సుజన - సృజన

19, నవంబర్ 2022, శనివారం

ముల్లు , గనంగ , లేదె .....

ముల్లు గనంగ, లేదె , నవమోహన! ముగ్ధవయోగభస్తి రా

జిల్లెడు మోహనాలు , వికసించెడు మేని నిగారు సౌరులన్

విల్లున దొడ్గి నల్దెసల వేయ, గమించెడు లాగు దోచెడిన్

కల్లరి మన్మధుండు మొనగాడుగదే! నిను తూపుగాగొనెన్ .

14, నవంబర్ 2022, సోమవారం

మదనవిశిఖ

కురు లారబోసి , చూపుల

మరుతూపుల మోహనాలు , మదిలోతులలో

సొద దెలుపగ , ' మదన విశిఖ ' ,

పెదవులతో పైట చాటు పిలుపులు బంపెన్ .

9, నవంబర్ 2022, బుధవారం

చెంపకు చేయి సేర్చి .....

చెంపకు చేయిసేర్చి ,అతసీ కుసుమాభ ముఖీ మనోఙ్ఞ , రా

గంపు పెదాల వంపుల నిగారము మోహనమై సెలంగగన్,

సొంపుగ బుట్ట కమ్మలొకచో తనసోయగముల్ వెలార్చగన్

ఇంపులుగుల్కుచున్ కనులొకించుక దేనినొగాంచు తన్వియున్ .

2, నవంబర్ 2022, బుధవారం

వలపు వానచినుకు

చినుకు తాకి నంత చెలికాని చేస్పర్శ

మోహనాలు విరిసె మోము పైన ,

వలపు విరుల వోలు వాన చినుకు మురువు

కడు మనోఙ్ఞ ప్రకృతి గద ! పుడమిని .

24, అక్టోబర్ 2022, సోమవారం

HAPPY DIWALI

తినుట తాగుట కేన ఈ మనుజ జన్మ ?

చేయ ఘనకార్య మింకేమి చేత నవద ?

పడిన తదనంతరమ్మును బ్రతుకు గలదు ,

దేహ మున్నప్పుడే దాన్ని సాధింప వలెను .

16, అక్టోబర్ 2022, ఆదివారం

నలుపు నారాయణుడు మెచ్చు

తుమ్మెద పిండు రెక్కలను దోచిన తీరు కురుల్ ,వినీల పూ

లమ్ములు దూసి , మన్మధుడు ఆయువు పట్టుల కేసి కొట్టిన

ట్లమ్మడు తేనెతుట్టివలె లాలస వెట్టెడు , జూచితే ! ,యిలన్

నమ్మరుగాని నల్పు లలనల్ మరుతూపులు , గుండె చీల్చెడిన్ .

15, అక్టోబర్ 2022, శనివారం

వాన సుందరి

మోమొక కొంత పైకి , అర మూతలు వడ్డవి కళ్ళు , చేతిలో

మో మటు లైన ఛత్రమున , మోహన యోర్తు , తనంత వానలో

గోముగ నెత్తి దడ్వ , చినుకుల్ దిగజారి , మనోఙ్ఞ సీమలన్

పాముచు కిందికిన్ దిగెడు , భాగ్యము ఆమెద ? వానచిన్కుదా ?

వద్దనెనా !

వద్దనెనా మనోఙ్ఞ సుమవల్లరి మేనధరించ బూనగా

వద్దనెనా సురా మధుర పానమొకించుక సేయ బూనగా

వద్దనెనా సుధాధర భవాంగజ పూజన లంద బూనగా

వద్దనెనా వరూధిని ప్రవర్తిత స్వర్గ సుఖాలవాలమున్ .

14, అక్టోబర్ 2022, శుక్రవారం

అందాల మోహనా

అందాల మోహనా ! అర

విందాక్షా ! కృష్ణ ! వినతి వింటున్నావా ?

తొందరపెడుతోంది మనసు ,

కందొవ అరమోడ్పులయ్యె , కరుణే రాదా !

అలసితివా , శ్రీ కృష్ణా !

తులసీదళ పారిజాత తోమాలిదిగో !

గళమున వేసితి , నేనున్

అలరులతో పాటు , హృదయమందు నిలిచితిన్ .

12, అక్టోబర్ 2022, బుధవారం

మదిలో అలజడి రేగెడు

అరుగో , రాధా కృష్ణులు ,

చెరిసగమయి పొదలమాటు చేరిరి , కంటే ,

సరి సరి , ఈ యమునా తటి

పరిసరములు మధువు లొలికె , వారిరువురితో .

అడుగో , మురళీ మోహను ,

డడుగడుగు మనోహరాలు , అడుగులు వడ , ఆ

రడుగుల మన్మథ రూపము ,

పడుచు టెడద , దడ దడ మన , పర్వుచు నుండెన్ .

మదిలో అలజడి రేగెడు ,

మదనుని పేరురము జూడ , మరుమల్లె విరుల్

పొదివిన జడ అల్లాడెడు ,

కుదు రుండదు నీళ్ళకడవ , కోమలి ! నాకున్ .

పది జన్మలైన , కృష్ణుని

పదముల గెడన , పడియుండు బతుకె బతుకు , ఆ

పెదవుల రుచి , రుచి చూచెడు

వెదురుదె గద జన్మ , మనది వేదన సఖియా !

వగలొదవెడు , సెగలొదవెడు ,

మగటిమి మూర్తీభవించి మనముం దడుగో ,

అగుపడు , వగకాని గనగ

భిగి సడలెడు నీవి సఖియ , బేలయితి గదే !

కడవలు తేలిక లయ్యెను ,

కడుకొని బరువయ్యె యెదలు , కాంతుని కృష్ణున్

కడకంట గనిన కాంతల

నిడు మేనులు వణక సాగె , నెంతందంబో !

అతిమనోహరము

అర చిరునవ్వు మోమపయి అబ్బురమై మెరయంగ నింతిరో !

కరములు సాచి , విల్దొడిగి , కంజపు టమ్మును కంతుడేసి న ,

ట్లరయగ చూడ్కులన్ బరపుటల్ గననయ్యెడి , నింక నెవ్వడో

ఉరము పెటిల్లునన్ బగిలి , ఊపిరి గోల్పడుటల్ ధ్వనించెడిన్ .

అమ్మకు నీరాజనం

పాటల రచన : వెంకట రాజారావు . లక్కాకుల

పాడినవారు : శ్రీమతి లక్ష్మీభవాని

5, అక్టోబర్ 2022, బుధవారం

విజయదశమి శుభాకాంక్షలు

విజయోస్తు గణనాధ ! విఘ్నేశ ! సురవంద్య !

విజయోస్తు శివుడ ! దిగ్విజయమస్తు ,

విజయోస్తు కుల్లూర వెలసిన పోలేరు !

విజయోస్తు రామ ! దిగ్విజయమస్తు ,

విజయోస్తు అచ్యుతా ! విశ్వ జన వినుతా !

విజయోస్తు హనుమ ! దిగ్విజయమస్తు ,

విజయోస్తు వెంకయ్య ! వినుతింతు , వినుతింతు

విజయోస్తు సాయి ! దిగ్విజయమస్తు ,

దిగ్విజయమగు గాక ! మా దివ్య , మాతృ

భువికి , అచటి ప్రజలకు , ఈ పుడమి వెలయు

సకల జనులకు , విజయదశమి యొసంగు

సకల సన్మంగళములు , ప్రశాంతతలును .

21, మే 2022, శనివారం

మిత్ర సమాగమం

బండి కాపు దొరను నిండుగా గాంచితి

విజయవాడ లోన వేడుక పడి

స్నేహ భాషణాలు చేసిన విందులు

మధురమై తనిసెను మది మరిమరి .

9, మార్చి 2022, బుధవారం

రుక్మిణీ పాణి గ్రహణం

అరమోడ్పు కనుల , రుక్మిణి

వరుని గనును , అంతలోనె వరదుడు కనగా ,

మరుని పువుబంతి దవిలిన

పరువపు మొగ్గయె , మనోఙ్ఞ పద చిత్ర మహా !

దక్కెను రుక్మిణి యని హరి ,

చిక్కె మనోహరు డని యా చికురాననయున్ ,

ఒక్కెడ బిగి కౌగిళులన్

జిక్కిరి , విడదీయ బ్రహ్మచేతగున తగన్ ?

ఇదికదా , కృష్ణయ్య మదికి నచ్చిన సేవ

పాదాంబుజములపై యొరగుట ,

ఇదికదా , కృష్ణయ్య మదికి నచ్చిన సేవ

దరిసి కరముల మ్రొక్కి ప్రదక్షిణ మిడ ,

ఇదికదా , కృష్ణయ్య మదికి నచ్చిన సేవ

నతులతో ముంచి సంస్తుతులు సేయ ,

ఇదికదా , కృష్ణయ్య మదికి నచ్చిన సేవ

అకలంక భక్తి డోలికల నూచ ,

అన్నిటికి మించి , ప్రియమార , గిన్నె లోన

వెన్న నైవేద్య మిడి , తినిపించు సేవ

యన్న , కృష్ణయ్య కిష్టము , కన్ను గవకు

భాష్పములు గ్రమ్ము , కృష్ణయ్య పటము గాంచ .

8, మార్చి 2022, మంగళవారం

మహిళ 'మహరాణి' నేటి రామాయణమున

బధ్ధకముగ లేచి , పడకపై కసిరిన ,

సతికి నెస్ కాఫి చేసాచి యొసగి ,

బూష్టిచ్చి పిల్లల , కష్టకష్టాల్ వడి ,

స్నానాదికముల వేసట ముగించి ,

వంట జేసి , పొసగ వడ్డించి బాక్సులన్ ,

పిల్లలన్ స్కూళ్ళకు వెళ్ళ దిగిచి ,

సతికి దోసెలు వేసి , శాపనార్థాల్ దిని ,

మధ్యాహ్న బాక్సు ప్రేమారనొసగి ,

చచ్చి చెడుచు , ఆఫీసుకు వచ్చిపడగ ,

అచటనూ తిట్లతో చంపు ఆడబాసు

వద్దురా మోడరన్ మగవాళ్ళ వెతలు

మహిళ 'మహరాణి' నేటి రామాయణమున .

( మహిళా దినోత్సవ శుభాకాంక్షలు )

17, ఆగస్టు 2021, మంగళవారం

కృష్ణుని రూపలావణ్యాలు

కృష్ణపరమాత్మ శోభనకృత మనోఙ్ఞ

రూపలావణ్యములుగాంచి రుక్మిణిసతి

అచ్చెరువు జెంది నిచ్చేష్టయయ్యె , పోత

నకును కట్టెదుట గన్పట్టి నటులె దోచు .

16, ఆగస్టు 2021, సోమవారం

కృష్ణపరమాత్మతోడి మమేకమంద

కృష్ణపరమాత్మతోడి మమేకమంద ,

భక్తురాలెంతగా కోరి పరితపించు

నో , దెలియ , పోతనకు మించి , యొరులెరుగరు ,

భాగవతము తెలుగులకు భాగ్య పేటి .

5, ఆగస్టు 2021, గురువారం

ఈ పూబంతి .....

ఈ పూబంతి విహారపు

టూపులు చూడంగ , మదను డుధ్ధతుడై , పూ

దూపులు సంధించె ననగ

బో ! పైనా కింద మొత్తమూ పూదండల్ .

24, జులై 2021, శనివారం

గురుపౌర్ణమి శుభాకాంక్షలు

పరమాత్మ ' కృష్ణుడే ' సరి జగద్గురుం

డిల భగవద్గీత వెలయ జెప్పె ,

వేద పురాణాలు వెలయించి గురుడయ్యె

' వ్యాసుండు ' భువిని సేవలు గడించి ,

శ్రధ్ధా సబూరి యాచరణగా బోధించి

' సాయి ' సద్గురుడయ్యె సకల జగతి ,

తగ నుపాధ్యాయులై తనరు ' యొజ్జలు ' గూడ

గురువులు జగతికి గురుతుగాను ,

నేడు గురుపౌర్ణమి , వ్యాసమునీశ్వరుని జ

యంతి , పరమేశ్వరాకారు లైన మేటి

గురువు లందరి భజియింతు , తరిమి చీక

టులను , వెలుగులు తెచ్చిరి యిలకు గనుక .

23, జులై 2021, శుక్రవారం

రామోనామ బభూవ .....

రాముండుండెను - ఊ , తదీయ సతి పేరా సీత - ఊ , తండ్రి యా

ఙ్ఞామూర్ధన్యుడు వోయి తా మడవులన్ దాటంగ- ఊ , రావణుం

డామెన్ మోసముతో హరించెను - ఉ , నిద్రార్థ మాతల్లి శ్రీ

రామున్ గాధను విన్చ నూయనుచు , నిద్రన్ , లక్ష్మణా విల్లు వి

ల్లీమంచున్ పలవించు కృష్ణుడు సదా యిచ్చున్ మహార్థంబులన్ .

*****

రామో నామ బభూవ, హుం, తదబలా సీతేతి, హుం,తౌ పితుః

వాచా పంచవటీ తటే విహరతః తామాహర ద్రావణ:l

నిద్రార్ధం జననీ కధామితి హరే:హుంకారతః శ్రుణ్వతః

"సౌమిత్రే!క్వధను ర్ధను ర్ధను" రితి వ్యగ్రాః గిరః పాతు నః ll

ఇది 'రామకర్ణామృతం'లో ప్రస్తావించబడిన శ్లోకం.

సద్గురు సాయినాధునికి 🙏 లు

అకలంక సాయినాధుని

సకలానిమిషస్వరూపు సద్గురుని సదా

ప్రకటిత భక్తి ప్రపత్తుల

ముకులితకరకమల 🙏 స్తోత్రములసేవింతున్ .

22, జులై 2021, గురువారం

ఓహో ! చపాతీ ఇలా కూడా చెయ్యొచ్చు !

రుద్దేది గుండు మీదా ,

అద్దుచు కాల్చేది చూడు డైరన్ మీదా ,

అద్దిర ఇల్లాల్లంటే ,

బుధ్ధులు మరి కొత్త కొత్త పోకడలు గదా !

17, జులై 2021, శనివారం

నిన్ను దర్శించక .....

నిన్ను దర్శించక నీలమోహనరూప !

కన్నులున్నందున ఘనత యేమి ?

నిన్ను సేవించక నీరజాత నయన !

చేతులున్నందున శ్రేయ మేమి ?

నిన్ను భజించక నిగమ శుభగరూప !

నోరు గల్గుట వల్ల సౌరదేమి ?

నిన్ను వినక మహనీయ ఘనచరిత !

చెవులు గల్గుట వల్ల స్థితి యదేమి ?

మాధవా ! నిను విడి మరిమరి బతికినా

బతుకుకు పరమార్థ పరత యేమి ?

కృష్ణ ! నిన్ను జేర కెన్ని బొందినగాని

ఘనత యే మిహ పరముల కాంక్షదీర .