రో
డ్లల్ల నడుచు ఓ సోదర !
ఇల్లిదె ' పేకేజి ' కాటి కెల్లే కిత్తుమ్ .

ఇవి కనపడ వే నేతకు ,
ఇవి వినపడ వే ప్రభుత్వ యేలికలకు , లే
నివి , యున్నవి పేకేజిలు ,
వివిధ గణాంకాలు చెప్పి వేధింపు బలే .

భూలోకము తన సొత్తని .....

భూగోళము తన సొత్తని
రేగి మనిషి ప్రకృతి నిట్టిరీతిని చెరుచన్
పోగాల మెదురు నిలిచెను
రోగాలకు జడిసి ఇంటిలో పడవలసెన్ .

రోడ్లు పట్టణాలు లోలాక్షులు పసుల్
గుంపులు చరియించు సొంపు జూడ
మనిషి అడ్డు తొలిగె నని మహదానంద
పడెడు లాగ దెలియు పసుల తీరు .

కేశవా ! .....

కేశవా ! గుట్ట నెత్తితివని కీర్తిగాన
మున మునిగెదేల రా? లోకముల భరించు
నిన్ను చూచుకముల నెత్తు నన్ను వొగడ
రేమిర ? యవునులే , నాకదృష్ట మేది ?

అనురాగ రాగ రంజిత .....

అనురాగ రాగ రంజిత

ఘనులీ పరమాత్మ జంట , కమనీయ ఘనం

ఘన రమణీయము చిత్రము ,

కనులకు విందై చరించు కామిత మిచ్చున్ .

పురుషోత్తమ ! కృష్ణ ! నమో 🙏 .....

పురుషోత్తమ కృష్ణ ! నమో 🙏 ,
పరమాత్మా కృష్ణ ! శుభద భాగవత! నమో🙏 ,
వరదాయక కృష్ణ! నమో 🙏 ,
సరసీరుహ నేత్ర కృష్ణ జగదీశ ! నమో 🙏 .

యోగీంద్రచంద్ర కృష్ణా ! .....

యోగీంద్ర చంద్ర కృష్ణా !
రాగజలధి దేలు రసిక ! రాధిక కృష్ణా !
భోగీంద్రశయన కృష్ణా !
శ్రీ గానామృత విహరణ చిత్తా ! కృష్ణా  !

త్రిభువన మోహన కృష్ణా !
అభవాది నిలింప సేవ నావన కృష్ణా !
శుభకర ! రుక్మిణి కృష్ణా !
అభయప్రద ! వాసుదేవ ! హరి ! శ్రీ కృష్ణా !

బృందావన మధుబనిలో
నందిత గోపాల ! కృష్ణ ! నారాయణ ! నీ
మందిర మీ హృన్మందిర ,
మిందుండుము , కృష్ణ ! నీదు మేలు భజింతున్ .

శ్రీ మధురాధిప ! కృష్ణా !
మా మనసులు గెలిచినట్టి మాధవ ! కృష్ణా !
హేమాంబర ధర ! కృష్ణా !
ప్రేమాగమ సృష్టికర్త ! ప్రియ ! శ్రీకృష్ణా !

ఈ లలితాంగి మేని విరు .....

ఈ లలితాంగి మేని విరు పిక్షు శరాసన పొంకమున్ బలెన్ ,
ఈ లలితాంగిసోయగ సకృత్ రతిరూపవిలాస భాసమై
ఈ లలితాంగి చెంగుభిగి హెచ్చులు మెచ్చులు దెచ్చు నంచు శ్రీ
లోలుడె చేష్టితాలుడిగి లో చకితాననుడైతపించెడిన్ .

ఏమా మోహన రూపము .....

ఏమా మోహన రూపము !
ఏమా మోహన మనోఙ్ఞ హేమాంబరమున్ !
ఏమా మోహన గానము !
శ్రీమాధవ ! నిన్నుబొంది  సిరినైతి నెదన్ .

నారీ రత్నము .....

శ్రీ రాజిల్లు ముఖాంబుజంబుల నగుల్ , చేతోసుధాశ్రీలు జాల్
వారన్ , నాసికలందు ముత్యపు సరుల్ భాస్వంతమై పర్వగాన్ ,
ధీరాచ్ఛాద శిరోవిభూషణములున్ తీరై తలల్ గుల్క , ఈ
నారీరత్నము లెల్ల , సత్య లయి కన్పట్టంగ , కేల్మోడ్చెదన్ 🙏 .

ఇవిగో మల్లెలు .....

ఇవిగో ! మల్లెలు , మండుటెండలకునూ ఈపూలకున్నేదియో
రవియున్ గాంచని గోప్యబంధజితమౌ రాగంబు గన్పట్టెడిన్ ,
జవరాండ్రన్ తలలెక్కి  చొక్కి ధవులన్ సాధించగా కుట్రయో ?
యవనిన్ గంధపరీమళంపు జిగితో నాహ్లాదమున్ జేయుటో ?

ఏమిచ్చి తీర్చుకునే మాత్మబంధూ !

                   
             🙏🙏🙏🙏🙏

ఏమిచ్చి తీర్చుకునే మాత్మబంధూ ! స
ఫాయన్న ! నీ సేవ పావనమ్ము
ఏమిచ్చి తీర్చుకునే మాత్మబంధూ ! హ
రీ ! వైద్యనారాయణా ! విజయుడ !
ఏమిచ్చి తీర్చుకునే మాత్మబంధూ ! వి
విధవైద్య సేవికా ! విమల మతివి
ఏమిచ్చి తీర్చుకునే మాత్మబంధూ ! పు
లీసయ్య ! నీ విధు లెంతొ ఘనము

ఈ సమాజపు బతుకుల కోస , మిటుల
మీ యసువులు ఫణము బెట్టి చేయు విధుల ,
కీ సమాజము మీకేమి యిచ్చి , తీర్చు
కో గలదు  , చేతు లెత్తి 🙏 మ్రొక్కుటలు దప్ప .

నోరార భజింతు పద్యముల .....

శ్రీరమణీ వినోద ! సరసీరుహ లోచన ! కృష్ణ ! రుక్మిణీ
శ్రీరమణా! శుభాంగ! మురళీమృదుగాన మనోహరా ! హరీ !
కోరిన పాలువెన్నలును కూర్మి నివేదనసేతు రార , నో
రార భజింతు పద్యముల , రార శుభంకర ! మోహనాకృతా !

తరుణగోపికల్ హరికి .....

మురళి చేకొని రాధ మోవికి తాకించె
వీణ వాయించె ప్రవీణ యొకతె
పృదు మృదంగము విన్చె మదవతి యొక్కతె
పటుతర వాద్యాన పాడె నొకతె
కస్తూరికా చర్చ గావించె నొక్కతె
గంధ లేపనము నలందె నొకతె
పూర్ణకుంభము బట్టె పూబోడి యొక్కతె
హారతిచ్చె నొక్క నీరజ ముఖి

దండ కైసేసె గళసీమ తరుణి యొకతె
భువళమోహను కృష్ణుని పొంత మూగి
తమ యదృష్టపు భాగ్యము దలచి తలచి
తరుణ గోపికల్  హరికి బృందావనమున

సరసమైన ....

సరసమయిన విరసమయిన
సరసీరుహనేత్ర ! నీదు సరసనె నుండన్
పరమాత్మా ! మాకిష్టము
తరియింతుము దేవ ! నీదు తలపులయందే .

నిను ధ్యానించిరి .....

నిను ధ్యానించిరి యెందరో బుధులు , కానీ వారిలో పోతరా
జును , త్యాగయ్యయు తెల్గువారిని సుధాస్తోకాంబుధిన్ ముంచి , నీ
ఘనతల్ బాడిరి , పద్యకీర్తనములన్  , కైవల్యమున్ బొందినా
రనఘుల్ , రామ ! దయాబ్ధిసోమ ! మము చేరన్ దీయరా ! మాధవా !

తల్లి సేవతో జన్మమ్ము ధన్య మయ్యె .....

            వెంకట రాజారావు . లక్కాకుల

చీర్ల శింగరయ్య శెట్టి డొనేషను
కట్టె , నతని పేర ఘనము గాగ
అప్పు డెపుడొ యిచట హైస్కూలు పెట్టిరి
చదువు లన్న నెంత చవులు ప్రజకు !

నెల్లూరికి దూరములో
కుల్లూరున స్కూలు బెట్టి కూడా యరువై
యేళ్లకు పైగా గడచెను
యెల్లర కిది చదువు జెప్పె నీ ప్రాంతములో .

నలభయ్యేడు స్వతంత్రము ,
నలభై తొమ్మిదిన స్కూలు నడిపించిరి పె
ద్దలు మా కుల్లూరున తా
వెలుగులు విరజిమ్ము చుండె విద్య గరపుచున్ .

తల్లీ ! నిన్ను దలంచి పుస్తకము చేతన్ బూనితిన్ , నీవు నా
యుల్లంబందున నిల్చి , జృంభణముగా నుక్తుల్ సుశబ్దంబు శో
భిల్లం బల్కుము , నీదు వాక్కునను సంప్రీతిన్ , జగన్మాతరో !
కుల్లూరున్నత పాఠశాల యన నీకుంగీర్తి చేకొందుమే .

నా డీ ప్రార్థన పద్యము
పాడితి మట , ప్రతి దినమ్ము పరవశమున , నా
పోడుములకు గురువులు పో
రాడిరి , కామయ్య గారు వ్రాసిరి దీనిన్ .

ఏ పాఠశాల నా కెంతయు విఙ్ఞాన
మిచ్చి గురు స్థాన మెక్క జేసె
ఏ పాఠశాల నా యెదుగు దలకు నిల్చి
బుధ్ధులు గరపె ప్రాపులు వహించి
ఏ పాఠశాల నాకింత బ్రతుకు దెరు
వొసగె నిచ్చెన యయి స్ఫూర్తి నిచ్చి
ఏ పాఠశాల తా నీప్రాంత ప్రజలకు
విద్యా ప్రదాతయై వినుతి కెక్కె

నట్టి హైస్కూలు ' హెచ్ యం ' గ నరిగి , నాటి
గొప్ప దనములు సాధించు కొఱకు పూని ,
పూర్తి సాఫల్య ఫలములు పొంది నాను
తల్లి సేవతో  జన్మమ్ము  ధన్య మయ్యె .

మము రక్షింపగ .....

మమురక్షింపగ వింటినీశరమునూ మంత్రించిసంధించుచున్
సమకట్టంగ గనంబడెన్ , జగతి రక్షాదక్ష  , రామ ప్రభో !
క్షమ యీ ధాత్రి , రుజోరగానన విషస్థావస్థయై , స్వస్థతా
క్రమముల్ గోల్పడె , మాకు స్వాస్త్యముల రాకన్ గూర్చుమా , రాఘవా !

కంటిన్ కాముని తండ్రి .....

కంటిన్ కాముని తండ్రి మాధవుని రాకాకాశ చంద్రోజ్జ్వలున్
జంటన్ రాధిక వెంటరాన్ మురళి గానాలాపనానందితున్
మంటిన్ మింటను నెల్ల ప్రాకృతుల క్షేమస్తోమ సంరక్షకున్
గంటిన్ కృష్ణహరిన్ జగద్గురుని నా కన్నుల్ కుతుల్ దీరగన్ .

పూలుకోయంగ .....

పూలు కోయంగ వచ్చి , ఓ పుణ్యపురుష !

నీవు  తరుశాఖ నిదురోవ , నీరజ ముఖి

రాధ పట్టి యూపెడు గంటివా ? పట్టు విడిన ,

పట్టుకొను నాశ ,  దొరికితి విట్టులైన .

కేశవా ! .....

కేశవా ! గుట్ట నెత్తితివని కీర్తిగాన
మున మునిగెదేల రా? లోకముల భరించు
నిన్ను చూచుకముల నెత్తు నన్ను వొగడ
రేమిర ? యవునులే , నాకదృష్ట మేది ?